Arzuxan Əlizadə: “Fransa başda olmaqla Avropa ölkələrinin hansı niyyətlərinin olmasından aslı olmayaraq Azərbaycan regionda əsas söz və güc sahibidir”
Bölgədə yaranan sülhün memarı və qarantı Azərbaycandır, Azərbaycan Prezidentidir. Bütün dünya bilir ki, Cənubi Qafqazda sülh prosesinin təşəbbüskarı və əsas qüvvəsinin Azərbaycan olduğu şübhəsizdir. Ancaq çox təəssüf ki, bəzi dövlətlər, o cümlədən Fransa, eləcə də Avropa təsisatları çalışırlar ki, bölgədə sülh prosesinin əsas aparıcı qüvvəsi kimi Ermənistanı göstərsinlər. Bu məqsədlə Ermənistanda müxtəlif tədbirlərdüzənləyirlər, Avropa Siyasi Birliyinin sammiti, Aİ-Ermənistan sammiti kimi tədbirlər keçirirlər, müxtəlif ölkələrin rəhbərləri yığışıb Ermənistana gəlirlər. Burada məqsəd Ermənistanın regionda sülh prosesində əsas qüvvə olduğunu göstərmək və sübut etməkdir. Yalandan Ermənistanda konfrans, seminar keçirməklə deyil ki.
Birmənalı olaraq bu Azərbaycanın fəaliyyətidir. Onların məqsədi bölgədə sülh prosesinin əsas qüvvəsi kimi Azərbaycanı arxa plana sıxışdırmaq və bu statusu Ermənistanın adına çıxmaqdır.
Fransa və digər Avropa ölkələrinin, Avropa strukturlarının məqsədi, hədəfi nədən ibarətdir ki, belə bir yanlış təsəvvür formalaşdırmaq istəyirlər?
Millət vəkili Arzuxan Əlizadə baki-xeber.com-a bildirdi ki, Azərbaycan birmənalı olaraq regionun əsas söz sahibidir, lider dövlətidir, siyasi, iqtisadi və hərbi cəhətdən ən güclü ölkəsidir. “Biz İkinci Qarabağ savaşından sonra bu regionda dayanıqlı sülhə nail olunmasının məsuliyyətini öz üzərimizə götürmüşük. Təsadüfi deyil ki, müharibə bitəndən dərhal sonra Azərbaycan Prezidenti İlham Əliyev sülh müqaviləsinin imzalanması təklifi ilə qarşı tərəfə müraciət etdi. Uzun müddət keçməsinə baxmayaraq təəssüflər olsun ki, Ermənistan yenə də qeyri-konstruktiv mövqe sərgiləməkdə davam edirdi. Nəhayət, ötən ilin avqust ayının 8-də Vaşinqtonda bir çərçivə sülh müqaviləsi imzalandı. O dövrdən başlayaraq demək olar ki, regiona sülh gəlib. Amma təbii ki, yekun sülh müqaviləsinin imzalanması üçün də Ermənistan öz üzərinə öhtəliklər götürüb və bu öhtəliklərin yerinə yetirilməsi müqabilində dayanıqlı sülhə nail olmaq mümkün olacaq. Ermənistan Azərbaycana yönəlik ərazi iddialarından birmənalı olaraq əl çəkməlidir, delimitasiya və demarkasiya məsələsində üzərinə düşənləri etməlidir. Bir sıra digər məqamlar var ki, Ermənistan konstruktivlik nümayiş etdirməklə sülhə sadiqliyini nümayiş etdirməlidir. Yalnız ondan sonra “bölgəyə tam dayanıqlı sülh və sabitlik gəlib” demək mümkündür. O ölkələr ki, Azərbaycan ərazilərini işğalda saxladığı dövrlərdə Ermənistana havadarlıq edib, onlar bu gün də Ermənistanda revanşist qüvvələrə dəstək verməkdədirlər, bu ölkənin “bölgənin əsas dövləti olmasına çalışırlar” demək mümkün deyil. Çünki birmənalı olaraq regionun əsas dövləti Azərbaycandır.
Xüsusilə də qardaş Türkiyə ilə tandemdə Azərbaycan və Türkiyə qardaşlığı regionda rol oynamaqdır. Bunun fərqindədirlər. Onun da fərqindədirlər ki, Azərbaycan üzərindən regiona hansısa formada təsir etmək, öz maraqlarını təmin etmək mümkün deyil”.
Millət vəkili qeyd etdi ki, çünki Azərbayca müstəqil, heç kəsdən aslı olmayan siyasət yeridir, amma Ermənistan üzərindən bunu etmək mümkündür. “Bu səbəbdən Ermənistana müəyyən plarformalardan maliyyə, siyasi və sair dəstək nümayiş etdirməklə Ermənistan üzərindən regiona nüfuz etmək, öz maraqlarını təmin etmək siyasəti yürüdülür ki, bu da mümkün məsələ deyil. O ölkələr və təşkilatlar Ermənistana nə qədər dəstək versələr də istənilən halda Azərbaycan güclü tərəfdir. Sözügedən qüvvələr onun da fərqində olmalıdırlar ki, bu regionda hansısa bir layihənin reallaşması yalnız Azərbaycanın iştirakı ilə mümkündür. Azərbaycanın içində olmadığı hər hansı bir layihə regionda reallaşa bilməz. Bu reallıqdır, bu faktdır. Ona görə də Fransa başda olmaqla Avropa ölkələrinin hansı niyyətlərinin olmasından aslı olmayaraq Azərbaycan regionda əsas söz və güc sahibidir. Bundan sonrakı dönəmdə də bunu hansısa formada, güc nisbətini, balansını Ermənistanın, yaxud digər qüvvələrin xeyrinə dəyişdirmək mümkünsüzdür”-deyə A.Əlizadə qeyd etdi.
İradə SARIYEVA
