Züriyə Ruslanqızı: “Bu proses ilk növbədə türk dövlətləri arasında daha sıx koordinasiya ilə baş verə bilər”
Prezident İlham Əliyev Türk Dövlətləri Təşkilatının (TDT) Dövlət başçılarının Qazaxıstanın Türküstan şəhərində keçirilən qeyri-rəsmi Zirvə görüşündə bəyan edib ki, türk dünyası XXI əsrin nüfuzlu geosiyasi güc mərkəzlərindən birinə çevrilməlidir. “Bu gün Türk Dövlətləri Təşkilatının beynəlxalq çəkisi artır, qlobal proseslərdə rolu və mövqeyi güclənir”.
Azərbaycan Prezidenti bildirib ki, keçən ilin oktyabr ayında Qəbələ Zirvə Görüşündə sədrliyi qəbul edən Azərbaycan təşkilat çərçivəsində əməkdaşlığın daha da dərinləşməsi istiqamətində fəaliyyət göstərir:“Ailəmiz olan Türk dünyası XXI əsrin nüfuzlu geosiyasi güc mərkəzlərindən birinə çevrilməlidir. Azərbaycan bundan sonra da Türk Dövlətləri Təşkilatının möhkəmləndirilməsi naminə səylərini əsirgəməyəcək".
Bu necə olacaq? Necə baş verəcək?
Politoloq Züriyə Ruslanqızı (Qarayeva) baki-xeber.com-a bildirdi ki, Prezident İlham Əliyevin bu fikri Türk Dövlətləri Təşkilatının sadəcə mədəni birlik kimi yox, real siyasi, iqtisadi və strateji güc platforması kimi formalaşması hədəfini göstərir. “Bu proses ilk növbədə türk dövlətləri arasında daha sıx koordinasiya ilə baş verə bilər: ortaq nəqliyyat dəhlizləri, enerji layihələri, rəqəmsal bağlantılar, ticarətin asanlaşdırılması, müdafiə və təhlükəsizlik sahəsində əməkdaşlıq TDT-ni daha təsirli aktora çevirə bilər. Azərbaycan burada xüsusi körpü rolundadır. Çünki ölkəmiz həm Cənubi Qafqazda yeni reallıq yaradıb, həm Orta Dəhlizin əsas halqalarından biridir, həm də Türkiyə, Mərkəzi Asiya və Xəzər məkanını birləşdirən strateji mövqeyə malikdir”.
Z.Ruslanqızının sözlərinə görə, bu güc mərkəzinin yaranması birdən-birə olmayacaq. Z.Ruslanqızının fikrincə, bunun üçün TDT ölkələri bir-birinin iqtisadiyyatını tamamlamalı, ortaq bazar düşüncəsini gücləndirməli, nəqliyyat və logistika xətlərini vahid sistemə çevirməli, beynəlxalq məsələlərdə daha çox eyni mövqedən çıxış etməlidirlər: “Türk dünyasının üstünlüyü ondadır ki, bu birlik yalnız maraqlara yox, həm də ortaq tarixə, dilə, mədəniyyətə və siyasi etimada söykənir. Əgər bu mənəvi yaxınlıq konkret iqtisadi layihələr, təhlükəsizlik mexanizmləri və diplomatik koordinasiya ilə tamamlanarsa, Türk Dövlətləri Təşkilatı XXI əsrdə Avrasiya məkanında söz sahibi olan ciddi geosiyasi mərkəzə çevrilə bilər”.
İradə SARIYEVA
