Tural İsmayılov: “Həmsədrlərin və Ermənistanın bu uydurma termini dövriyyəyə daxil etməkdə yeganə məqsədi...”
Prezident İlham Əliyevin mayın 10-da Zəngilanda ilk sakinlərlə görüşü zamanı ATƏT-in artıq tarixə qovuşmuş Minsk Qrupunun yarıtmaz fəaliyyətindən də danışıb. Hər üç həmsədr təkrarlayırdı ki münaqişənin hərbi həlli yoxdur. Hətta iş o yerə çatmışdı ki, beynəlxalq hüququ bir kənara qoyub "Şimali Qarabağ" kimi uydurma terminlərlə işğalçıya yol açır, öz torpağını azad etmək istəyən Azərbaycanı az qala təcavüzkar kimi qələmə verirdilər.
Həmsədrlər Ermənistanla birlikdə "Şimali Qarabağ" termini işlədirdilər. Bunu nə məqsədlə edirdilər?
Politoloq Tural İsmayılov baki-xeber.com-a bildirdi ki, Prezident İlham Əliyevin Zəngilan səfəri zamanı ATƏT-in Minsk qrupunun vaxtilə işlətdiyi uydurma "Şimali Qarabağ" termini ilə bağlı ifşaları, Azərbaycan liderinin diplomatik masada necə bir məkrli şəbəkəyə qarşı təkbaşına mübarizə apardığını növbəti dəfə sübut etdi: “Dövlət başçısının bu cəsarətli açıqlaması illərlə beynəlxalq vasitəçilik adı altında erməni işğalına hüquqi don geyindirməyə çalışan mərkəzlərin maskasını yırtıb atdı. Həmsədrlərin və Ermənistanın bu uydurma termini dövriyyəyə daxil etməkdə yeganə məqsədi Azərbaycanın tarixi ərazilərini süni şəkildə parçalamaq, işğal olunmuş torpaqların bir qismini "mübahisəli" statusa salmaqla faktiki ilhaq prosesini legitimləşdirmək idi. Bu, beynəlxalq hüququ bir kənara ataraq ədaləti işğalçıya qurban vermək cəhdi, Azərbaycanın öz ərazi bütövlüyünü bərpa etmək naminə atacağı hər bir addımı qabaqcadan "təcavüz" kimi qələmə vermək üçün hazırlanmış məkrli bir siyasi tələ idi.
Lakin Müzəffər Lider İlham Əliyev öz uzaqgörən siyasəti, polad iradəsi və dərin tarixi biliyi ilə bu çirkin ssenarilərin hamısını darmadağın etdi”.
T.İsmayılovun fikrincə, Prezident bu səfəri ilə bir daha dünyaya nümayiş etdirdi ki, heç bir saxta termin, heç bir xarici təzyiq Azərbaycanın milli maraqlarından geri addım atmasına nail ola bilməzdi. “Həmsədrlərin illərlə gizli saxladığı bu diplomatik oyunların bu gün dövlət başçısı tərəfindən uca səslə ifşa olunması, Azərbaycanın qazandığı Zəfərin təkcə döyüş meydanında deyil, həm də dünya diplomatiya tarixində misilsiz bir qələbə olduğunu təsdiqləyir. Prezident İlham Əliyev sübut etdi ki, əsl lider xalqının haqq səsini boğmaq istəyən qlobal güclərə qarşı milli qüruru və beynəlxalq hüququ sipər edərək qalib gələn dühadır”-deyə T.İsmayılov qeyd etdi.
İradə SARIYEVA
