“1996-cı il Lissabon Zirvəsində Qarabağ məsələsinin öz müqəddəratını təyinetmə prinsipi əsasında həll edilməsi və Azərbaycan daxilində özünüidarəetmə qurumu statusunun verilməsi qərara alındı. Bu çərçivədən kənarda məsələnin həlli üçün başqa seçim yox idi”. Bunu hakim Vətəndaş Müqaviləsi Partiyasının proporsional namizədlər siyahısına rəhbərlik edən Ermənistanın Baş naziri Nikol Paşinyan 18 mayda İrəvanda keçirilən seçki kampaniyası zamanı bildirib.
Qarabağ klanını təmsil edən Artur Osipyan Paşinyana Ermənistanın bu sənədin qəbuluna veto qoyduğunu xatırlatdıqda isə Paşinyan bildirib ki, Qarabağ məsələsinin yalnız Azərbaycan daxilində həlli mümkün idi. "Qarabağ məsələsi Ermənistanı tələyə salmaq üçün bir kapkan idi", - deyə o əlavə edib. Osipyan Ermənistanın Müstəqillik Bəyannaməsini xatırlatdıqda isə Paşinyan Müstəqillik Bəyannaməsini qəbul etmədiyini, onun dövlət əleyhinə olduğunu bildirib.
Azərbaycanın azərbaycanlıların Ermənistanda məskunlaşması tələbinə gəldikdə, Paşinyan belə bir məsələnin Ermənistanın gündəliyində olmadığını bildirib. Bundan sonra isə o, “Artsax xalqını” “Artsaxı qurmamaqda” günahlandıraraq onlara bağırıb: "Rədd olun buradan. Bu Qarabağın yalançı elitası buradan çıxmalıdır. Siz qaçaqlar. Burada nə edirsiniz? Qarabağın yalançı elitası bizə barmar silkələyir. Axı, siz kimsiniz? Artur Osipyan, başınızı divara vurun. Uşaqlarımızın əvəzinə siz gedib ölməli idiniz. Quldurlar, vəhşilər. Qarabağ xalqını girov götürdünüz. Niyə sağsınız ki, 5000 qurban haqqında danışasınız? Şahramanyan niyə sağdır? Başqaları. Niyə parlament üzvləriniz sağdır? Niyə ölməyiblər?"…
Ermənistanda Milli Məclis, Qarabağ hökuməti olduğunu bildirən Paşinyan “Hamısını məhv edəcəyəm", - deyib.
SAMİRƏ
