Hakim partiyanın baş nazirliyə namizədi Nikol Paşinyan sosial mediada hərbi parad məşqinin videosunu paylaşıb. O, dronların nümayiş olunduğu son görüntüləri "Ermənistanda istehsal olunub" başlığı ilə paylaşıb. Videoda, xüsusən də hərbi pikap yük maşınına quraşdırılmış Ermənistanın yeni Dev-3 dronu nümayiş olunur. Ermənistanın müdafiə naziri Suren Papikyan da parad məşqindən video yayımlayıb. Videoda Fransanın ən azı iki “Sezar” özüyeriyən haubitsası görünür. Bu, “Sezar”ın Ermənistana çatdırılmasının ilk rəsmi təsdiqidir. 6 may 2026-cı ildə Ermənistan və Fransa arasında müdafiə sektorunda uzunmüddətli sənaye əməkdaşlığı da daxil olmaqla, strateji müdafiə tərəfdaşlığı haqqında birgə bəyannamə imzalanıb. Ermənistana altı “Airbus Helikopters H145” çoxməqsədli helikopterinin tədarükü üçün müqavilə təsdiqlənib. Fransanın müdafiə naziri fransız təlimatçıların Ermənistan hərbi personalının təlimində iştirak etdiyini vurğulayıb.
Xatırladaq ki, İrəvanda hərbi paradın mayın 28-də keçirilməsi planlaşdırılır. Ermənistan paytaxtında sonuncu dəfə belə bir tədbir 2016-cı ilin sentyabrında keçirilib. Bunlar fonunda Ermənistanın ikinci prezidenti və baş nazirliyə namizəd Robert Köçəryan İcevan sakinləri ilə görüşdə bildirib: “Su-30SM qırıcı təyyarələri ilə bağlı dərs kifayət olmadı; Ermənistan hakimiyyəti yenidən istifadə edə bilməyəcəkləri silahlar alır”. O qeyd edib ki, hakimiyyət 28 mayda parad və silah nümayişi elan etməklə ictimaiyyətin gözündən pərdə asmağa çalışır. O xatırladıb ki, dünyanın universal təhlükəsizlik sistemi var: müasir, döyüşə hazır ordu, güclü lider və güclü müttəfiq: “Niyə onlar 44 günlük müharibədə uduzdular? Çünki bu vacib şərtlər pozuldu: 2018-ci ildən bəri ordu məhv edilmişdi, Nikol Paşinyan rüsvayçı bir liderdir, o, pulemyotuna maqazin belə bağlaya bilmirdi, müttəfiqi ilə münasibətləri pozuldu. Nəticə xalq üçün son dərəcə çətin oldu və xalq bunun bədəlini itkilər, yaralılar və ərazi itkiləri ilə ödədi. Bütün bu cəfəngiyatın müəllifi isə bonus aldı, 2021-ci ildə yenidən baş nazir seçildi və hətta Qarabağın Azərbaycan ərazisi olduğuna qərar verdi”. Köçəryanın sözlərinə görə, eyni “səhvlər” bu gün də edilir. "Bu şəxs ya təcrübədən heç nə öyrənmir, ya da bunlar qəsdən edilən hərəkətlərdir. Bunun başqa izahı yoxdur". Onun sözlərinə görə, yararsız Su-30SM-lərin alınmasına xərclənən məbləğ hava hücumundan müdafiə sistemlərinin alınmasına sərf edilə bilərdi: “Eyni zamanda, onlar heç bir raket almadılar və Su-30SM-lər bir dənə də olsun döyüş tapşırığını yerinə yetirmədi. Bu, heç kimin məsuliyyət daşımadığı bir rüsvayçılıqdır. Əgər onlar hava hücumundan müdafiə sistemləri alsaydılar, “Bayraktar” məsələsi həll olunardı və müharibənin nəticəsi fərqli olardı. Biz müharibəni dronlara uduzduq”. Onun sözlərinə görə, nümayiş olunan görüntülərə əsasən, hakimiyyət yenidən müharibə vəziyyətində istifadə edə bilməyəcəkləri silahlar alır. “Allah eləməsin ki, biz bunu etməyə məcbur olaq. Fransız artilleriyası yaxşıdır, amma mərmisiz artilleriya sadəcə metaldır. Sual budur: lazım gələrsə, onları Fransadan Ermənistana necə daşıyacaqsınız? 44 günlük müharibə zamanı yalnız İran sərhədi və hava məkanı bu cür yüklər üçün açıq idi. Gürcüstan bağlanmışdı. İran ətrafında baş verənlər bu marşrutun da bağlanacağını göstərir. Nə edəcəksiniz? Xəritəyə baxırsınız? Bu niyə edilir?”.
Tahir TAĞIYEV
