Əli Orucov: “Putin bu məsələləri Astanada gündəmə gətirəcək və erməniləri qorxutmağa çalışacaq”
Rusiya Prezidenti Vladimir Putin Ermənistanın Avropa İttifaqına mümkün üzvlüyü ilə bağlı diqqətçəkən açıqlamalar verib.
Putin İrəvanın bu məsələdə mümkün qədər tez qərar verməli olduğunu bildirib. Rusiya liderinin sözlərinə görə, bu mövzunu dəfələrlə Ermənistanın baş naziri Nikol Paşinyanla müzakirə edib: “Sadəcə olaraq nə edəcəyimizi vaxtında deməliyik. Burada xüsusi bir şey yoxdur. Hər şey hesablanmalıdır. Həm Ermənistan tərəfi, həm də biz hesablamalıyıq. Mənim fikrimcə, həm Ermənistan əhalisinə, Ermənistan vətəndaşlarına münasibətdə, həm də əsas iqtisadi tərəfdaş kimi bizə münasibətdə mümkün qədər tez qərar vermək düzgün olardı. Məsələn, referendum keçirə bilərlər. Bundan sonra biz də nəticə çıxarar və qarşılıqlı faydalı, yumşaq və mədəni şəkildə yollarımızı ayırarıq”.
Rusiya lideri, həmçinin, Ermənistanın Avropa İttifaqı (Aİ) ilə bağlı ambisiyalarının gələcəkdə Avrasiya İqtisadi İttifaqının (Aİİ) sammitlərindən birində müzakirə olunmasını da təklif edib. Eyni çıxışda Putin Ermənistanın Avropaya inteqrasiya cəhdləri ilə Rusiyanın Ukraynaya qarşı təcavüzündən əvvəl baş verən hadisələr arasında paralellər aparıb: “İndi hər şey Ukrayna ssenarisi istiqamətində cərəyan edir. Bəs bütün bunlar haradan başladı? Ukraynanın Aİ-yə qoşulması və ya qoşulmağa cəhd etməsindən”.
Ermənistan xarici işlər naziri Ararat Mirzoyan Putinə cavab olaraq erməni jurnalistlərə bildirib ki, ölkəsi Aİ üzvlüyü ilə bağlı "münasib vaxtda" qərar verəcək: “Biz həmişə demişik ki, vaxt gələndə, Ermənistanın Aİİ ilə Aİ arasında seçim etməli olduğunu anlayanda, həmin seçim ediləcək. Burada yeni heç nə yoxdur. Hazırda biz Aİİ-nin üzvüyük, fəaliyyətimizi orada davam etdiririk, lakin Ermənistan xalqının Avropayönümlü istəklərinin olması sirr deyil”.
Qeyd edək ki, Ali Avrasiya İqtisadi Şurasının (AİİŞ) Aİİ dövlət başçıları səviyyəsində növbəti iclası 28-29 may 2026-cı il tarixlərində Qazaxıstanın paytaxtı Astanada keçiriləcək.
Diqqəti çəkən məqam odur ki, Putin sözügedən məsələni seçkiyə bir neçə gün qalmış Aİİ-nin Qazaxıstanda keçirilən tədbirində gündəmə gətirməyə çalışır. Yəni bununla həm Paşinyana təzyiq etmək istəyir, həm də qarşıdakı seçkilərdə seçicilərin mövqeyinə təsir etməyə çalışır. Görünən odur ki, Putin Paşinyana qarşı iki zərbə hazırlayır. Bir referendum, bir də sammitdə Aİ-yə üzvlük məsələsinin müzakirəsi. Bir sözlə, tədbirdə Ermənistanın Aİ-yə üzvlük və referendum məsələsi müzakirə oluna bilər?
Sözügedən məsələni baki-xeber.com-a şərh edən AMİP funksioneri Əli Orucov prinsipcə, bunu istisna etmədi: “Putinin məqsədyönlü şəkildə bunu qabartması təsadüfü deyil. Məgər Putin bilmir ki, Ermənistanın yaxın perspektivdə Avropa İttifaqına üzvlüyündən söhbət belə gedə bilməz? Çox yaxşı bilir. Sadəcə indi bunu məqsədyönlü şəkildə gündəmə gətirir ki, Ermənistanda ictimai rəyə bilavasitə təsir etsin. Çox güman ki, Putin bu məsələləri Astanada gündəmə gətirəcək və erməniləri qorxutmağa çalışacaq. Ermənistanın istehsal etdiyi məhsulların 35-40 faizi Rusiya bazarına ixrac olunur. Fikrimcə, Putin bunu dayandırmaqla qısa müddətdə cəmiyyəti Paşinyana qarşı qaldırmaq məqsədi güdür. Sadə erməni fermerini Makronun İrəvan küçələrində gəzməyi, çıxışı maraqlandırmır. Onları maraqlandıran məhsulun satış bazarıdır. Kəşfiyyatçı olan Putin bütün bunların fərqində olduğu üçün bu yolla Paşinyanı küncə sıxışdırmağa çalışır. Yoxsa niyə məhz indi bu məsələni qabartsın ki?”.
Vidadi ORDAHALLI
