“Bir millət, iki dövlət” prinsipi ilə hərəkət edən Türkiyə və Azərbaycan Silahlı Qüvvələri ortaq taleyin birləşdiyi iki ordu kimi təsvir edilir. 2020-ci ildə Azərbaycanın Qarabağda qələbəsindən sonra iki ölkə arasında hərbi əməkdaşlıq daha da dərinləşdi. Türkiyə və Azərbaycan 2024-cü ildə hər iki ölkənin prezidentləri tərəfindən imzalanan Şuşa Bəyannaməsi ilə münasibətlərini müttəfiqlik səviyyəsinə qaldırdılar. Türkiyə hərbi elementləri Azərbaycanla birgə təlimlər və təlim fəaliyyətləri keçirir”. Bu fikirlər Türkiyənin “Sabah” qəzetində ölkənin Silahlı Qüvvələrinin regional və beynəlxalq səviyyədə sülhə və sabitliyə verdiyi töhfəyə həsr olunmuş məqalədə yer alıb.
Nəşr yazır ki, NATO-da ikinci ən böyük orduya malik ölkə olaraq, Türkiyə alyansın əməliyyatlarında fəal rol oynayır: “Türkiyə NATO-nun İraq Missiyasına şəxsi heyət töhfəsi verir. Baltik hava polisi və Qara dəniz təhlükəsizliyi kimi sahələrdə fəal iştirak davam edir.Türkiyə NATO təlimlərində əməliyyat imkanları ilə əhəmiyyətli bir aktor kimi iştirak edir. Ankara bu il NATO Liderlər Zirvəsinə ev sahibliyi edəcək”. Ekspertlər qeyd edir ki, Azərbaycan və Türkiyə arasında hərbi əməkdaşlıq son onilliklərdə regionun təhlükəsizlik arxitekturasını formalaşdıran əsas amillərdən birinə çevrilib. Tarixi, mədəni və siyasi yaxınlıq üzərində qurulan bu münasibətlər xüsusilə hərbi sahədə strateji müttəfiqlik səviyyəsinə yüksəlib. Azərbaycan və Türkiyə ordularının birgə fəaliyyəti həm regional sabitliyin qorunmasına, həm də hər iki ölkənin müdafiə qabiliyyətinin gücləndirilməsinə mühüm töhfə verir. İki ölkə arasında hərbi əməkdaşlığın ən mühüm istiqamətlərindən biri müntəzəm keçirilən birgə hərbi təlimlərdir. Bu təlimlər quru qoşunları, hava qüvvələri, xüsusi təyinatlı bölmələr və dəniz qüvvələrini əhatə etməklə geniş miqyasda həyata keçirilir. Birgə manevrlər orduların koordinasiya imkanlarını artırmaqla yanaşı, real döyüş şəraitində qarşılıqlı fəaliyyət bacarıqlarını da gücləndirir. Müasir müharibə konsepsiyalarının tətbiqi, pilotsuz uçuş aparatlarından istifadə, kəşfiyyat və elektron müharibə elementlərinin inteqrasiyası bu əməkdaşlığın praktiki nəticələrini nümayiş etdirir. Birgə fəaliyyət yalnız hərbi təlimlərlə məhdudlaşmır. Müdafiə sənayesi sahəsində əməkdaşlıq da sürətlə inkişaf edir. Türkiyənin inkişaf etmiş müdafiə texnologiyaları Azərbaycan üçün yeni imkanlar açır. Birgə istehsal layihələri, texnologiya transferi və hərbi texnikanın modernləşdirilməsi ordunun yerli potensialını artırır. Azərbaycanın müdafiə sənayesinin inkişafı ölkənin xarici asılılığını azaltmaqla yanaşı, regional hərbi-texnoloji əməkdaşlıq mərkəzinə çevrilmək perspektivini də gücləndirir.
Ramil QULİYEV
