Qulamhüseyn Əlibəyli: “Qaluzin bunu deməklə birinci növbədə Ermənistanı nəzərdə tutur”
“Rusiya MDB-nin bəzi ölkələrinin suverenlikdən imtinası səbəbindən ciddi çağırışlarla üzləşir”. Bu barədə Rusiyanın xarici işlər nazirinin müavini Mixail Qaluzin bildirib.
“Bəzi məlum ölkələrin öz suverenliklərini təhvil verməsi nəticəsində həmin istiqamətlərdən bizə qarşı birbaşa hərbi-siyasi, iqtisadi, psixoloji və digər xarakterli təhdidlər, sanksiyalar, hüquqi və müxtəlif təzyiqlər yaranır”, - deyə diplomat izah edib.
O qeyd edib ki, Moskva bu təhdidlərin qarşısını almaq üçün tədbirlər görür. Qaluzin onu da bildirib ki, Rusiya MDB ölkələri ilə “yaxınlaşma və ardıcıl yanaşma” xəttinə sadiqdir və onlarla, o cümlədən təhlükəsizlik məsələlərində tərəfdaşlığın zəruriliyini görür.
Maraqlıdır, Rusiya rəsmisi bununla hansı MDB ölkələrini təhdid mənbəyi hesab edir? Hansı dövlətlərə işarə edilir?
Sözügedən məsələ ilə bağlı fikirlərini baki-xeber.com-la bölüşən sabiq millət vəkili, hüquqşünas Qulamhüseyn Əlibəyli hesab edir ki, Rusiya MDB-də müstəqil siyasət yeridən, Moskvanın dediyini etməyən ölkələri özünə təhdid hesab edir: “Ona görə də bütün vasitələrlə Moskva həmin ölkələri bu və ya digər dərəcədə təhdid edir. Rusiya prezidenti Vladimir Putinin ABŞ prezidenti Corc Buşla görüşünün məzmunu yayılıb. Putin həmin görüşdə konkret olaraq Ukrayna, Cənubi Qafqaz və Mərkəzi Asiya ölkələrinin adını çəkib. Açıq demişdi ki, bu ölkələr Rusiyanın təsir dairəsində olmalıdır. Hətta Ukraynanın süni bir dövlət olduğunu demişdi. Elə bunun nəticəsi idi ki, Rusiya 2008-ci ildə Gürcüstana hücum etdi, 2014-cü ildə Krımı ilhaq etdi, Dombasda separatizmi himayə etdi və ən nəhayət 2022-ci ilin fevralında Ukraynaya qarşı işğalçı müharibəyə başladı.
Qaluzin bunu deməklə birinci növbədə Ermənistanı nəzərdə tutur. Son vaxtlar Ermənistanda gedən proseslər, Paşinyan hakimiyyətinin yeritdiyi siyasət Kremli qıcıqlandırır. Ermənistanla bağlı ona görə bu qədər narahatdırlar ki, orada hərbi bazaları var. Ermənistan Rusiyanın yaratdığı KTMT və Aİİ-də təmsil olunur. Əgər Rusiya ilə bu qədər sıx bağlılığı olan ölkə Qərbə doğru kurs götürürsə, deməli Rusiya təsir sferasını itirir. Kim zəmanət verir ki, Ermənistandan sonra digər MDB dövlətləri də bənzər addım atmayacaq? Onsuz da Mərkəzi Asiya ölkələri Azərbaycanın tranzit və logistik imkanlarından istifadə edərək getdikcə daha inamlı müstəqil siyasət yeridirlər. Bütün bunlar Rusiyanın xoşuna gəlmədiyi üçün onların ünvanına belə fikirlər səsləndirilir. Moskva hesab edir ki, hansı ölkə Qərblə yaxın əlaqələr qurursa, guya bununla suverenlikdən imtina edir. Bunların təsəvvüründə Rusiya ilə hesablaşan ölkə “suveren” ola bilər. Ermənistanda gedən proseslər Kremldə təşvişlə qarşılanır. Çünki 4 ildir Ukraynada gedən müharibə fonunda geosiyasi proseslər çox sürətlə inkişaf edir. Hər keçən gün Ermənistan Rusiyanın orbitindən uzaqlaşır. Bütün hallarda nəzərə almaq lazımdır ki, artıq dünya Rusiyanın istədiyi kimi dünya deyil. İndi Azərbaycan, Ermənistan, Gürcüstan və Mərkəzi Asiya ölkələri də artıq müstəqil siyasət yeridirlər. Orta Dəhlizin gündəmə gəlməsi həmin ölkələrin müstəqilliyini, suverenliyini xeyli gücləndirir”.
Vidadi ORDAHALLI
