Abutalıb Səmədov: “Sammitin Rusiyada çox ciddi narazılıqla qarşılanmasının bir səbəbi də...”
Rusiya mediası Ermənistanda keçirilən Aİ sammitlərini İrəvanla Moskva arasındakı münasibətlərə ciddi zərbə kimi qiymətləndirir. Belə ki. Rusiya mətbuatı İrəvanda keçirilən Aİ sammitlərini, xüsusən də Ukrayna prezidenti Volodimir Zelenskinin səfərini diqqətdən kənarda qoymayıb. Bəzi Rusiya media orqanları bu hadisələri Ermənistan-Rusiya münasibətlərinə ciddi zərbə kimi qiymətləndirir.
Xüsusilə, "Svobodnaya Pressa" yazır: "Hazırda müttəfiq münasibətlərinin qalıqlarının son və dönməz şəkildə sökülməsi İrəvanda baş verir. Zelenski Avropa Siyasi Birliyinin sammiti üçün İrəvana gəlib." "Zelenski İrəvanda: Paşinyandan çox şey əldə edə bilməyəcəksiniz, amma "isti yoldaşlıq"da Qafqaz dağlarından Moskvaya yumruğunuzu sıxa bilərsiniz" başlıqlı məqalədə qeyd olunur: "Baş verənlərin sürrealizmini nəzərə alın: bütün "Qərb şahinləri" hələ də formal olaraq Rusiyanın müttəfiqi və nominal olaraq KTMT üzvü olan bir ölkənin ərazisinə paraşütlə tullanıblar."
Kir Starmer, Emmanuel Makron, Ursula fon der Leyen, Kaja Kallas və Rusiyaya qarşı müharibənin digər sponsorları Rusiyanın 102-ci hava bazasından cəmi 90 kilometr aralıda yerləşən İrəvanda toplaşaraq Ukraynanı silahlarla daha effektiv şəkildə necə təmin etmək və Rusiyanı regiondan sıxışdıraraq "sabitlik yaratmaq" barədə müzakirələr aparıblar.
Nəşrin müəlliflərinə görə, "Nikol Paşinyan üçün Brüsseldən Ermənistan-AB sammiti şəklində seçki bonusu almaq çox vacibdir. Əgər Zelenskinin iştirakı olmasaydı, bu tədbir bu qədər zəhərli olmazdı və bu, tədbirin mənasını tamamilə dəyişir".
Rusiyalı deputat Aleksandr Tolmaçev Gazeta.Ru-ya verdiyi müsahibədə bildirib:
"Ermənistan səhv tarixi seçim edərsə, Ukraynanın taleyini təkrarlaya bilər. Qonşu ölkə Avropa süfrəsində yemək kimi xidmət etmək riski ilə üzləşir", - deyə o qeyd edib.
Yəni Rusiya mediasında bu kimi fikirlər yer alır. Bir sözlə, Rusiya mediası Ermənistanda keçirilən sammiti çox aqressiv qarşıladı. Niyə belə aqressiv qarşıladı?
“Alyans” SAM-ın sədri Abutalıb Səmədov baki-xeber.com-a bildirdi ki, Ermənistanda keçirilən Avropa Siyasi Birliyinin sammitinin belə narazılıqla qarşılanmasında əslinə qalsa qeyri-adi heç nə yoxdur. “Bu barədə Putin də Kremldə görüş zamanı Paşinyana xəbərdarlıq etmişdi və Avropa Birliyinə yaxınlaşmanın qəbulolunmaz olduğunu söyləmişdi. Əslinə qalsa, sammit açıq şəkildə göstərdi ki, Ermənistan Avropa Birliyinə üzv olmaq xəttini birmənalı şəkildə seçib və əgər bir ay sonra keçiriləcək parlament seçkilərində Paşinyan qalib gəlsə daha kəskin addımlar atılacaq. Bu da təbiidir ki, Rusiyanın Cənubi Qafqazda təsirinin son dərəcə azalmasına gətirib çıxaracaq. Digər tərəfdən, Zelenskinin bu tədbirdə iştirakı və orada səsləndirilən bəyanatlar Rusiyanı ciddi şəkildə narazı saldı. 4 ildir davam edən müharibə və bu müharibədə Ukraynaya ciddi yardım göstərən Avropa Rusiya hərbi bazasının 90 kilometrliyində toplanıb Ukraynaya göstəriləcək yardımlardan danışılıb. Bu da təbii ki, Rusiya üçün xoş olmayan bir məsələdir. Sammitin Rusiyada çox ciddi narazılıqla qarşılanmasının bir səbəbi də bu nümunənin digər MDB respublikalarına keçməsi təhlükəsizidir”.
A.Səmədovun sözlərinə görə, 2028-ci ildə Avropa Siyasi Birliyinin növbəti sammiti Azərbaycanda keçiriləcək və bu addımlar digər MDB dövlətlərini Rusiyadan uzaqlaşmağa həvəsləndirə bilər ki, bu da Rusiyanı həddindən artıq narahat edir, qorxudur. “Rusiya mətbuatının bu münasibəti bir daha göstərir ki, seçkilərə qalan bir ayda qələbə uğrunda mübarizə son dərəcə kəskinləşəcək və Rusiya özünə yaxın olan partiyaların qalib gələməsi üçün qanuni və qanuna zidd olan hər şeyi edəcək”-deyə A.Səmədov bildirdi.
İradə SARIYEVA
