Tofiq Abbasov: "Türkiyə heç vaxt imkan verməyəcək ki, bu təşəbbüsü ələ keçirsinlər"
Türkiyə və Yunanıstan arasındakı münasibətlər hazırda həm gərginliklərin, həm də diplomatik yaxınlaşma cəhdlərinin paralel getdiyi bir mərhələdədir. Tərəflər Egey dənizindəki ərazi suları, hava məkanı, adaların hərbsizləşdirilməsi və Aralıq dənizindəki enerji resursları kimi köklü məsələlərdə hələ də ortaq məxrəcə gələ bilməyiblər. Buna baxmayaraq, son dövrlərdə hər iki ölkə rəhbərliyi dialoq kanallarını açıq saxlamağa və iqtisadi əməkdaşlığı ön plana çıxarmağa çalışır. Tammiqyaslı müharibə ehtimalı aşağı hesab olunur, çünki hər iki ölkənin NATO üzvü olması və belə bir münaqişənin həm regional sabitliyə, həm də ölkələrin daxili iqtisadiyyatına vuracağı böyük zərər tərəfləri daha təmkinli davranmağa sövq edir. Beynəlxalq güclərin, xüsusən də ABŞ və Avropa İttifaqının vasitəçilik səyləri də toqquşma riskini azaldan mühüm amillərdən biridir. Beləliklə, yaxın gələcəkdə münasibətlərin böyük bir müharibədən ziyadə, zaman-zaman artan ritorik gərginliklər və çətin keçən diplomatik danışıqlar müstəvisində davam edəcəyi gözlənilir.
Avrasiya məkanında geosiyasi düzənin dəyişdiyini bildirən politoloq Tofiq Abbasov hesab edir ki, bölgədə yeni qarşıdurma xətləri formalaşdırılmağa çalışılır. Onun sözlərinə görə, bəzi qüvvələr İran və Türkiyəni üz-üzə qoymağa cəhd etsələr də, Ankara məsələyə rasional yanaşaraq gərginliyin böyüməsinin qarşısını alıb.
Politoloq "Bakı-Xəbər" qəzetinə açıqlamasında bildirib ki, son dövrlərdə İsrail, Yunanıstan və Cənubi Kipr arasında yeni siyasi-hərbi xətt formalaşır və bu proses ABŞ himayəsində həyata keçirilir. O qeyd edib ki, bölgədə Türkiyəyə qarşı balans yaratmaq cəhdləri müşahidə olunur.
Tofiq Abbasovun fikrincə, İsrailin Baş naziri Benjamin Netanyahu daxili siyasi təzyiqlər fonunda münaqişələrin genişlənməsində maraqlı görünür. Politoloq hesab edir ki, Netanyahu regional qarşıdurmaların sayını artırmaqla həm siyasi mövqeyini qorumağa, həm də məhkəmə proseslərini arxa plana keçirməyə çalışır.
Ekspert bildirib ki, Türkiyə bölgədə hərbi və texnoloji imkanlarını sürətlə gücləndirir. O, xüsusilə Türkiyənin raket texnologiyalarında irəliləyiş əldə etdiyini və bunun regional güc balansına təsir etdiyini vurğulayıb.
Tofiq Abbasov hesab edir ki, bəzi dairələr müsəlman ölkələrini müxtəlif cəbhələrdə qarşı-qarşıya gətirməyə çalışır. Bununla belə, o düşünür ki, Ankara diplomatik vasitələrlə bu cəhdlərin qarşısını almağa üstünlük verəcək.
Akif NƏSİRLİ
