Əli Orucov: “Ötən ilin iyunundan fərqli olaraq bu dəfə İrana endirilən zərbələrin miqyası böyük olacaq”
ABŞ İrana qarşı əməliyyatda iştirak etmək üçün 456 hərbi təyyarəni hazır vəziyyətə gətirib. Yaxın Şərqdəki bazalarda artıq yer olmadığı üçün onların bir qismi Avropadakı aerodromlarda yerləşdiriliblər.
Məsələn, Portuqaliyanın tərkibinə daxil olan Azor adalarındakı Lajeş bazasında indiyə qədər görünməmiş sayda Amerika təyyarələri cəmləşib. Son günlərdə oradan ən azı 11 “KC-46 Pegasus” yanacaq təchizatçısı və 12 “F-16”nın keçdiyi qeydə alınıb. Bolqarıstandakı Sofiya Beynəlxalq Aeroportunda ABŞ HHQ-yə məxsus “KC-135R Stratotanker” yanacaq təchizatçıları yerləşdirilib.
Üstəlik, Rusiya Fövqəladə Hallar Nazirliyinə məxsus iki İl-76 təyyarəsi BƏƏ-dən Moskva istiqamətində havaya qalxıb. Təyyarələrin göyərtəsində rus diplomatlarının ailə üzvləri var. Onlar İrana mümkün hücum gözlənildiyi üçün Yaxın Şərqdən təxliyə edilir.
O da məlumdur ki, Tramp maksimum 15 gün İrana vaxt vermişdi. Ola bilərmi ki, İrana qarşı daha tez əməliyyatlara başlanılsın?
Sözügedən məsələni baki-xeber.com-a şərh edən AMİP funksioneri Əli Orucov bunu istisna etmədi: “Əvvəla, İran ətrafında vəziyyət çox gərgindir. ABŞ-ın İrana zərbələr endirəcəyini şərtləndirən bir sıra amillər var. Nəzərə almaq lazımdır ki, Birləşmiş Ştatlar və İsrail mərhələli şəkildə öz hədəflərinə doğru irəliləyir. Birinci İranın proksiləri sıradan çıxarıldı. Söhbət Livanda “Hizbullah”a endirilən zərbələrdən, Suriyada Əsəd rejiminin devrilməsindən, Yəməndə husilərin bombalanmasından gedir. Bütün bunlar İranın regionda təsir gücünü qırdı. Hazırda ABŞ İranla danışıqlarda çox alçaldıcı şərtlərlə çıxış edir. İran bunları olduğu kimi qəbul etsə, bunu ölkə ictimaiyyətinə izah edə bilməyəcək. Məsələ ondadır ki, ABŞ nəinki uranın zəginləşdirilməsinin dayandırılmasını, ballistik raket istehsalının da dayandırılmasını İrandan tələb edir. Söhbət uzaq məsafəyə uça bilən raketlərdən gedir. Sanki Vaşinqton elə şərait yaradır ki, zərbələr üçün zəmin yaransın. Çünki 500 yaxın hərbi təyyarənin toplanması, təyyarə daşıyan gəmilərin körfəzə yönəldilməsi zərbələrin miqyasının böyük olacağından xəbər verir. ABŞ-ın İranda quru əməliyyatlara başlayacağı real deyil. Ona görə ki, İran ərazicə böyükdür və bu, ABŞ üçün bir sıra risklər yaradacaq. Tramp daha tez nəticə əldə etmək istəyir. Ötən ilin iyunundan fərqli olaraq bu dəfə İrana endirilən zərbələrin miqyası böyük olacaq. Nəticədə dağıntılar da daha çox olacaq. Bunun ölkə daxilində hansı nəticələrə gətirib çıxaracağını proqnozlaşdırmaq çətindir”.
Vidadi ORDAHALLI
