Abutalıb Səmədov: “Trampın Donbasla bağlı razılaşmanı inkar etməsi həqiqətə uyğun deyil”
Tramp Donbasla bağlı Putinlə hər hansı bir razılaşmanın olduğunu təkzib edib. Rusiya prezidenti Vladimir Putinlə bütün Donbasın Rusiyaya verilməsi barədə razılığa gəlib-gəlmədiyi ilə bağlı suala cavabında ABŞ prezidenti Donald Tramp bildirib ki, Putinlə onun arasında bu barədə heç bir razılaşma yoxdur. Bunu Trampın mayın 12-də Çinə yola düşməzdən əvvəl jurnalistin sualına verdiyi cavabda deyib.
Amerika prezidentinin mətbuatla söhbətinin video yazısından bir hissə X Clash Report mikrobloqunda dərc edilib. "Rusiyanın bütün Donbası almalı olduğu barədə sizinlə Putin arasında bir anlaşma varmı?" deyə jurnalist soruşur. "Xeyr", Tramp qısa cavab verir.
Halbuki, bir ildən çoxdur, deyilir ki, Putinlə Tramp Alyaskada Ukraynanın işğal olunmuş ərazilərinin Rusiyaya verilməsi məsələsində razılığa gəliblər. Üstəlik də, bu məlumat indiyə qədər təkzib olunmayıb. Trampın prezidentliyindən il yarım keçəndən sonra bir sıra proseslər baş verib, Tramp İranda uduzub və sair. Bütün bunlardan sonra Tramp indi deyir ki, yox, biz belə bir razılaşma əldə etməmişik.
Trampın aylar boyu, bir ilə yaxın bir müddət ərzində bu məsələ ilə bağlı susması və indi danışması nə ilə bağlıdır? Burada Ukraynanın göstərdiyi müqavimət öz rolunu oynadımı? Xüsusilə də Ukrayna heç bir tələblə razılaşmadı, “bir qarış torpaq belə vermərik” dedi. Belə görsənir ki, Ukraynanın dirənişi Trampın mövqeyini sındırdı. Xüsusilə Donbasın bütövlükdə Rusiyaya verilməsi ilə bağlı müqaviməti Trampın mövqeyinin dəyişməsində necə rol oynadı?
“Alyans” SAM-ın sədri Abutalıb Səmədov baki-xeber.com-a bildirdi ki, ötən ilin avqustunda Alyaskada keçirilən görüşdə sülhün şərtləri razılaşdırılıb və Rusiya bunu dəfələrlə “Ankoriç razılaşması” kimi Trampa xatırladıb. “Həmin razılaşmaya görə, Ukrayna Donbasdan tamamilə çıxmalı, Rusiya da Zaporoji və Xersonda güzəştə getməli idi. Yəni inzibati sərhədləri ilə həmin vilayətləri tələb etməməli, təmas xəttində razılığa gəlməli idi. Trampın Donbasla bağlı razılaşmanı inkar etməsi həqiqətə uyğun deyil. Çünki dəfələrlə deyilib ki, Ukrayna Donbası Rusiyaya verməlidir. Bunu təkcə Tramp deməyib. Sonuncu dəfə ABŞ-ın dövlət katibi də bu suala cavab verərkən açıq şəkildə etiraf etdi ki, ABŞ-ın Ukraynaya təhlükəsizlik təminatı verməsi üçün müharibə bitməlidir, sülh razılaşması olmalıdır. Sülh razılaşması o halda ola bilər ki, Ukrayna Donbasdan çıxsın. Yeri gəlmişkən, ötən ilin avqustundan keçən müddət ərzində onsuz da Donbasın xeyli hissəsi Rusiya tərəfindən işğal olunub. Yəni bu cür davam etsə ilin sonuna, ola bilsin, gələn ilin ortalarına qədər Rusiya Donbası tamamilə işğal edəcək. Əvəzində vəd etdiyi Sumı və Dneprpetrovskidə digər ərazilərdəki işğal olunmuş əraziləri Ukraynaya qaytarmayacaq. Son günlər Putin də, Tramp da artıq bu müharibənin sona yaxınlaşdığını deyirlər”.
A.Səmədovun sözlərinə görə, Zelenskinin torpaqları Rusiyaya verməməklə bağlı dirənişi Trampa təsir etmir, əksinə Zelenskinin özünə təzyiqlər artıb və o, razılaşmaya məcbur edilir. “Müxtəlif səs yazıları mətbuata ötürülür, Zelenskinin korrupsiya bataqlığında olduğu faktları aşkarlanır”.
A.Səmədov vurğuladı ki, Zelenskinin ofisinin keçmiş rəhbəri Yermaka qarşı cinayət işi qaldırıldı və bunun son nəticədə Zelenskiyə gəlib çatacağı heç kimdə şübhə doğurmur.
A.Səmədovun fikrincə, bütün bunları nəzərə alaraq demək olar ki, Zelenski sülhə məcbur ediləcək. “O, Donbası Rusiyaya vermək məcburiyyətində qalacaq. Dünən keçmiş mətbuat katibi hətta Zelenskini narkotik aludəçisi olduğu barədə fikirlər söyləyib, onun nə qədər qüsurlu insan olduğunu bəyan edib. Bu hücumlar bundan sonra da davam edəcək. Bir sözlə, Donbasın verilməsi məsələsində Trampın mövqeyi dəyişməyib. Zelenskiyə təzyiqlər günü-gündən artır, Rusiya Donbas istiqamətində irəliləyir və son günlər də xeyli ərazi işğal edib. Bu səbəbdən Zelenskini yaxın vaxtlarda sülh razılaşması imzalamağa yəqin ki, məcbur edəcəklər. Trampın da, Putinin də müharibənin yaxın vaxtlarda bitəcəyi barədə söylədikləri bu məsələ ilə bağlıdır”-deyə A.Səmədov bildirdi.
İradə SARIYEVA
