Bəhruz Quliyev: “Qarabağ məsələsi tarixə qovuşub, suverenlik bərpa edilib, regionda yeni əməkdaşlıq imkanları yaranıb”
Prezident İlham Əliyev Zəngilan şəhərində sakinlərlə görüşdə qeyd edib ki, Azərbaycanın Ermənistanı məhv etmək niyyəti olmayıb: “Bizim Ermənistanı məhv etmək niyyətimiz yox idi, Ermənistanın müstəqilliyini onun əlindən almaq niyyətimiz yox idi. Bu gün hələ də Azərbaycan-Ermənistan sərhədində Avropanın dırnaqarası müşahidəçiləri guya ki, keşik çəkirlər. Mən o vaxt da demişəm, biz bir dənə güllə atsaq, onların dabanları parlayacaq, heç izi-tozu da qalmayacaq orada. Amma özlərini belə göstərirlər, guya ki, onlar Ermənistanı bizdən qoruyurlar. Bizdən Ermənistanı qorumaq lazım deyil. Biz istədiyimizə nail olmuşuq”.
Sözügedən məsələ ilə bağlı fikirlərini baki-xeber.com-la bölüşən “SƏS” qəzetinin baş redaktoru, politoloq Bəhruz Quliyev hesab edir ki, Azərbaycanın hədəfi yalnız beynəlxalq hüququn bərpası, ərazi bütövlüyünün təmin edilməsi idi: “Cənab İlham Əliyevin Zəngilan şəhərində sakinlərlə görüş zamanı səsləndirdiyi fikirlər regionda formalaşmış yeni geosiyasi reallıqların mahiyyətini aydın şəkildə ortaya qoymaqla yanaşı həm də xarici auditoriya üçün mesaj oldu. Dövlət başçısının vurğuladığı kimi, Azərbaycanın məqsədi heç vaxt Ermənistan dövlətçiliyini aradan qaldırmaq, yaxud bu ölkəni məhv etmək olmayıb. Azərbaycanın hədəfi yalnız beynəlxalq hüququn bərpası, ərazi bütövlüyünün təmin edilməsi və uzun illər davam edən işğala son qoyulması idi. Bu yanaşma rəsmi Bakının illər boyu nümayiş etdirdiyi məsuliyyətli dövlət davranışının göstəricisidir. Azərbaycan 30 ilə yaxın müddətdə danışıqlar prosesinə sadiq qaldı, diplomatik yolları sonadək tükətməyə çalışdı. Lakin nəticə əldə olunmadığı üçün öz gücü hesabına BMT qətnamələrinin icrasını təmin etdi və regionda yeni status-kvo formalaşdırdı. Əlbəttə, Prezidentin Avropa İttifaqının sərhəddə yerləşdirilən müşahidə missiyası ilə bağlı səsləndirdiyi fikirlər də təsadüfi deyil. Bu missiyanın fəaliyyəti bir sıra hallarda neytral təhlükəsizlik mexanizmi deyil, daha çox siyasi görüntü yaratmaq cəhdi kimi qəbul edilir. Azərbaycan dəfələrlə bəyan edib ki, regionda sabitlik xarici siyasi nümayişlərlə deyil, Bakı ilə İrəvan arasında birbaşa dialoq və qarşılıqlı öhdəliklər əsasında mümkündür”.
Politoloqun fikrincə, bu gün reallıq ondan ibarətdir ki, Azərbaycan öz strateji məqsədlərinə nail olub: “Qarabağ məsələsi tarixə qovuşub, suverenlik tam bərpa edilib və regionda yeni əməkdaşlıq imkanları yaranıb. Düşünürəm ki, indi seçim Ermənistanın qarşısındadır. Ya revanşist dairələrin təsiri altında qalmalı, ya da sülh müqaviləsini imzalayıb Cənubi Qafqazda davamlı inkişaf prosesinə qoşulmalıdır. Prezident İlham Əliyevin mesajı həm Ermənistana, həm də bölgəyə kənardan təsir göstərmək istəyən dairələrə mesaj olaraq ünvanlanıb. Mesajın mahiyyəti isə bundan ibarətdir ki, Azərbaycan müharibə istəmir, amma milli maraqlarını qorumaq əzmində və təhdid dilini də sevmir”.
Vidadi ORDAHALLI
