Ceyhun Məmmədov: “...Anlamalıdırlar ki, Azərbaycana qarşı istənilən təxribat çox sərt şəkildə cavablandırılacaq”
Prezident İlham Əliyev Zəngilanda ilk yaşayış kompleksinə köçən ailələrlə görüşü zamanı Fransa və bu ölkənin prezidenti Emmanuel Makron barədə fikirlər səsləndirib. Azərbaycan Prezidenti xüsusilə Fransanın Ermənistan-Azərbaycan münasibətlərində tutduğu mövqeyə və rəsmi Parisin bölgədə oynamağa çalışdığı rola toxunub.
Prezident İlham Əliyev bildirib: “Bu gün biz sülh şəraitində yaşayırıq və sülhün müəllifi də bizik. Biz istəməsəydik, sülh olmayacaqdı. Biz istəsəydik, istənilən hərbi əməliyyatı istənilən yerdə keçirə bilərdik. Bunu Ermənistan rəhbərliyi də bilir, onun arxasında duranlar da bilirlər. Nə qədər onun arxasında dururlar dursunlar, bilirlər ki, bizim gücümüzə qarşı onların heç bir şansı yoxdur, onlar acizdirlər. Gücləri var idisə, elə 2020-ci ildə kömək edərdilər də Ermənistana. Bu gün Ermənistana gəlib özünü saxta qəhrəman kimi göstərən bəzi xarici liderlər 2020-ci ildə elə həmin liderlər idi də öz ölkələrində hakimiyyət başında, gəlib yiyə duraydılar da Ermənistana. Boşboğazlıqdan başqa heç nə yoxdur. Onların da işi-gücü boşboğazlıqdır, ona görə öz ölkələrində onların dəstək əmsalı 10-15 faizdir. İndi guya ki, Ermənistanı bizim əlimizdən onlar çıxarıb xilas ediblər. Bizim Ermənistanı məhv etmək niyyətimiz yox idi, Ermənistanın müstəqilliyini onun əlindən almaq niyyətimiz yox idi. Bu gün hələ də Azərbaycan-Ermənistan sərhədində Avropanın dırnaqarası müşahidəçiləri guya ki, keşik çəkirlər. Mən o vaxt da demişəm, biz bir dənə güllə atsaq, onların dabanları parlayacaq, heç izi-tozu da qalmayacaq orada. Amma özlərini belə göstərirlər, guya ki, onlar Ermənistanı bizdən qoruyurlar. Bizdən Ermənistanı qorumaq lazım deyil. Biz istədiyimizə nail olmuşuq. Özünü Ermənistandakı bu tədbirdə yenə də yalançı qəhrəman kimi göstərmək ki, guya onlar Azərbaycanın qabağını alıblar, yoxsa bu aqressiv, təcavüzkar Azərbaycan Ermənistanı məhv edəcəkdi, hamısı cəfəngiyyatdır. Bizim belə niyyətimiz olmayıb, yoxdur və olmayacaq, əgər bizə qarşı yenidən təxribat törədilməsə. Ancaq biz bilirik ki, Ermənistanın siyasi müstəvisində Azərbaycan xalqına, dövlətinə nifrətlə yaşayan kifayət qədər dairələr var və onlar hakimiyyətə gəlsə, bax, o zaman Ermənistan xalqının başı dərddə olacaq".
Zəngilan səfərində Prezident İlham Əliyevin Fransaya və bu ölkənin prezidenti Makrona verdiyi mesajların çox mühüm əhəmiyyəti olduğunu deyən millət vəkili Ceyhun Məmmədov baki-xeber.com-a bildirdi ki,
bu uzun illərdir Fransanın yürütdüyü neokolonializm siyasətini bir daha ifşa etdi. C.Məmmədov qeyd etdi ki, neokolonializm siyasətinin Qafqaza doğru uzanmasında Fransa Ermənistandan alət kimi istifadə edir.
Zəngilandakı çıxışında Prezident İlham Əliyevin Fransaya və Makrona ünvanladığı mesajdan bölgəmizdə sülhə zərbə vurmaqdan əl çəkmək istəməyən Makron və onun kimiləri dərs götürməli, qarışdırıcılıqdan əl çəkməlidir.
C.Məmmədov onu da vurğuladı ki, Makron dünyada və ölkəsində ən nüfuzsuz prezident kimi tanınır. Millət vəkilinin sözlərinə görə, Makronun öz ölkəsində reytinqi çox aşağı səviyyədədir və hətta o dərəcədə ki, qeyri legitim ölkə başçısı hesab oluna bilər.
C.Məmmədov vurğuladı ki, Prezident İlham Əliyevin çıxışı Azərbaycanın bölgədə sülh istəyən tərəf olduğunu bir daha nümayiş etdirdi: “Azərbaycan müharibəni bitirib və regionda davamlı sülhün tərəfdarıdır. Dövlət başçısının dediyi kimi, əgər Azərbaycan istəməsəydi, bölgədə sülhdən danışmaq mümkün olmazdı. Bu gün bəzi xarici dairələr, xüsusilə Fransa Prezidenti Emmanuel Makron populist bəyanatlarla Ermənistanı müdafiə etməyə çalışır. Halbuki 2020-ci ildə Ermənistan ağır məğlubiyyətə uğrayanda həmin dairələr heç nə edə bilmədilər. Bu gün sərhəddə yerləşdirilən dırnaqarası Avropa müşahidəçiləri də vəziyyəti sabitləşdirmək yox, əksinə, gərginliyi artırmaq məqsədi daşıyır. “Binokl diplomatiyası” qəbuledilməzdir. Ermənistan və onun havadarları anlamalıdırlar ki, Azərbaycana qarşı istənilən təxribat çox sərt şəkildə cavablandırılacaq”.
İradə SARIYEVA
