Məhərrəm Zülfüqarlı: “Sülh Şurası BMT-yə ictimai nəzarəti həyata keçirəcək”
ABŞ Prezidenti Donald Tramp Vaşinqtondakı Sülh İnstitutunda keçirilən Sülh Şurasının ilk iclasında çıxışında bildirib ki, o, Sülh Şurasını Birləşmiş Millətlər Təşkilatına (BMT) nəzarət edən bir qurum kimi görür və bu onun qlobal qurumu öz təşəbbüsü ilə əvəzləmək niyyətində olduğuna dair narahatlıqları azaldacaq kimi görünmür. “Sülh Şurası, demək olar ki, BMT-yə nəzarət edəcək və onun düzgün işləməsini təmin edəcək”, – Tramp Vaşinqtondakı iclasda deyib.
Tramp BMT-nin tamamilə ləğv olunmasını təklif etməyib. Əksinə, o bildirib ki, təşkilat son illərdə dünya problemlərini həll etməkdə zəif qaldığı üçün gücləndirilməlidir. “Biz onun imkanlarını yaxşılaşdıracağıq. Onlara kömək lazımdır, xüsusən maliyyə baxımından. Biz maliyyə dəstəyi verəcəyik və BMT-nin fəaliyyət qabiliyyətini təmin edəcəyik”, – Tramp vurğulayıb.
Tramp BMT-ni tamamilə dəyərsiz hesab edənlərin yanıldığını deyib: “BMT-nin böyük potensialı var. Bir çoxları dediklərimi bəyənmədi. Onlar dedilər: “Sən bunu deməməlisən, çünki biz BMT-yə əhəmiyyət vermirik”. Xeyr, bu, həqiqətən, çox vacibdir və mən düşünürəm ki, nə vaxtsa öz potensialına çatacaq. O gün böyük gün olacaq”.
Tramp bəyan edib ki, Qəzza Sülh Şurası praktik şəkildə BMT- yə nəzarət edəcək. Bu nəzarət necə həyata keçiriləcək, bu necə olacaq? Belə olar? Bu Şura BMT-yə necə nəzarət edə bilər?
Tarix elmləri doktoru, professor, siyasi ekspert Məhərrəm Zülfüqarlı baki-xeber.com-a bildirdi ki, Sülh Şurası müsbət qurum kimi qəbul olunmalıdır. “Çünki Yaxın Şərqdə uzun sürən münaqişəni aradan qaldırmaq təşəbbüsü ilə yaradılıb. Azərbaycan da bu Şuraya daxil olub. Sülh Şurasının yaradılması təsadüfi olmadı. Xüsusilə son illər BMT-nin təsir dairəsi zəiflədi, bu qurum get-gedə nüfuzunu itirdi. Məsələn, Azərbaycanın vaxtilə işğal olunmuş əraziləri ilə bağlı qəbul olunmuş 4 qətnamənin heç birini BMT yerinə yetirə bilmədi. Halbuki, o qətnamələri BMT Təhlükəsizlik Şurası qəbul etmişdi. BMT-nin zəifləməsi və nüfuzdan düşməsi Sülh Şurasının yaranması zəruri etdi və bu müsbət haldır. Nəzarət etmək məsələsinə gəlincə, mənə elə gəlir ki, Tramp bu sözü ictimai nəzarət əsasında deyib. Sülh Şurası BMT-yə ictimai nəzarəti həyata keçirəcək”.
M.Zülfüqarlının sözlərinə görə, çünki demokratik qurumlarda ictimai nəzarət əsasdır. Professor Zülfüqarlının bildirdiyinə görə, bütün cəmiyyətlərdə, demokratik ölkələrdə ictimai nəzarət güclüdür: “Bu baxımdan da Qəzzada problemlərin həlli üçün məhz Sülh Şurasının BMT-nin işinə nəzarəti bu cəhətdən təqdirəlayiqdir. Belə olarsa BMT də bu sahədə öz fəaliyyətini göstərər, sülhə öz töhfəsini verə bilər, məsuliyyətini daha dərindən hiss edər. BMT bir qurum olaraq öz işini davam etdirməli və nüfuzunu bərpa etməlidir.
Yeni yaranan qurum hələ ki BMT ni əvəz edə bilməz. Amma söhbət BMT-nin işinə ictimai nəzarətdən gedirsə bu müsbət haldır”-deyə M.Zülfüqarlı bildirdi.
İradə SARIYEVA
