Ermənistan hakimiyyəti ölkənin Rusiyanın rəhbərlik etdiyi ticarət blokundan nə vaxt çıxacağına dair konkret tarix açıqlamır. Xarici işlər naziri Ararat Mirzoyan bildirib ki, İrəvan "nə vaxtsa" Avrasiya İqtisadi İttifaqında (Aİİ) qalmaqla Avropa İttifaqına (Aİ) üzvlük üçün rəsmi müraciət etmək arasında seçim etməli olacaq: "Bu seçimin nə olacağını bilmirik. Aydındır ki, eyni anda həm Aİİ-də, həm də Avropa İttifaqında üzv olmaq olmaz. Hazırda bu məsələ gündəmdə deyil".
Baş nazir Nikol Paşinyanın hökuməti bir il əvvəl Ermənistanın Aİ-yə üzvlüyünü hədəfləyən qanunu qəbul edib. Lakin İrəvan hələ rəsmi müraciət etməyib. Aİ-yə üzv dövlətlərin heç biri də bu perspektivə açıq dəstək verməyib. Moskva dəfələrlə xəbərdarlıq edib ki, Ermənistan Rusiya bazarına güzəştli giriş hüququnu və iqtisadiyyatı üçün strateji əhəmiyyət daşıyan ucuz Rusiya qazını itirmək riski ilə üzləşə bilər. Rusiya prezidenti Vladimir Putin ötən həftəsonu İrəvanın iki blok arasında "mümkün qədər tez" seçim etməli olduğunu vurğulayıb: "Fikrimcə, həm Ermənistan vətəndaşları, həm də onların əsas iqtisadi tərəfdaşı olan bizim üçün ən qısa zamanda qərar qəbul etmək doğru olardı. Məsələn, referendum yolu ilə. Bu bizim işimiz deyil, lakin referendum keçirib ermənilərin seçimini öyrənmək tamamilə məntiqlidir. Biz də buna uyğun olaraq nəticələr çıxarar, mülayim, nəzakətli və qarşılıqlı faydalı ayrılıq yoluna qədəm qoyardıq". Putin bu sözləri İrəvanın iki Avropa sammitinə ev sahibliyi etməsindən cəmi bir neçə gün sonra deyib. Sammitlərdə, xüsusilə Ukrayna prezidenti Volodimir Zelenskinin iştirakı Moskvanın qəzəbinə səbəb olub. Rusiya XİN-in yüksək vəzifəli rəsmisi Mixail Kalugin də Putinin mövqeyini dəstəkləyib. Onun sözlərinə görə, Ermənistan rəhbərliyi Aİİ üzvlüyünü artıq "alternativ ittifaq axtarışında müvəqqəti dayaq nöqtəsi" kimi görə bilməz. Kalugin TASS-a müsahibəsində deyib: "Sadə dillə desək, eyni anda iki stulda oturmaq olmaz". Mirzoyan isə cavab olaraq bildirib: "Ermənistan indi oturmur, ayaqdadır, inkişaf edir və irəliləyir. Alleqoriya ilə desək, söhbət iki stuldan yox, 22 stuldan gedir".
Parlamentin sədri Alen Simonyan isə qeyd edir ki, Ermənistanın Rusiyadan ayrılmaq planı yoxdur və uşaqları paylaşmaq da planlaşdırılmır. O qeyd edib ki, ölkəsi Rusiya Federasiyası ilə münasibətləri kəsmək məqsədi güdmür. Onun sözlərinə görə, Moskva və İrəvan arasında yaranan mübahisələr tərəflərin qarşılıqlı mövqe mübadiləsi apardığı adi siyasi dialoqun bir hissəsidir. Simonyan vurğulayıb ki, Ermənistan Avrasiya İqtisadi İttifaqının tamhüquqlu üzvü olaraq qalır və bu təşkilatdan çıxmaq barədə heç bir müzakirə aparılmır. Ermənistan hökumətinin məlumatına görə, ötən il ölkənin xarici ticarətinin 35.8 faizi Rusiyanın, 11.7 faizi isə Avropa İttifaqının payına düşüb. Rusiya Cənubi Qafqaz ölkəsinin əsas ixrac bazarı olaraq qalır. Bundan başqa, Yaxın Şərqdəki müharibənin qiymətlərə təsirindən əvvəl də Ermənistana satılan Rusiya qazının qiyməti beynəlxalq bazar səviyyəsindən xeyli aşağı idi. Paşinyanın siyasi rəqibləri illərdir onun xarici siyasətini təhlükəli adlandırır və Aİ-nin real iqtisadi və təhlükəsizlik alternativləri təklif etmədiyini vurğulayırlar. Bir qismi isə iddia edir ki, Paşinyan 7 iyun parlament seçkilərində qalib gələrsə, Ermənistan Rusiyanın ağır sanksiyaları ilə üzləşəcək.
Tahir TAĞIYEV
