Azər Həsrət: “Rusiya Suriyada Əsəd rejimini qoruya bilmədi qaldı Kubanın imdadına çatsın”
Kuba bəlkə də bütün tarixinin ən dərin iqtisadi qeyri-müəyyənlik dövrünü yaşayır. Yemək yox, yanacaq yox, turist yox. Hətta küçələrdəki zibili daşımağa belə imkan yoxdur. Ona görə ki, yanacaq çatışmır. ABŞ-ın təzyiqi altında Venesuela və Meksika Kubaya neft tədarükünü dayandırıb.
Böhran artdıqca, təxminən 10 milyon əhalisi olan adada həyat tədricən dayanır. Bir çox məktəbdə dərslər ləğv edilib və işçilər ödənişsiz məzuniyyətə göndərilib. Turistlərin sayı kəskin şəkildə azalıb, çünki aviaşirkətlər yanacaq çatışmazlığı səbəbindən uçuşları ləğv etmək məcburiyyətində qalıblar. Adada elektrik kəsintiləri geniş yayılıb.
Burada diqqəti çəkən məqam odur ki, Venesueladakı hadisələrdən sonra Rusiya rəsmi olaraq dönə-dönə bəyan etdi ki, Kubanı yanacaqsız qoymayacağıq. Bəs hanı?
Sözügedən məsələyə aydınlıq gətirən siyasi şərhçi Azər Həsrət baki-xeber.com-a açıqlamasında Kuba məsələsində Rusiyanın aciz duruma düşməsini bir sıra amillərlə əlaqələndirdi: “Birləşmiş Ştatlar istəsəydi istənilən vaxt Kubanı öz nəzarətinə keçirə bilərdi. Sadəcə olaraq uzun illər Kubanı elə saxlamaqla ABŞ öz daxili auditoriyasına bir göz dağı verirdi. Yəni bununla göstərmək istəyirdi ki, fərqli, zərərli ideologiyanın arxasınca gedənlər nə gündə yaşayırlar. İndi Tramp prezident olduğu üçün dünya tək qütblüdür və ona görə də Kuba məsələsini bitirmək istəyirlər. Bunu etmək üçün nə etmək lazımdır? Əlbəttə ki, Kubanı sıxmaq lazımdır. Bu baxımdan hesab edirəm ki, Kuba rəhbərliyinin ağlı yerində olsa, Birləşmiş Ştatlara əl uzadar, danışıqlara başlayar. Ümumiyyətlə, bu vaxta qədərki ideoloji iddialardan əl çəkib ətrafındakı dünyanın super gücü, eyni zamanda ən inkişaf etmiş ölkəsi ilə iş birliyi qurarlar. Yəni okeanın o tayında oturub Rusiyadan mədəd ummaq dövlət ağlı deyil. Dövlət ağlı olsaydı, bunu etməzdilər. İkincisi, Rusiya deyə bilər sizi tək qoymayacağıq. Ancaq gərək bunun arxasında real güc olsun. Rusiya özü elə küncə sıxışdırılıb ki, dünyaya açıla bilmir. Belə bir şəraitdə Rusiya Kubaya kömək edə bilərmi? Əlbəttə yox. Ötən ay ABŞ Rusiyaya məxsus neft tankerini Atlantik okeanında saxladı. Rusiya buna mane ola bildimi? Yox. Rusiya Suriyada Əsəd rejimini qoruya bilmədi qaldı Kubanın imdadına çatsın. Rusiya Kuba ilə bağlı çox vəd verə bilər. Əsas odur ki, bu, hansısa real gücə söykənsin. Bu gün Rusiyanın elə bir gücü isə yoxdur. O üzdən, Kuba Venesuelada baş verənlərdən ciddi dərs çıxarmalıdır. Kubanın inkişafı ABŞ-la əlaqələri normallaşdırmaqdan keçir”.
Vidadi ORDAHALLI
