Azərbaycan və İtaliya arasında münasibətlər son illərdə təkcə ikitərəfli əməkdaşlıq nümunəsi deyil, həm də regional və qlobal səviyyədə strateji tərəfdaşlığın uğurlu modelinə çevrilib. Cənubi Qafqazın ən güclü və modern dövləti, siyasi, iqtisadi mərkəzi olan Azərbaycanı İtaliya ilə sıx əlaqələr bağlayır. İtaliya ilə münasibətlərin inkişaf dinamikası olduqca yüksəkdir və ölkələrimiz arasında müxtəlif sahələr üzrə əməkdaşlıq əlaqələri daim genişlənir.
Azərbaycan-İtaliya münasibətlərinin institusional bazası artıq on ildən çoxdur ki, möhkəmlənib. 2015-ci ildə imzalanan ilk strateji tərəfdaşlıq sazişi, 2018-ci ildə qəbul edilən Hərtərəfli Strateji Tərəfdaşlıq haqqında Bəyannamə ikitərəfli əlaqələri yeni müstəviyə daşıyıb. İki ölkə arasındakı tərəfdaşlıq model xarakteri daşıyır. Strateji sənədlərdən real layihələrə, enerjidən təhsilə, siyasətdən mədəniyyətə qədər geniş spektri əhatə edən əməkdaşlıq Azərbaycanın Avropa İttifaqı ilə münasibətlərinə də əlavə güc verir. Azərbaycan-İtaliya tərəfdaşlığı bu gün həm region, həm də qlobal miqyasda dayanıqlı əməkdaşlığın nümunəsi kimi çıxış edir. Azərbaycan ilə İtaliya arasında diplomatik münasibətlər 1992-ci ildə qurulmuş və qısa müddət ərzində müxtəlif sahələrdə əməkdaşlıq sürətlə inkişaf edib. Bu əməkdaşlığın əsasını qarşılıqlı hörmət, etimad və ortaq maraqlar təşkil edir. Xüsusilə enerji sahəsində tərəfdaşlıq iki ölkə arasında münasibətlərin strateji səviyyəyə yüksəlməsində həlledici rol oynayıb. Azərbaycan zəngin enerji resurslarına malik ölkə kimi Avropanın enerji təhlükəsizliyinə mühüm töhfə verir, İtaliya isə bu resursların Avropa bazarına çıxarılmasında əsas qapılardan biri kimi çıxış edir.
Şübhəszi ki, İtaliyanın baş naziri Corca Meloninin ölkəmizə səfəriqarşılıqlı əməkdaşlığın inkişafına əlavə töhfələr verəcək. Bu səfər Azərbaycanla İtaliyanın dostluğunu və strateji tərəfdaşlığını bir daha təsdiqlədi. Məsələ ilə bağlı prezident İlham Əliyev qeyd edib: “Əminəm ki, sizin səfəriniz Azərbaycan-İtaliya dostluq əlaqələrinin inkişafına növbəti töhfə olacaqdır. Bizim ölkələrimiz strateji tərəfdaşdırlar, 2014-cü və 2020-ci illərdə strateji tərəfdaşlığa dair iki bəyannamə imzalanmışdır. Bizim münasibətlərimizin əsasını təşkil edən bu iki sənəd və sənədlərdə təsbit edilmiş məsələlər bu gün həyatda da öz əksini tapır. Sizin bu gün Azərbaycanda olmağınız bir daha Azərbaycan-İtaliya əlaqələrinin nə qədər dərinməzmunlu olmasından xəbər verir. Hər kəs bilir ki, Siz bu gün Ermənistanda idiniz. Ermənistanda öz proqramınızı bitirib Azərbaycana gəlmək bizim üçün xüsusi məna daşıyır, çox böyük rəmzi məna daşıyır, eyni zamanda, Azərbaycana göstərilən hörmətin və xoş münasibətin bariz təzahürüdür”. Siyasi sahədə də iki ölkə arasında yüksək səviyyəli dialoq mövcuddur. Qarşılıqlı rəsmi səfərlər, imzalanan sazişlər və beynəlxalq təşkilatlar çərçivəsində əməkdaşlıq münasibətlərin dərinləşməsinə töhfə verir. İtaliya Azərbaycanın ərazi bütövlüyünü dəstəkləyən ölkələrdən biri kimi çıxış edib və bu mövqeyini beynəlxalq platformalarda dəfələrlə ifadə edib. İtaliya ilə Azərbaycan arasında qurulmuş strateji tərəfdaşlıq çoxşaxəli və davamlı xarakter daşıyır. Enerji, iqtisadiyyat, mədəniyyət və siyasət sahələrində mövcud olan bu əməkdaşlıq iki ölkənin maraqlarına cavab verməklə yanaşı, Avropa ilə Azərbaycan arasında körpü rolunu oynayır. Bu münasibətlərin gələcəkdə daha da inkişaf edəcəyi və yeni istiqamətlər üzrə genişlənəcəyi gözlənilir. Bütün bunlar həm də o deməkdir ki, prezident İlham Əliyevin apardığı xarici siyasət Azərbaycanın milli maraqlarına tam cavab verməklə regionun böyük ölkələri ilə əməkdaşlığı dərinləşdirib və müstəqilliyimizin möhkəmlənməsinə yol açıb. Azərbaycanın geosiyasi baxışları və yerləşdiyi coğrafiyasının imkanlarını genişləndirərək beynəlxalq əməkdaşlığa təqdim olunması həm qonşularımız, həm də Asiya və Avropa ölkələri üçün əhəmiyyətimizi artırıb.
Tahir TAĞIYEV
