Ramil Məmmədli: “Ermənistan bununla göstərmək istəyir ki, İrəvanla Vaşinqton arasında olan yaxınlaşma İrana qarşı yönəlməyib”
Ermənistanın müdafiə naziri Suren Papikyan İran İslam Respublikasına rəsmi səfərə gedib. Bu barədə nazir özü məlumat verib. “23 fevral tarixində İran İslam Respublikasına rəsmi səfərə gəldim”, - deyə Papikyan bildirib.
Səfərin proqramı və keçiriləcək görüşlər barədə hələlik ətraflı məlumat açıqlanmasa da, Papikyan Tehranda İranın müdafiə və silahlı qüvvələrə dəstək naziri Əziz Nəsirzadə ilə görüşüb. .
Məlum olduğu kimi, İran ətrafında vəziyyət getdikcə gərginləşir. ABŞ-ın hərbi qüvvələrini İran ətrafında cəmləşdirməsi səbəbindən bir sıra ölkələr vətəndaşlarını İrandan çıxarır.
Maraqlıdır, İran ətrafında belə bir vurhavurda Ermənistan müdafiə nazirinin Tehrana səfərində məqsəd nə ola bilər?
Sözügedən məsələni baki-xeber.com-a şərh edən hərbi ekspert Ramil Məmmədlinin fikrincə, burada Ermənistanın bir sıra məqsədi ola bilər: “Əvvəla, Ermənistan İran ətrafında həlqənin daralmasından narahatdır. Çünki bəzi məhsulları İran üzərindən əldə edirlər. O cümlədən, Hindistanla əlaqələr İran üzərindən qurulur. Müharibə baş verərsə, bütün bunların Ermənistana təsiri olacaq. Digər tərəfdən son dövrlər ABŞ-la Ermənistan arasında müşahidə edilən yaxınlaşma Tehranda həssaslıqla izlənilir. Hətta bir müddət əvvəl İran səfirinin İrəvanda Tehrana qarşı keçirilən etiraz aksiyasına sərt mövqedən yanaşması bu həssaslığın təzahürü idi. İranın İrəvandakı səfiri Xalil Şirqolami demişdi ki, Ermənistan getdikcə İrana qarşı düşmən mövqedə olan qüvvələrin fəaliyyət mərkəzinə çevrilir. Bu ilin yanvarında səfirin belə giley xarakterli açıqlaması Ermənistanda ciddi müzakirələrə səbəb olmuşdu. Ola bilsin ki, müdafiə naziri Suren Papikyan bu səfərlə müəyyən görüntü yaradır. Ermənistan bununla göstərmək istəyir ki, İrəvanla Vaşinqton arasında olan yaxınlaşma İrana qarşı yönəlməyib. Halbuki, ABŞ-ın Ermənistanda böyük səfirlik binasına malik olması bilavasitə İranla əlaqədardır. Guya Birləşmiş Ştatlar İrana qarşı hərbi əməliyyatlara başlasa, Ermənistan hansısa formada bunda iştirak etməz və s. Görünür nazir Paşinyanın adından hansısa mesajları Tehrana çatdırıb”.
Vidadi ORDAHALLI
