Afsəddin Nəbiyev: “Azərbaycan artıq Cənubi Qafqazda sülhün zəmanəti, sabitliyin dayağı və yüksəlişin rəmzidir”
Prezident İlham Əliyev Zəngilan şəhərində sakinlərlə görüşdə beynəlxalq müstəvidə bu gün Azərbaycana olan hörməti bir sıra amillərlə əlaqələndirib:
“Bu gün hər şey göz qabağındadır. Azərbaycanın beynəlxalq mövqeləri, beynəlxalq nüfuzu nə qədər yüksək səviyyədədir. Bizə olan hörmət, rəğbət, xoş münasibət getdikcə daha da genişlənir. Bütün bunların səbəbi var. Əlbəttə ki, bizim ləyaqətli siyasətimiz, sözlə əməl arasındakı birlik və təbii ki, bizim hərbi qələbəmiz. Mən bunu dəfələrlə demişəm, bunu indi hər kəs görə bilir. Təkcə bunu görmək üçün tarixçi olmaq lazım deyil. Qısa müddət ərzində bizim qədər tam, mütləq, birmənalı qələbə qazanan ikinci ölkə olmamışdır. Özü də biz bu müharibəni bütün beynəlxalq humanitar normalara uyğun aparmışıq, Ermənistandan fərqli olaraq. Onlar bizim şəhərlərimizi, kəndlərimizi “İsgəndər-M”, “Skad” və digər ballistik uzaqmənzilli raketlərlə vururdular”.
Sözügedən məsələyə münasibət bildirən AMİP-in sədr müavini Afsəddin Nəbiyev buna bir neçə prizmdan yanaşdı: “Prezident İlham Əliyevin Zəngilan torpağından dünyaya ucalan səsi, bir diplomatik bəyanat olmaqla, iki əsrlik bir sınağın qətiyyətli yekunudur. Tarixi keçmişə nəzər salmaqla biz bu uğurları daha aydın təsvir edə bilərik. XIX əsrdən etibarən Cənubi Qafqazın geosiyasi xəritəsində "erməni kartı" vasitəsilə mənfur bir ssenari tətbiq edilirdi. Rusiya imperiyasının bölgədə hakimlik etmək naminə başlatdığı kütləvi köçürmə siyasəti, Azərbaycanın tarixi torpaqlarında süni bir "əngəl" yaratmaq məqsədi güdürdü. XX əsrin sovet buxovları altında milli kimliyimizin sıxışdırılmasına, iradəmizin qırılmasına hesablanmış bütün təzyiqlərə rəğmən, xalqımız öz daxili enerjisini, dövlətçilik genini və azadlıq eşqini itirmədi. 1991-ci ildə bərpa olunan müstəqillik, əslində, böyük bir qayıdışın təməli oldu. Müstəqilliyin ilk illərində üzləşdiyimiz işğal və iqtisadi böhranlar bizi sarsıtsa da, əyə bilmədi. Ötən onilliklər ərzində Azərbaycan dövləti səbir və strateji ağılla öz iqtisadi qalxanını qurdu, ordusunu dünyanın ən modern güclərindən birinə çevirdi. Bu hazırlığın zirvəsi olan 44 günlük Vətən müharibəsi, regionun geosiyasi simasını əbədi olaraq dəyişdi. Azərbaycan əsgəri təkcə torpaqları azad etmədi, həm də döyüş meydanında humanizm dərsi keçdi. Qarşı tərəf dinc şəhərlərimizi ballistik raketlərlə hədəfə alıb terror törədərkən, Azərbaycan ordusu yalnız beynəlxalq hüquq və hərbi etika çərçivəsində hərəkət edərək "ləyaqətli müharibə" standartını yaratdı. Bu gün Azərbaycan artıq kənar güclərin oyun meydanı deyil, regionun əsas oyun qurucusudur. İndi bu coğrafiyada Azərbaycanın razılığı olmadan heç bir strateji addım atıla, kimsə öz maraqları naminə "at oynada" bilməz. Zəfərimiz hərbi qələbə ilə yanaşı, bir millətin dirçəlişi, parçalanmış yaddaşın bütövləşməsi və tarixi ədalətin mütləq zəfəridir. Azərbaycan artıq Cənubi Qafqazda sülhün zəmanəti, sabitliyin dayağı və yüksəlişin rəmzidir. Demək olar artıq bütün dünya bunun fərqindədir. Bizim qələbəmiz tarixin həm dünəninə, həm bu gününə, həm də gələcəyinə vurulmuş əbədi möhürdür”.
Vidadi ORDAHALLI
