Məhəmməd Əsədullazadə: “Separatçılarla bağlı tələbləri daha da genişlənərsə, Bakı yekun sülhə imza atmayacaq”
Ermənistanın xarici işlər naziri Ararat Mirzoyan BMT-nin İnsan Haqları Şurasının iclasında çıxışında deyib ki, 19 erməninin Bakıda saxlanması Ermənistanla Azərbaycan arasında barışıq prosesini çətinləşdirir.
Onun sözlərinə görə, iki ölkənin hökumətləri arasında imzalanmış və hazırlanmaqda olan sazişlərlə yanaşı, iki cəmiyyət arasında “səmimi dialoqun və sülhün bərqərar olmasının əsasları” qoyulub: “Buna baxmayaraq, münaqişənin ağrılı humanitar nəticələrini hələ də aradan qaldırmaq lazımdır və keçmişin yaraları sağalmalıdır - biz çətin barışıq yolunu seçmişik. Bu, əlbəttə ki, 19 erməninin hələ də Bakıda saxlandığı, itkin düşmüş və zorla itkin düşmüş şəxslərin taleyinə aydınlıq gətirilməli olduğu bir vaxtda çətindir”.
Erməni nazirin sözlərinə görə, “təhrif olunmuş tarixi ritorika ilə də proses mürəkkəbdir”.
Ümumiyyətlə son vaxtlar ən yüksək ranqlı erməni rəsmiləri davamlı olaraq separatçıların məsələsini qabardır. Əvvəl parlament spikeri Alen Simonyan, indi də Mirzoyan. Fürsət düşdükcə separatçı məhbusların məsələsinə toxunurlar. Xüsusilə bu aralarda sözügedən məsələni nəzərdən keçirirlər. Ermənistanın yeni kursunun mahiyyəti ondan ibarətdir ki, Bakıdakı separatçı məhbusların azadlığa buraxılmasını tədricən Azərbaycanla sülh prosesində paralel müzakirə olunan mövzuya çevirsinlər.
Sözügedən məsələ ilə bağlı fikirlərini baki-xeber.com-la bölüşən politoloq Məhəmməd Əsədullazadə hesab edir ki, erməni rəsmilərinin separatçı canilərlə bağlı məsələni davamlı olaraq gündəmə gətirmələri təsadüfi deyil: “Ermənistan xarici işlər nazirinin 19 separatçının azad edilməsinin guya sülh prosesinə töhfə verəcəyi ilə bağlı səsləndirdiyi fikirlər qəbuledilməzdir. Ən azından ona görə ki, separatçıların törətdiyi insanlıq əleyhinə cinayətlər ortadadır və onlar buna görə cəza almalıdırlar. Separatçıların azad edilməsi ötən ilin avqustunda Vaşinqtonda paraflanan sülh sazişində yoxdur. Ancaq son vaxtlar erməni rəsmiləri tez-tez bu məsələyə toxunurlar. Fikrimcə, belə açıqlamalar daha çox seçkiyə hesablanıb. Çünki istəsək də, istəməsək də Ermənistanda bəlli bir revanşist kütlə mövcuddur. Onların diqqətini cəlb etməkdən ötrü ard-arda belə fikirlər ortalığa atılır. Onu da nəzərə almaq lazımdır ki, xaricdəki erməni lobbisi də əsasən revanşistlərin mövqeyini dəstəkləyir. Mirzoyan həm də erməni lobbisinin xoşuna gəlmək üçün separatçı məhbuslarla bağlı məsələyə toxunur. Bununla göstərmək istəyirlər ki, separatçılarla bağlı məsələ diqqət mərkəzindədir. Ancaq əgər, erməni rəsmilərin separatçılarla bağlı tələbləri daha da genişlənərsə, Bakı yekun sülhə imza atmayacaq. O baxımdan yaxşı olardı ki, hazırkı həssas məqamda erməni tərəfi yerli-yersiz bu məsələni qabartmasın. Nəzərə almalıdılar ki, onların bu yöndə açıqlamaları Bakıda diqqətlə izlənilir”.
Vidadi ORDAHALLI
