Sahil Kərimli: “Ölkəmizin Sülh Şurasında təsisçi üzv statusda təmsil olunması onun sülhə və təhlükəsizliyə verdiyi töhfənin nəticəsidir”
Azərbaycan beynəlxalq aləmdə nüfuzlu, müstəqil xarici siyasət yeridən ölkə kimi tanınır, etibar edilir. Ölkəmizin Sülh Şurasında təmsil olunması təsadüfi deyil. Çünki Azərbaycan qlobal sülhə və təhlükəsizliyə töhfələr verən bir dövlətdir. Ölkəmiz Sülh Şurasına yaradıcı üzv statusu ilə qoşulub. Azərbaycanın bu statusda təmsil olunması ölkəmizin beynəlxalq münasibətlər sistemində artan siyasi çəkisinin və qlobal proseslərdə etibarlı tərəfdaş kimi qəbul olunmasının göstəricisidir. Azərbaycanın beynəlxalq müstəvidə fəal siyasət yürütməsi ölkənin inkişaf modeli, strateji sabitliyi və çoxtərəfli diplomatiyaya verdiyi töhfələrlə birbaşa bağlıdır. Ölkəmizin beynəlxalq problemlərin qarşısının alınması və idarə olunmasında oynadığı rol konstruktiv yanaşma, dialoq və nəticəyönümlü diplomatiya prinsiplərinə əsaslanır və sair.
Siyasi ekspert Sahil Kərimli baki-xeber.com-a bildirdi ki, Azərbaycanın Sülh Şurasına üzv olması və xüsusilə Sülh Şurasının Nizamnaməsinə qol çəkən ilk ölkələrdən olması çox böyük önəm daşıyan hadisədir. “Biz ABŞ-ın dünyada sülh və təhlükəsizlik yaratmaq cəhdlərinə qoşulan ilk ölkələrdənik. Bu ABŞ-ın Azərbaycana olan inamının, xüsusi güvəninin, Trampın Prezident Əliyevə rəğbətinin və etimadının bariz nümunəsi kimi qiymətləndirilə bilər. Təbiidir ki, Azərbaycan son 10 illiklərdə daim prakmatik və sülhsevər xarici siyasət yürüdən, dünyada sülhə və təhlükəsizliyə çox ciddi dəstək verən bir ölkə olub. Xüsusilə Azərbaycanın 44 günlük Vətən müharibəsində şanlı qələbəsindən, ərazi bütövlüyünü və suverenliyini tam bərpa etdikdən sonra bölgədə tamamilə yeni reallıqlar yaranıb. Bu reallıqdan çıxış edərək bu gün Azərbaycan təkcə Cənubi Qafqazda yox, eyni zamanda sülhə və təhlükəsizliyə dəstək verən ölkə imicini formalaşdırıb. Bu baxımdan Trampın müəlifi olduğu Sülh Şurası və bu şurada Azərbaycanın çox aktiv, öncül və nümunəvi fəaliyyət göstərməsi böyük əhəmiyyət daşıyır. Biz bir məqamı da vurğulamalıyıq ki, Sülh Şurasına üzv olan ölkələr, xüsusilə Azərbaycan dünyanın digər ölkələrinin də bu şuraya üzvlüyü ilə bağlı müraciətlər ünvanlamaq üzrədir. Azərbaycanın Sülh Şurasına ilk imza atan ölkələrdən olması ölkəmizə böyük üstünlüklər və dvidentlər gətirir. Eyni zamanda ölkəmizin Sülh Şurasında təsisçi üzv statusda təmsil olunması onun sülhə və təhlükəsizliyə verdiyi töhfənin nəticəsidir”.
S.Kərimli vurğuladı ki, Azərbaycan da digər ölkələrin bu şuraya qoşulması istiqamətində öz töhfələrini verir. S.Kərimlinin sözlərinə görə, dünyada haqq-ədalətin, beynəlxalq hüququn ayaqlalar altına atıldığı bir dövrdə, dünyanın bir sıra beynəlxalq təşkilatlarının fəaliyyətsizliyi dövründə Azərbaycanın da təmsil olunduğu Sülh Şurası dünyada tamamilə real bir təsisatdır və bu qurumun inkişafında Azərbaycan da öz töhfəsini vermiş olacaq.
İradə SARIYEVA
