Arzuxan Əlizadə: “Ermənidən çox ermənilik edən bu Avropa qurumları faktiki olaraq bölgədə yeni münaqişə ocaqları yaratma istəyir”
Prezident İlham Əliyev “Avropa Siyasi Birliyi”nin 8-ci Zirvə toplantısında videobağlantı formatında çıxışında bildirib ki, Ermənistan-Azərbaycan sülh prosesində Avropa Komissiyası xaric heç də bütün Avropa təsisatları eyni yanaşmanı sərgiləmir:
“Həm Ermənistan, həm Azərbaycan sülhün əyani nəticələrini artıq görürlər. Bu fürsətdən istifadə edərək, mən Ermənistan-Azərbaycan sülh prosesində tutduğu mövqeyə görə Avropa Komissiyasına təşəkkürümü bildirmək istəyirəm. Lakin əfsuslar olsun ki, heç də bütün Avropa təsisatları eyni yanaşmanı sərgiləmir. Onlardan biri Avropa Parlamenti, digəri isə Avropa Şurası Parlament Assambleyasıdır (AŞPA). Azərbaycan 2001-ci ilin yanvarından Avropa Şurasının üzvüdür. Yeri gəlmişkən, mən o vaxt parlament üzvü və Azərbaycanın nümayəndə heyətinin rəhbəri kimi AŞPA-nın fəal üzvlərindən biri idim. Nümayəndə heyətimizə 2024-cü ilin yanvarına qədər Avropa Şurasında heç zaman məhdudiyyətlər tətbiq edilməmişdi. 2023-cü ilin sentyabrında Azərbaycan Qarabağda separatçılığa son qoydu. Biz BMT Təhlükəsizlik Şurasının 1993-cü ildə qəbul etdiyi və 30 il kağız üzərində qalan 4 qətnaməsini özümüz icra etdik. Dörd ay sonra AŞPA nümayəndə heyətimizə sanksiyalar tətbiq etdi. Əfsuslar olsun ki, ikili standartlar bu gün sanki AŞPA-nın iş təlimatıdır. Azərbaycanın ərazi bütövlüyü istənilən digər ölkənin ərazi bütövlüyü qədər eyni dəyərə malikdir. Bu məsələdə ikili standartlar qəbuledilməzdir”.
Sözügedən məsələni baki-xeber.com-a şərh edən AMİP sədri, millət vəkili Arzuxan Əlizadənin fikrincə, Avropa İttifaqının bir sıra təsisatları Azərbaycana münasibətdə riyakar mövqedən çıxış edirlər: “Azərbaycan əraziləri 30 il ərzində işğal altında idi. Bu işğal dövründə təəssüflər olsun ki, Avropa institutları, istər Avropa Şurası Parlament Assambleyası, istər Avropa Parlamenti, istərsə də digər qurumlar ölkəmizin ərazi bütövlüyü və suverenliyinin bərpası istiqamətində ciddi addımlar atmayıblar. Heç buna təşəbbüs də göstərməyiblər. 2001-ci ildə Azərbaycan və Ermənistan eyni vaxtda Avropa Şurasına üzv qəbul olunublar. Lakin ötən dövr ərzində Avropa Şurası Parlament Assambleyasının bir üzvü AŞPA-nın digər üzvünün ərazilərini işğal altında saxlayıb. Bu fakt qarşısında isə effektiv reaksiya verilməyib və Ermənistana qarşı hər hansı sanksiya tətbiq olunmayıb. Ancaq Azərbaycan 2023-cü ildə öz gücü ilə ərazi bütövlüyünü və suverenliyini tam bərpa edir. Faktiki olaraq beynəlxalq hüququn norma və prinsiplərini təmin edir, BMT qətnamələrini icra edir. Buna baxmayaraq, bəzi Avropa qurumları tərəfindən Azərbaycana qarşı qərəzli mövqe sərgilənir. İşğalçı tərəfə heç bir söz deməyən AŞPA işğala məruz qalan, öz hüquqlarını, ərazi bütövlüyü və suverenliyini və beynəlxalq hüququ bərpa edən tərəfə qərəzli yanaşır. Aydın məsələdir ki, Azərbaycan buna heç bir halda biganə qala bilməzdi. Məhz bu səbəbdən, həmin dövrdən etibarən Azərbaycan nümayəndə heyəti AŞPA-da fəaliyyətini dondurdu. Bu addım Azərbaycana qarşı qərəzli mövqe aradan qalxanadək qüvvədə saxlanıldı. Təəssüflər olsun ki, ikili standartlar siyasəti ilə üz-üzəyik. Sülh və sabitliyə dəstək vermək əvəzinə, ermənidən çox ermənilik edən bu Avropa qurumları faktiki olaraq bölgədə yeni münaqişə ocaqları yaratmağa istiqamətlənmiş addımlar atırlar. Sülhə və sabitliyə mane ola biləcək mövqe sərgiləyirlər ki, bu da qəbuledilməzdir”.
Vidadi ORDAHALLI
