Təbriz Musayev: “Hesab edirəm ki, Prezidentin mesajı məhz Makrona ünvanlanıb”
Prezident İlham Əliyev Zəngilan şəhərində sakinlərlə görüşdə bəzi Avropa liderlərini Ermənistanla bağlı mövqeyinə görə tənqid edib:
“Bu gün biz sülh şəraitində yaşayırıq və sülhün müəllifi də bizik. Biz istəməsəydik, sülh olmayacaqdı. Biz istəsəydik, istənilən hərbi əməliyyatı istənilən yerdə keçirə bilərdik. Bunu Ermənistan rəhbərliyi də bilir, onun arxasında duranlar da bilirlər. Nə qədər onun arxasında dururlar dursunlar, bilirlər ki, bizim gücümüzə qarşı onların heç bir şansı yoxdur, onlar acizdirlər. Gücləri var idisə, elə 2020-ci ildə kömək edərdilər də Ermənistana. Bu gün Ermənistana gəlib özünü saxta qəhrəman kimi göstərən bəzi xarici liderlər 2020-ci ildə elə həmin liderlər idi də öz ölkələrində hakimiyyət başında, gəlib yiyə duraydılar da Ermənistana. Boşboğazlıqdan başqa heç nə yoxdur. Onların da işi-gücü boşboğazlıqdır, ona görə öz ölkələrində onların dəstək əmsalı 10-15 faizdir. İndi guya ki, Ermənistanı bizim əlimizdən onlar çıxarıb xilas ediblər”.
Sözügedən məsələyə aydınlıq gətirən İrəvan Azadlıq Təşkilatının sədri Təbriz Musayev baki-xeber.com-a açıqlamasında bildirdi ki, burada söhbət əsasən Fransadan gedir: “Məsələ ondadır ki, Ermənistanda keçirilən Avropa Siyasi Birliyi sammiti çərçivəsində İrəvana səfər edən Fransa Emmanuel Makron bir sıra açıqlamalarla çıxış edib. Makron bəyan etdi ki, 2020-ci ildə 44 günlük müharibə zamanı Fransa Ermənistana humanitar və hərbi yardım edib. Makron iddia edib ki, guya Rusiya Ermənistana dayaq durmadı. Bu, tamamilə yalandır. Rusiya nə mümkündürsə həmin vaxt Ermənistana yardım göstərdi. Rusiya təyyarələrlə İran üzərindən Ermənistana silah daşıdı. Daha sonra quru yolu üzərindən İran vasitəsi ilə Ermənistana silah daşınması həyata keçirildi. Digər tərəfdən Gümrüdəki 102-ci bazanın silah anbarlarından silah və sursat Ermənistan ordusuna verildi. O zaman Fransanın cəsarəti var idisə müdaxilə edəydi də. Fransa necə müdaxilə edə bilərdi ki? Ermənistanın açıq dənizə çıxışı yoxdur. Etsəydi belə, bunun nəticəsi Fransa üçün ağır olardı. Bu baxımdan Makronun səsləndirdiyi fikirlər sadəcə boşboğazlıqdır. Ən başlıcası isə, Azərbaycan Ermənistana hücum etməyib. Azərbaycan beynəlxalq hüquqa söykənərək işğala son qoyub, ərazi bütövlüyünü və suverenliyini təmin edib. O cümlədən, 30 illik erməni separatizmini Qarabağdan yox edib. Bu baxımdan hesab edirəm ki, Prezidentin mesajı məhz Makrona ünvanlanıb. Heç kəsə sirr deyil müharibə dövründə ən çox canfəşanlıq edən, Azərbaycanla bağlı məsələni BMT Təhlükəsizlik Şurası müstəvisinə çıxarmağa cəhd edən Fransa olub. Ancaq Parisin bütün bu cəhdləri uğursuzluğa düçar olub”.
Vidadi ORDAHALLI
