Afsəddin Nəbiyev: “Bu, Zaxarovanın hüquqi müstəvidə olan bir mövzunu siyasi alver predmetinə çevirmək cəhdidir”
Bakıda saxlanılan 11 rusiyalının tezliklə azad edilməsi Rusiya və Azərbaycan münasibətlərində prioritet məsələdir. Bunu Rusiya XİN-in rəsmi nümayəndəsi Mariya Zaxarova deyib.
Daha sonra Zaxarova bunları qeyd edib: “Bu məsələni azərbaycanlı tərəfdaşlarımızla ikitərəfli təmaslarda mütəmadi olaraq qaldırırıq. Bakının rusları azad etmək qərarı iki ölkə arasında mehriban qonşuluq münasibətlərinin daha da möhkəmləndirilməsi istiqamətində mühüm addım olardı”.
Zaxarova bildirir ki, rusların azad edilməsi qonşuluq münasibətlərinin möhkəmləndirilməsində mühüm addım olar. Bəs Rusiyada heç nədən həbs edilən azərbaycanlıların məsələsi necə olsun?
Sözügedən məsələ ilə bağlı fikirlərini baki-xeber.com-la bölüşən AMİP-in sədr müavini Afsəddin Nəbiyev hesab edir ki, Zaxarovanın bu bəyanatı beynəlxalq münasibətlərdə "ikili standartlar" və diplomatik təzyiq dilinin bariz nümunəsidir: “Rusiyanın öz vətəndaşlarının hüquqlarını qabardarkən, eyni həssaslığı Azərbaycan vətəndaşlarına münasibətdə göstərməməsi ciddi suallar doğurur. Beynəlxalq hüquqda (imici zədələnmiş olsa belə) bərabərin bərabər üzərində hakimiyyəti yoxdur prinsipi əsasdır. Əgər Bakıdakı rusların azad edilməsi "mehriban qonşuluq" üçün şərtdirsə, Rusiyadakı azərbaycanlıların qeyri-qanuni həbsləri və hüquqlarının pozulması bu qonşuluğa birbaşa zərbədir. Hər bir suveren dövlət öz ərazisində qanunları pozan şəxsləri cəzalandırmaq hüququna malikdir. Zaxarovanın bunu "prioritet məsələ" kimi qoyması, hüquqi müstəvidə olan bir mövzunu siyasi alver predmetinə çevirmək cəhdidir. Rusiya tərəfi mütəmadi olaraq öz vətəndaşlarının "hüquqlarını" xatırladır, lakin Rusiyada etnik zəmində hücuma məruz qalan, öldürülən və ya saxta ittihamlarla uzunmüddətli həbslərə məhkum edilən soydaşlarımız barədə sükut nümayiş etdirir. Belə hallar Rusiyanın aciz duruma düşməsinin nəticəsidir. Sadə dinc insanlarla acımasız davranış heç bir dövlətə baş ucalığı gətirməz”.
A. Nəbiyevin fikrincə, birmənalı olaraq Zaxarovanın Bakıda saxlanılan Rusiya vətəndaşları ilə bağlı verdiyi bəyanat birtərəfli xarakter daşıyır və mehriban qonşuluq prinsiplərinin mahiyyətini təhrif edir: “Bu məsələyə dair rəsmi Bakının və ictimaiyyətin mövqeyi ciddi arqumentlərə söykənir. Azərbaycanda saxlanılan şəxslər milliyyətinə görə deyil, konkret qanun pozuntularına görə məsuliyyətə cəlb olunublar. Suveren bir dövlətdən öz daxili qanunvericiliyindən kənara çıxaraq "jest" gözləmək, hüququn aliliyi prinsipinə ziddir. Rusiya tərəfi "mehriban qonşuluqdan" bəhs edirsə, ilk növbədə Rusiyada yaşayan yüz minlərlə azərbaycanlının təhlükəsizliyini və hüquqi toxunulmazlığını təmin etməlidir. Heç bir hüquqi əsas olmadan həbs edilən, millətçi qrupların hücumuna məruz qalan və həyatını itirən həmvətənlərimizlə bağlı Rusiyanın nümayiş etdirdiyi laqeydlik qonşuluq münasibətlərinə sığmır. Münasibətlərin möhkəmlənməsi yalnız Azərbaycanın addımlarından asılı deyil. Rusiya hüquq-mühafizə orqanlarının azərbaycanlılara qarşı apardığı selektiv və bəzən qərəzli təqiblər dayandırılmadan, "ikitərəfli təmaslarda tərəfdaşlıq"dan danışmaq səmimiyyətdən uzaqdır. Əgər prioritet mehriban qonşuluqdursa, bu, hər iki tərəfin vətəndaşlarının hüquqlarına eyni dərəcədə hörməti tələb edir. Rusiya tərəfi öz vətəndaşlarını azad görmək istəyirsə, eyni humanizmi və hüquqi ədaləti Rusiyada əsassız yerə saxlanılan azərbaycanlılara münasibətdə tətbiq etməyə borcludur. Dostluq və qonşuluq "təktərəfli yol" deyil. Azərbaycan hər zaman öz öhdəliklərinə sadiq qalıb. Lakin öz vətəndaşlarının qanunsuz həbsinə və öldürülməsinə göz yuman bir tərəfin bizə qonşuluq dərsi keçməyə mənəvi haqqı yoxdur”.
Vidadi ORDAHALLI
