Zaur İbrahimli: “Onların cinayətkar milyarder Vardanyanın şəxsiyyətinə bu qədər “diqqət” göstərməsi onun maliyyələşdirdiyi fonddan qidalanmalarıdır”
Bakı Hərbi Məhkəməsinin erməni separatçılarının bəzilərinə ömürlük, bəzilərinə isə uzunmüddətli həbs cəzası verməsi ilə bağlı Avropanın bəzi siyasiləri, siyasi dairələri, hüquq müdafiə təşkilatları əsassız fikirlər bildirirlər. Avropa təşkilatları, hüquq müdafiə təşkilatları mühakimə olunaraq barələrində hökm çıxarılan erməni separatçılarının başında əsas lider kimi Ruben Vardanyanı nəzərdən keçirirlər. 20 illik həbs cəzasına məhkum olunan erməni əsilli milyarder, vaxtilə Qarabağda separatçı rejimə yaxından dəstək verən, özü də cinayətlərinə görə heç də onlardan geri qalmayan, terroru maliyyələşdirən, qanunuz silahlı dəstələrə pullar xərcləyən Vardanyana Avropa qurumlarının və siyasilərinin ayrıca münasibət bəsləməsi xeyli suallar doğurur.
Birincisi, onların Vardanyana bu qədər diqqət göstərməsi nə ilə bağlıdır? İkincisi, onlar Vardanyanın da digərləri kimi mülki şəxs olduğu halda hərbi məhkəmə tərəfindən mühakimə olunmasına da narazı yanaşırlar. Guya bu məhkəmə praktikasına ziddir, pozuntudur, siyasi məsələdir. Guya bunlar mülki şəxs olduqlarına görə Bakı Hərbi Məhkəmə tərəfindən mühakimə oluna bilməzlər.
Avropa qurumlarının, hüquq müdafiəçisilərinin əsas yanaşması, reaksiya tezisi budur ki, guya bu məhkəmə prosesi saxtadır, bunun da saxta olmasının əsas göstəricisi onlar mülki şəxs olduqları halda hərbi məhkəmə tərəfindən mühakimə olunmalarıdır.
Bəyəm bu separatçıların törətdiyi ağır hərbi cinayətlərin, müharibə cinayətlərinin başında Vardanyan dayanmayıb?
Prioritet" Sosial İqtisadi Araşdırmalar Mərkəzi İctimai Birliyinin sədri Zaur İbrahimli baki-xeber.com-a bildirdi ki, bunun səbəbi Vardanyanın cinayət yolu ilə əldə etdiyi pullardan onların da bəhrələnməsidir.
“Onların cinayətkar milyarder Vardanyanın şəxsiyyətinə bu qədər “diqqət” göstərməsi onun maliyyələşdirdiyi fonddan qidalanmalarıdır. ABŞ Beynəlxalq İnkişaf Agentliyinin (USAID) sonuncu direktoru belə “Avrora” Fondunun maliyyələşdirdiyi mükafata layiq görülmüşdü. Vardanyanın belə fondları və qeyri-hökumət təşkilatları şəbəkəsi var. Bu şəbəkələr və fondlar vasitəsilə zamanında çox böyük lobbi qrupları yaradılıb. Lobbi qrupları aparıcı ölkələrdə belə qərarvermə prosesinə təsir göstərə bilirlər. Eyni zamanda məqsədli şəkildə aparıcı beynəlxalq təşkilatlarda qərar qəbul etmə səlahiyyəti olan şəxslər ələ alınıb, həmçinin öz nümayəndələrinin orada irəli çəkilməsi üçün məqsədli şəkildə xeyriyyə tədbirləri həyata keçirilib. Bu məsələnin bir tərəfi ikinci tərəfi isə Vardanın mülki şəxs olması və ona münasibətdə hərbi cinayətlərlə bağlı iddiaların əsassız olması barədə irəli sürülən fikirlərdir. Bu fikirlər tamamilə cəfəngdir. İlk növbədə qeyd etmək lazımdır ki, Vardanyan həmin dövrdə separatçıların nəzarətində olan Qarabağ bölgəsinə gəldikdən sonra “dövlət naziri” olub və o vaxt Azərbaycana, onun ərazi bütövlüyü və suverenliyinə qarşı hərbi əməliyyatların təşkili ilə əlaqədar qrupların yaradılmasında, silah-sursat alınmasında, hərbi təchizatda bilavasitə iştirak edib, bu prosesi təşkil edərək ona cavabdeh olub. Həmin dövrdə separatçı rejimin “özünü müdafiə” dəstələrinin təlim düşərgələrində Vardanyanın olması, onun maliyyələşdirdiyi fondlardan gələn maliyyə hesabına silah-sursat, hərbi təchizat alınması video görüntülərdə var. Hətta bu YouTube sosial şəbəkəsində yayılıb. Bu məsələnin bir aspekti. İkinci aspekti məhz Azərbaycanın ərazi bütövlüyünə, suverenliyinə qarşı qanunsuz silahlı dəstələrin formalaşdırılması, onların təchizatı ilə əlaqədar məsələlər Vardanyanın telefon danışıqlarında, votsap üzərindən yazışmalarında var. Bunlar dəlil, sübut kimi həm məhkəmədə, həm də bu cinayətkar oliqarxın fəaliyyəti ilə əlaqədar çəkilən filmdə də göstərilir. Bu sübut və dəlillərin bir çoxu Azərbaycanın xüsusi xidmət orqanlarının əməliyyat yolu topladığı dəlil və sübutlarda da öz əksini tapıb. Bu da məhkə prosesində göstərilib. Bunların heç biri də təkzib olunmayıb”.
Z.İbrahimlinin sözlərinə görə, məsələnin üçüncü tərəfi Azərbaycanın öz torpaqlarının azadlığı uğrunda apardığı 44 günlük Vətən müharibəsində Vardanyanın fəaliyyətidir. O, vurğuladı ki, bu epizod başdan-ayağa cinayət mahiyyəti daşıyır. O, vurğuladı ki, Vardanyan həm YouTube üzərindən, həm müxtəlif ölkələrin televiziyalarına verdiyi müsahibələrdə açıq şəkildə Azərbaycan dövlətinə qarşı silahlı mübarizəni təşkil etdiyini, buna cavabdeh olduğunu bildirib. “O cümlədən onun Azərbaycan dövlətinə qarşı hərbi əməliyyatların aparılmasına çağrışları da açıq şəkildə sosial şəbəkələrdə də var. Belə olan halda Vardanyanı hansısa formada müdafiə etməyə cəhd göstərmək insan hüquqlarının müdafiəsi anlayışının mahiyyətinə ziddir. Bu məhfumu gözdən salır. Onlar Azərbaycana qarşı bu cür qeyri-obyektiv mövqe tutur...
Bu təşkilatlar bunun üçün konkert maliyyə alıblar və sifariş yerinə yetirirlər. Çox təəssüf ki, bu sifarişləri yerinə yetirərkən heç bir etik mülahizəyə, insani dəyərlərə əməl etmirlər”.
Z.İbrahimlinin sözlərinə görə, necə ki, vaxtilə Azərbaycana qarşı qarayaxma aparan təşkilatların, siyasilərin iç üzü açdıldı, onlar ifşa olundular, yaxın perspektivdə indi bizi əsassız ittiham edənlərin də iş üzü açılacaq və biabır olacaqlar.
İradə SARIYEVA
