Vüqar Bayramov: “Bu, sözügedən ölkələr arasında ticarət dövriyyəsinin daha da artmasına imkan verəcək”
Prezident İlham Əliyev Türk Dövlətləri Təşkilatının Dövlət başçılarının qeyri-rəsmi Zirvə görüşündə çıxışında bildirib ki, rəqəmsal inkişaf sahəsində türk dövlətləri ilə əməkdaşlıq uğurla davam edir:
“Avropa ilə Asiya arasında “Rəqəmsal İpək Yolu” layihəsi icra olunur. Bu layihənin tərkib hissəsi olan, Azərbaycan ilə Qazaxıstan arasında Trans-Xəzər Fiber-Optik Kabel xəttinin yaxın aylarda istifadəyə verilməsi planlaşdırılır. Türk dövlətləri ilə nəqliyyat sahəsində əməkdaşlığımız genişlənir. Cari qlobal geosiyasi şəraitdə Orta Dəhlizin əhəmiyyəti daha da artır. Reallaşmaqda olan Zəngəzur dəhlizi Orta Dəhlizin əsas seqmentlərindən birinə çevriləcək. Orta Dəhliz boyunca gömrük prosedurları sadələşdirilir. Türk Dövlətləri Təşkilatı çərçivəsində hazırlanmış “e-Permit” sistemi elektron icazələrin operativ şəkildə verilməsini təmin edir”.
Maraqlıdır, TDT ölkələri arasında rəqəmsal inkişaf sahəsində əməkdaşlıq hansı iqtisadi üstünlüklərin əldə edilməsinə təkan verəcək?
Sözügedən məsələni baki-xeber.com-a şərh edən millət vəkili Vüqar Bayramovun fikrincə, TDT ölkələri arasında rəqəmsal inkişaf sahəsində əməkdaşlıq artıq prioritetə çevrilib: “Və təbii ki, sonuncu görüşdə məhz bunun daha çox müzakirə edilməsi də ondan xəbər verir ki, TDT ölkələri rəqəmsal inkişaf sahəsində daha geniş əməkdaşlıq qurmaq niyyətindədirlər. Təbii ki, artıq biz türk dövlətləri arasında gömrük xidmətlərinin elektronlaşmasını müşahidə edirik. Bu da sözügedən ölkələr arasında ticarət dövriyyəsinin daha da artmasına imkan verəcək. Hazırda türk dövlətləri arasında ticarət dövriyyəsinin həcmi 57 milyard dollardır. Ticarət dövriyyəsinin artırılması əsas hədəflərdən biridir. Eyni zamanda Azərbaycan yaxın illərdə türk dövlətləri ilə ticarət dövriyyəsini 15 milyard dollara çatdırmaq niyyətindədir. Rəqəmsallaşma yalnız optik sahədə əməkdaşlığın deyil, həm də iqtisadiyyatın fərqli sektorlarında əməkdaşlığın gücləndirilməsinə imkan verəcək. Bu, türk dövlətlərinin daha da yaxınlaşmasına, iqtisadi cəhətdən inteqrasiyasının sürətlənməsinə, qarşılıqlı sərmayə qoyuluşlarının artmasına gətirib çıxaracaq. Bu da təbii ki, praktik olaraq türk dövlətləri arasında əməkdaşlıq nəticəsində onların, milli iqtisadiyyatlarının inkişafını daha da sürətləndirəcək. Bir sözlə, türk dövlətləri arasında rəqəmsal inkişaf sahəsində əməkdaşlığın dərinləşdirilməsi, iqtisadi ticarət əlaqələrini daha da gücləndirəcək”.
Vidadi ORDAHALLI
