Prezident Donald Trampın qayıdışından bəri ABŞ NATO-ya xarici fəaliyyətinin bir çox sahəsini, o cümlədən İraqdakı missiyasını dayandırmasını tələb etməklə təzyiq göstərir.
Bu barədə Politico dörd diplomata istinadən məlumat verir.
Bundan əlavə, ABŞ Ukraynanın, alyansın Sakit okean tərəfdaşları olan Avstraliya, Yeni Zelandiya, Yaponiya və Cənubi Koreyanın iyul ayında Ankarada keçiriləcək illik sammitinə dəvət olunmamasında israr edir. Vaşinqton həmçinin alyansın Kosovodakı iştirakının azaldılmasını tələb edir.
Jurnalistlərlə danışan mənbələrə görə, ABŞ, xüsusilə NATO müttəfiqlərindən İraqdakı missiyanı 2026-cı ilin sentyabr ayına qədər başa çatdırmalarını istəyib. "Politico"nun qeyd etdiyi kimi, sözügedən əməliyyat Trampın 2018-ci ildəki birinci prezidentlik dövründə başlayıb və Bağdadın xahişi ilə bir neçə dəfə genişləndirilib. Missiyanın fəaliyyəti təhlükəsizlik qurumlarının gücləndirilməsinə və İŞİD-in geri qayıtmasının qarşısının alınmasına yönəlib. Ayrıca, ABŞ Vaşinqtonla Bağdad arasındakı 2024-cü il müqaviləsinə əsasən orada olan təxminən 2500 əsgərini İraqdan çıxarmaq niyyətindədir.
ABŞ administrasiyasının rəsmisi "Politico"ya açıqlamasında bu geri çəkilməni "Trampın sonsuz müharibələrə son qoymaq öhdəliyinin bir hissəsi" adlandırıb. Lakin nəşrin mənbələrindən biri bildirib ki, ABŞ-ın NATO qoşunlarının geri çəkilməsi tələbi alyans daxilində müqavimətlə qarşılanıb. Başqa bir mənbə aydınlaşdırıb ki, "əksər" müttəfiqlər İraqdakı missiyanın azaldılmalı olduğuna inanır, lakin bu, yalnız uzunmüddətli perspektiv üçündür.
Lakin hələlik rəsmi qərar verilməyib. Əməliyyatın başa çatması alyansın bütün 32 üzvü tərəfindən təsdiqlənməlidir.
SAMİRƏ
