Akif Nağı: “Bu siyasi demoqoqiyadan başqa bir şey deyil, çünki onların sağlam arqumentləri yoxdur, iddiaları əsassızdır”
Azərbaycanla Ermənistan arasında sülh gündəliyinə uyğun olaraq ticarət əlaqələrinin qurulmasınına baxmayaraq Ermənistanın bəzi siyasətçiləri təxribatçı yanamalar sərgiləyir. Məsələn, “Birlik Qanadları" siyasi təşəbbüsünün həmtəsisçisi və iqtisadi qrupunun rəhbəri David Ananyan bildirib ki, Azərbaycanla mövcud ticarət Azərbaycan iqtisadiyyatını inkişaf etdirir.
Ananyan qeyd edib ki, tədarükü şaxələndirmək həmişə dövlətin maraqlarına uyğundur, lakin ilk növbədə əsas axının haradan gəldiyini qiymətləndirmək və idxalın idxal edildiyi ölkəni maliyyələşdirdiyini nəzərə almaq lazımdır. “Azərbaycan iqtisadiyyatını inkişaf etdirmək istəyirikmi? Başqa sözlə, Azərbaycan əsas tədarük mənbəyi olmamalıdır” deyə Ananyan qeyd edib.
Ananyan məsələni siyasi baxımdan da “qiymətləndirib”, məhv olmuş qondarma “Arsaxı”da yada salıb. Bir sözlə, Azərbaycanla Ermənistan arasında qurulan iqtisadi əlaqələrin, ticarətin əleyhinə çıxıb.
Əvvala, Azərbaycan məhsulunu satıb iqtisadiyyatını inkişaf etdirir. Burada nə var ki? Ermənistan almasa başqa ölkələr alır. Azərbaycan neft satır. Birincisi Ermənistan almasa da neftimizi kimə olsa satacağıq. İkincisi, Azərbaycan öz məhsulunu satırsa bu ölkəyə əlavə gəlirlər gətirir, iqtisadiyyatı inkişaf edir. Ermənistan almaq istəmir almasın. Amma Azərbaycanın enerjisi olmadan nə edəcək? Yenə itirən Ermənistan olacaq.
Azad Vətən Partiyasının sədri Akif Nağı baki-xeber.com-a bildirdi ki, Ermənistanda bəzi siyasi qüvvələr Azərbaycanla münasibətlərə xələl gətirmək üçün müxtəlif vasitələrə əl atırlar. “Məqsədləri odur ki, Azərbaycanla Ermənistan arasında münasibətlər normallaşmasın, sülh sazişi imzalanmasın və regionda sülh, əmin-amanlıq bərqərar olmasın. Bu da Rusiya, İran və başqa xarici ölkələrin sifarişləridir, bəzi erməni siyasətçilər də bu sifarişləri yerinə yetirməyə çalışırlar. Əlləri hər yerdən üzüldüyündən burada bir siyasi dvident qazanmaq niyyəti də var. Bu səbəbdən də ortalığa mənasız bir tezis atıblar.
Əslində reallıq ondan ibarətdir ki, Ermənistan kiçik bir ölkədir. Bu baxımdan onunla ticarət, iqtisadi əlaqələr Azərbaycan iqtisadiyyatına hansı təkanı verə bilər? Azərbaycan neftini, başqa məhsullarını satır, kim alırsa alır. Alanlar da çoxdur. Avropanın 10-dan artıq ölkəsi Azərbaycandan neft və qaz alır, bu sahədə əməkdaşlıq edirlər. Azərbaycanın Ermənistanla iqtisadi əməkdaşlığa elə ehtiyacı da yoxdur ki, Ermənistan bizdən neft almaqla bizim iqtisadiyyatımızın inkişafına guya təkan verir. Bu rəqəm 0,1 faizdir və bunun da iqtisadiyyata heç bir təsiri yoxdur. Bunu bizim iqtisadçılarımız da hesablayıb açıq şəkildə ortaya qoya bilərlər. Bu siyasi demoqoqiyadan başqa bir şey deyil, çünki onların sağlam arqumentləri yoxdur, iddiaları əsassızdır. İzah etsinlər görək, Ermənistanla ticarət Azərbaycana hansı böyük uğurlar gətirib? Azərbaycan Ermənistanla ticarətdən əldə etdiyi cüzi bir vəsaitdir. Azərbaycanla iqtisadi əlaqələrdə Ermənistan maraqlıdır”.
A.Nağı qeyd etdi ki, Ermənistan bu əlaqələri Rusiya ilə qurmaq istəsə də, burada ciddi çətinliklər var. İranla da Ermənistanın bu sahədə elə ciddi əlaqələr qura bilmədiyini deyən A.Nağı bildirdi ki, İran sanksiyalar altındadır. “Bu səbəbdən də Ermənistan üçün ən optimal variant bu sahədə Azərbaycanla əlaqələr qurmaqdır. Ermənistandakı normal düşüncəli insanlar da bunu başa düşürlər və bu münasibətin inkişafını istəyirlər. Amma Ananyan kimi düşünən insanlar hər şeyin mənfi tərəfini axtarırlar. Amma onların cəhdləri mənasızdır”-deyə A.Nağı bildirdi.
İradə SARIYEVA
