Məhərrəm Zülfüqarlı: “Məsələ ondadır ki, indi Rusiya əvvəlki kimi güclü deyil”
İrəvan Ermənistana səfəri zamanı Volodimir Zelenskinin Moskvaya qarşı kəskin çıxışlarını görməzdən gəlib. Bu barədə Rusiya Xarici İşlər Nazirliyinin MDB ölkələri üzrə dördüncü departamentinin direktoru Mixail Kaluqin TASS agentliyinə müsahibəsində bildirib.
“Təbii ki, Moskva Volodimir Zelenskinin Brüsselin təşəbbüsü ilə İrəvana gəlişini və onun Rusiyaya qarşı nifrət dolu çıxışlarını qeydə alıb. Ev sahibi olan Ermənistan tərəfi isə bu çıxışları israrla görməməzlikdən gəlib” – deyə o bildirib.
Kaluqinin sözlərinə görə, Ermənistanda Avropa Siyasi Birliyinin sammitlərinin və Ermənistan-Aİ görüşlərinin keçirilməsi, xüsusən də parlament seçkiləri ərəfəsində erməni əhalisi üçün cazibədar bir Avropa "ilğımı" yaratmaq məntiqinə söykənir.
Diqqəti çəkən məqam odur ki, seçki yaxınlaşdıqca Rusiya daha sərt formada Ermənistan hakimiyyətinin üzərinə gedir. Açıq və rəsmi olaraq təhdidlərlə çıxış edirlər.
Sözügedən məsələni baki-xeber.com-a şərh edən tarix elmləri doktoru, professor Məhərrəm Zülfüqarlının fikrincə, Rusiyanın Ermənistanda gedən prosesləri diqqətlə izləməsi və ona reaksiya verməsi bu gün ən çox dünya ictimaiyyətinin diqqətində olan məsələdir: “Çünki 7 iyun seçkilərində Rusiyanın əsas marağı Ermənistanda indiki hakimiyyəti devirmək, Moskvaya bağlı olan qüvvələri hakimiyyətə gətirməkdir. Buna görə də Ermənistanda keçirilən Avropa İttifaqının tədbirinə Zelenskinin gəlməsi və orada Rusiya əleyhinə danışmasına bunların sərt reaksiya verməməsi Kremlin riyakar siyasətinin bir hissəsidir. Yəni onlar Zelenskinin adını hallandırmaqla, ona reaksiya verməklə elə bil bu məsələnin daha çox təbliğ olunmasına və Rusiyanın əleyhinə işlənməsinə gətirib çıxara biləcəyindən ehtiyat edirlər. Paşinyanın Putinlə görüşü, Zelenskinin İrəvana gəlib çıxış etməsi artıq Rusiyanın keçmiş müttəfiqi, KTMT-nin üzvü olan Ermənistanın indiki hakimiyyətinin bu ölkədən ayrılması kimi dəyərləndirilir. Ona görə də Rusiya indiki siyasətində əvvəlki illərdə olduğu kimi, riyakarlıq göstərir. Üzdə guya bu məsələlərə reaksiya vermir. Ancaq bunların hamısı təhlil olunur və bütün məsələlər yönəlib 7 iyun seçkiləri ərəfəsində Rusiyanın atacağı addımlara. Lakin məsələ ondadır ki, indi Rusiya əvvəlki kimi güclü deyil. Əvvəlki Rusiyanın olmaması 9 may paradında da özünü göstərdi. Ona görə də indiki dövrdə hadisələri izləməliyik ki, görək Rusiya Paşinyan hakimiyyətinin seçkilərdə məğlub olması üçün hansı addımlar atacaq. Bu da hamının diqqət mərkəzindədir. Bütün hallarda Paşinyan Rusiyapərəst qüvvələri məğlub etmək gücündədir. Ancaq seçkilərin yekun nəticələrini gözləmək lazımdır”.
Vidadi ORDAHALLI
