Xalid Kərimli: "Xarici səfərlərə nəzarət büdcə intizamının yaxşılaşmasına gətirib çıxara bilər"
Prezident İlham Əliyev "Yüksək səviyyəli nümayəndə heyətlərinin səfərləri barədə hesabatların və məlumatların təqdim edilməsi haqqında" 2004-cü il 5 noyabr tarixli 144 nömrəli Fərmanda dəyişiklik edib.
Fərmana əsasən, Baş nazir, onun müavinləri, mərkəzi icra hakimiyyəti orqanlarının rəhbərləri və ya müavinləri tərəfindən rəhbərlik edilən yüksək səviyyəli nümayəndə heyətlərinin xarici dövlətlərə edəcəyi səfərlər Prezidentlə razılaşdırılmalı, səfərlərin nəticələrinə dair hesabat isə Prezidentə təqdim edilməlidir. Eyni qayda xarici dövlətlərin yüksək səviyyəli nümayəndə heyətlərinin Azərbaycana gəlişinə də şamil edilir. Həmçinin Prezident tərəfindən vəzifəyə təyin olunan dövlət şirkətlərinin rəhbərləri və müavinləri tərəfindən rəhbərlik edilən nümayəndə heyətlərinin xarici səfərləri də bu tələblər çərçivəsindədir.
Səfərdən ən geci 15 iş günü əvvəl aşağıdakı məlumatlar Prezidentə təqdim edilməlidir: səfərin proqramı, hər bir tədbirin adı, məzmunu, iştirakçıları, yeri və tarixi, əyani iştirakın zəruriliyi, ezamiyyə və digər xərclər, maliyyələşmə mənbəyi, gözlənilən nəticələr, heyətin rəhbəri və üzvləri haqqında məlumat. Üzrlü səbəblər olduqda bu məlumatlar daha qısa müddətdə də təqdim edilə bilər.
Bir nümayəndə heyətinin tərkibinə birdən çox dövlət orqanının nümayəndəsi daxil olduqda, məlumatlar həmin orqanlarla razılaşdırılmaqla göndərilir. Nazirlər Kabinetinə fərmandan irəli gələn məsələləri həll etmək tapşırılıb.
Mərkəzi icra hakimiyyəti rəhbərlərinin və nümayəndələrinin xərclərinin effektivliyinə nəzarətin gücləndirilməsini nəzərdə tutan bu fərmanın nə kimi əhəmiyyəti ola bilər?
Iqtisadçı ekspert Xalid Kərimli prezidentin xarici səfərlərə nəzarət məsələsində qəbul etdiyi fərmanını dəyərləndirərək, bunun nəzarət, şəffaflıq və hesabatlılığın gücləndirilməsi üçün mühüm bir addım olduğunu bildirib.
Ekspertin sözlərinə görə, fərman dövlət səfərlərinin nəticələri haqqında məlumat bazası yaradacaq və məmurların beynəlxalq arenada verdiyi mesajları kontrol edəcək. Xalid Kərimli hesabatlılığın artmasının formal səfərlərin qarşısını almağa və məsuliyyəti formalaşdırmağa şərait yarataçağını qeyd edib.
"Nəticəsizliyi əvvəlcədən bəlli olacaqsa, səfərin rəhbəri və iştirakçıları bu səfəri reallaşdırmaqdan çəkinəcəklər", — deyə ekspert vurğulayıb.
Kərimli sözügedən fərmanın dövlət şirkətlərinin xarici tədbirlərdə iştirakını da düzənləyəcəyini, bu yolla büdcə intizamının yaxşılaşacağını, paralel fəaliyyətlərin azalacağını və ezamiyyə xərçləri üzərində nəzarətin güclənəcəyini bildirib, lakin son nəticənin nəzarətin səmərəli həyata keçirilməsindən asılı olacağını xatırladıb.
Ekspert, bu addımı ümumən müsbət qiymətləndirməsinə baxmayaraq, onun praktiki nəticəsinin nəzarət mexanizminin işlənməsində yaranacaq səmərə ilə müəyyən olunacağını qeyd edib.
Akif NƏSİRLİ
