Rusiya Təhlükəsizlik Şurasının katibi Sergey Şoyqu bildirib ki, Ermənistan hakimiyyətinin respublikanın dəmir yollarının idarə olunmasında Rusiyanı əvəz etmək istəyi düşünülməmiş bir qərardır və ağır nəticələrə səbəb ola bilər.
"Digər ölkələrin dəmir yollarının idarə olunmasında səriştəsini qiymətləndirməyəcəyəm, amma əminliklə deyə bilərəm ki, başqa bir şirkətin Ermənistanda uzun müddətdir ki, səmərəli və çətin şəraitdə fəaliyyət göstərən Rusiya daşıyıcısını tam əvəz edə bilməsi ehtimalı azdır" - deyə o qeyd edib.
Şoyqu xatırladıb ki, "Rusiya Dəmir Yolları" ASC-nin törəmə müəssisəsi olan "Cənubi Qafqaz Dəmir Yolları" QSC təxminən 20 ildir ki, müqavilə şərtlərini yerinə yetirir. Onun sözlərinə görə, bu müddət ərzində Rusiya investisiyaları 30 milyard rublu keçib və Ermənistan büdcəsinə 15 milyard rubldan çox vergi köçürülüb.
"İndi isə Paşinyan Ermənistanın dəmir yollarının bir Rusiya şirkətinin nəzarətində olmasının potensial tərəfdaşları qorxutduğunu, regional layihələrə mane olduğunu və Ermənistan dəmir yolu şəbəkəsinin idarə olunmasını həm Rusiya, həm də Ermənistan üçün dost bir ölkəyə təhvil verməyi düşündüyünü deyir", Şoyqu vurğulayıb.
O, həmçinin İrəvanın digər təşəbbüslərinə də toxunub.
"Bu yaxınlarda Ermənistanın nüvə məsələləri üzrə ABŞ ilə əməkdaşlıq planları ilə bağlı vəziyyəti şərh etdim. Beləliklə, diplomatik dillə desək, düşünülməmiş qərarlar sadə Ermənistan vətəndaşlarının ödəməli olacağı eyni dərəcədə təhlükəli təcrübələrə gətirib çıxarmayacaqmı?" - deyə Rusiya Təhlükəsizlik Şurasının katibi bildirib.
O, əlavə etdi ki, təxminən iyirmi il ərzində qurulmuş sistem "sadəcə bir gecədə çökə bilər". "Təbii ki, heç bir "dost ölkə" buna görə məsuliyyət daşımayacaq. Ümid edirəm ki, Ermənistan rəhbərliyi vacib qərarlar qəbul edərkən yalnız vətəndaşlarının maraqlarından çıxış edəcək", - deyə Şoyqu qeyd edib.
TAHİR
