Son günlərdə ölkədə diqqət mərkəzində yer alan məsələlərdən biri də Gömrük Məcəlləsinə edilən dəyişikliklərdir. Belə hesab edilir ki, Gömrük Məcəlləsinə edilən dəyişikliklər iqtisadi artımı dəstəkləyəcək, beynəlxalq ticarət siyasətini ölkəmizdə inkişaf etdirəcək. Dövlət Gömrük Komitəsinin sədri Şahin Bağırov bu xüsusda qeyd edir: "Gömrük Məcəlləsi bir neçə il bundan əvvəl qəbul edilib. Dünya dəyişdikcə, yeni proseslər beynəlxalq ticarətdə və ümumiyyətlə iqtisadi mühitdə tətbiq olunduqca, bu və digər qanunlarda müəyyən dəyişikliklərin və təkmilləşdirilmənin edilməsi zərurəti yaranır. Bu aspektdən Məcəlləyə dəyişikliklər edilməsi zərurəti var. Məcəllənin əsas hədəfi biznesə dəstək göstərmək, hədəf sahibkarlıq sahəsini genişləndirmək, eyni zamanda gömrük orqanlarının fəaliyyətini tənzimləməkdir. Müxtəlif prosedurlarda ölkəmizə idxal edilən, müxtəlif anbarlarda, gömrük zonalarında, sərbəst iqtisadi zonada saxlanılan yüklər üzərində müxtəlif dövrdə müəyyən əməliyyatların həyata keçirilməsi zərurəti yaranır. Bu nöqtəyi-nəzərdən burada dəqiqliyə ehtiyac var. Yeni layihədə hansı əməliyyatların həyata keçirilməsi, qablaşdırma, çeşidləmə, digər imkanlar daha dəqiq təsvir olunub".
O da məlumdur ki, gömrük daşıyıcısı ola biləcək şəxslərin əhatə dairəsi genişləndiriləcək. Hazırda qüvvədə olan qanunvericiliyə görə, qanunvericiliyə uyğun olaraq yaradılmış və müvafiq icra hakimiyyəti orqanından gömrük daşıyıcısı fəaliyyətini həyata keçirmək üçün lisenziya almış hüquqi şəxslər gömrük daşıyıcısı ola bilərlər. Təklif edilən dəyişikliyə əsasən, malların və nəqliyyat vasitələrinin gömrük nəzarəti altında daşınmasını həyata keçirən hüquqi şəxslər və ya hüquqi şəxs yaratmadan sahibkarlıq fəaliyyəti ilə məşğul olan fiziki şəxslər gömrük daşıyıcısı ola biləcəklər. Müvafiq icra hakimiyyəti orqanı gömrük daşıyıcılarının siyahısını nəşr edəcək, rəsmi internet informasiya ehtiyatında yerləşdirəcək və məlumatların daimi yenilənməsini təmin edəcək. Beləliklə, Gömrük Məcəlləsinə təklif edilən yeni dəyişikliklərlə "gömrük brokeri" anlayışı "dolayı gömrük təmsilçiliyi" ilə əvəzlənir. İslahat çərçivəsində bu sahədə lisenziya tələbi ləğv edilir və vahid reyestr sisteminin yaradılması nəzərdə tutulur. İqtisadçı Natiq Cəfərli hesab edir ki, bu addım mahiyyət etibarilə mövcud vəziyyətin rəsmiləşdirilməsidir: "Əslində, illərdir qeyri-rəsmi şəkildə formalaşmış sistemin qanuni müstəviyə keçməsi daha məntiqlidir. Əvvəllər broker xidməti göstərənlərin çoxu vergi ödəmədən fəaliyyət göstərirdi. Yeni sistemlə onlar rəsmi qeydiyyata alınacaq, "gömrük təmsilçisi" kimi fəaliyyət göstərəcək və əldə etdikləri gəlirləri rəsmiləşdirərək dövlət büdcəsinə vergi ödəyəcəklər".
Samirə SƏFƏROVA
