Məhərrəm Zülfüqarlı: “Bu, ancaq 7 iyun seçkilərində qələbədən və Rusiyanın caynağı çəkiləndən sonra mümkün olacaq”
Azərbaycanla bir-birimiz üçün yolları tam açmağımız, eyni zamanda, Türkiyə ilə sərhədlərin açılması çox vacibdir və bunun baş verəcəyinə heç bir şübhəm yoxdur. Bunu Ermənistan baş naziri Nikol Paşinyan İrəvanda keçirilən Ermənistan-Aİ sammitinin yekunları ilə bağlı Avropa İttifaqı Şurasının Prezidenti Antonio Koşta və Avropa Komissiyasının Prezidenti Ursula von der Leyenlə birgə brifinqində deyib.
Baş nazir bildirib ki, kommunikasiyaların tam açılması insanların və yüklərin sərbəst hərəkəti, eləcə də ticarətin inkişafı baxımından vacibdir və bu baxımdan müvafiq sahələr üzrə əməkdaşlığa dair müqavilələrin bağlanması lazım gələcək: “Məsələn, nəqliyyat sahəsində biz artıq bu gün hər hansı ayrıca saziş olmadan əməkdaşlıq edirik. Əlbəttə ki, yolları bir-birimiz üçün tam açmağımız, eyni zamanda, Türkiyə ilə sərhədin açılması son dərəcə vacibdir. Bunun baş verəcəyinə isə mənim heç bir şübhəm yoxdur”.
Paşinyanın açıqlaması həm də o deməkdir ki, hansısa vasitəçi olmadan iki dövlət anlaşa bilir və problemləri həll etməyi bacarır. Bunun nəticəsidir ki, iki ölkə arasında diplomatik təmsilçilər olmadan sərhədlər delimitasiya edilir, Azərbaycan üzərindən yüklər daşınır, Ermənistana neft ixrac edilir və s.
Sözügedən məsələni baki-xeber.com-a şərh edən tarix elmləri doktoru, professor Məhərrəm Zülfüqarlının fikrincə, İrəvanda keçirilən Ermənistan-Avropa sammitində edilən çıxışlar, əvvəlki mövqelərin davamıdır: “Yəni Paşinyan 44 günlük Vətən müharibəsindən sonra, 2023-cü ilin sentyabrında keçirilən bir günlük antiterror əməliyyatlarından sonra siyasi kursunu dəyişdi. Bütün bunlardan sonra həmin tədbiri Paşinyanın yeritdiyi siyasətin davamı kimi qiymətləndirmək olar. Çünki artıq Paşinyan başa düşdü ki, erməni xalqı tarixən Rusiyanın əlində oyuncaq olub və indi də bu, belədir. Qafqazda öz mövqelərini möhkəmləndirmək, imperiya siyasətini yeritmək üçün Rusiya Ermənistandan indi də bir vasitə kimi istifadə edir. Buna son qoymaq üçün siyasəti tamamilə dəyişib. 2019-cu ilin avqustunda “Qarabağ Ermənistandır” deyən Paşinyan, müharibədən sonra Qarabağın Azərbaycan ərazisi olduğunu təsdiqlədi. İlk dəfə bunu 2022-ci ilin oktyabrında Praqada bəyan etdi. Daha sonra 2023-cü ilin mayında Brüsseldə bunu təkrarladı. Ondan sonra da bunu dəfələrlə bəyan edib. İrəvanda Paşinyanın səsləndirdiyi fikirlər də bunun davamıdır. Bəli, o da bir reallıqdır ki, Azərbaycanla Ermənistan arasında keçirilən birbaşa danışıqlar daha səmərəli olub, nəinki vasitəçilərin iştirakı ilə keçirilən danışıqlar. Çünki vasitəçilər öz maraqlarından çıxış etdikləri üçün buna şərait yaratmırdılar. O da məlumdur ki, gələn ay Ermənistanda parlament seçkiləri keçiriləcək. Paşinyan əmindir ki, qalib gələcək. Ona görə belə əminliklə bəyan edir ki, Azərbaycanla Türkiyə arasında əlaqələr, əməkdaşlıq daha sıx səviyyəyə keçəcək. Kənardan müşahidələr göstərir ki, bu, ancaq 7 iyun seçkilərində qələbədən və Rusiyanın Ermənistandan caynağı çəkiləndən sonra mümkün olacaq. Problem ondadır ki, Rusiya Ermənistanda öz tərəfdarlarını hərtərəfli dəstəkləyir. Orada olan təsir vasitələrini işə salır. O üzdən, arzu edilən odur ki, 7 iyun seçkilərində Paşinyanın bloku yekdilliklə qələbə qazansın. Moskvanın nəzərdə tutduğu planlar pozulsun. Nəticədə Cənubi Qafqazda dayanıqlı sülh və sabitlik bərqərar olsun”.
Vidadi ORDAHALLI
