Elşən Manafov: “Azərbaycan üçün son dərəcə təhlükəli olan bu beynəlxalq şəraitdə Prezident İlham Əliyev bu...”
Prezident İlham Əliyev Zəngilan şəhərində sakinlərlə görüşdə bildirib ki, İkinci Qarabağ müharibəsini dayandırmaq istəyənlərin sayı kifayət qədər çox idi:
“İkinci Qarabağ müharibəsi zamanı bizə nə qədər təzyiqlər olsa da, onların heç biri nəticə vermədi. Halbuki bizi dayandırmaq istəyənlərin sayı kifayət qədər çox idi. Birincisi, o vaxt ATƏT-in Minsk qrupuna rəhbərlik edən həmsədrlər, o ölkələr. Hərəsi öz səbəbinə görə bizi dayandırmaq istəyirdi. 44 gün ərzində dəfələrlə bizə təzyiqlər göstərilirdi. O ölkələr sıradan olan ölkələr deyil - onlar nüvə dövlətləridir, onlar BMT Təhlükəsizlik Şurasının daimi üzvləridir. Görün, biz kimlərlə üz-üzə qalmışdıq. Hər biri bu işğalı əbədi etmək, bundan bir alət kimi istifadə etmək və nəticə etibarilə Azərbaycan xalqına rahat nəfəs almaq imkanı verməmək üçün dəridən-qabıqdan çıxırdı. Təkcə onlar deyil, başqa ölkələr də bizim qələbəmizi istəmirdilər”.
Sözügedən məsələ ilə bağlı fikirlərini baki-xeber.com-la bölüşən politoloq Elşən Manafov hesab edir ki, ATƏT-in Minsk qrupunda təmsil olunan həmsədr dövlətlərin Qafqaz regionu ilə bağlı fərqli geosiyasi maraqları problemin uzun müddət danışıqlar müstəvisi üzərində qalmasının mühüm səbəblərindən olub: “Tərəflər arasında Qafqaz və ətraf regionlarda nüfuz dairəsi, satış bazarları, regionun təbii sərvətlərinə yerli milli elitaların razılığı konteksində nəzarət uğrunda gedən mübarizə problemin güc yolu ilə həlli variantını istisna edirdi. Zira, münaqişə tərəfləri arasında münaqişənin yenidən hərbi müstəvi üzərində həlli üçün ediləcək cəhdlərin münaqişəyə cəlb olunmuş dövlətlərin insan, iqtisadi, maliyyə, hərbi gücləri konteksində hansı sonluqla bitəcəyi bəlli idi. Zamanında bu münaqişəni qızışdıran və yönləndirən bəlli dövlətlərin siyasi və hərbi elitalarına bəlli idi. Nefti, qazı, digər təbii sərvətləri olan, bu sərvətləri dünya bazarlarında satmaq, böyük pullar qazanmaq, nəticə etibarı ilə güclü və modern orduya sahiblənmək imkanları olan Azərbaycanın Ermənistanla qarşıdurmadan qalib çıxacağını həm elmi, həm də kəşfiyyat dəlilləri sübut edirdi. Üstəlik, Qərbin Ermənistanda regionun geosiyasi arxitekturasını yenidən cızmaq məqsədilə həyata keçirdiyi Paşinyan layihəsi münaqişəni qaçılmaz edirdi. Paşinyanın "Qarabağ Ermənistandır" kimi, siyasi baxımdan məsuliyyətsiz və səbatsız açıqlaması müharibəni qaçılmaz etdi. Bu, məhz tərəflər arasında danışıqların dalana dirənməsinə və bölgədə geosiyasi reallıqların dəyişməsinə hesablanmış siyasət idi. Üstəlik, münaqişəni qaçılmaz etmək uçun qlobalist beynəlmiləl qüvvələrin Ermənistanda təmsilçisi olaraq hakimiyyətə sürüklənmiş Paşinyanın qərarı ilə Ermənistan tərəfi Azərbaycan üçün strateji, siyasi, sosial və iqtisadi əhəmiyyəti olan Bakı-Tbilisi-Ceyhan kəmərini hədəfə almışdı. Azərbaycan üçün son dərəcə təhlükəli olan bu beynəlxalq şəraitdə Prezident İlham Əliyev bu "mehriban düşmənlər" arasında münasibətlərdəki ziddiyyətlərdən yüksək məharət və diplomatik ustalıqla istifadə etdi. Onların Ermənistana dəstək üçün ortaq məxrəcə gəlməsinə imkan vermədi. Üstəlik, təşkilatçılığı, kadrlardan düzgün və yerində istifadə, neft-qaz diplomatiyasının Azərbaycana gətirdiyi maliyyə kapitalını iqtisadiyyatın dirçəlməsinə, ordunun isə ən müasir silahlarla təchizatına yönəldərək xalqın və ordunun birliyini təmin etdi. Millətin müharibə dövrünün tələblərinə köklənməsini təmin etməklə Azərbaycan oğullarının qanı və canları hesabına möhtəşəm qələbəni millətə yaşatdı, onu yüksəldə bildi”.
Vidadi ORDAHALLI
