Məhərrəm Zülfüqarlı: “Fransa Azərbaycanla bağlı siyasətinə yenidən baxmalıdır”
Prezident İlham Əliyev “France 24” kanalına müsahibəsində bildirib ki, Kaledoniya və sairə məsələləri biz birinci ortaya atmadıq:
“Bəzi məsələlər hələ də qalır. İki suveren dövlət kimi biz bir-birimizə hörmət etməliyik, hüquq sistemlərimizə hörmətlə yanaşmalıyıq və bir-birimizin işlərinə qarışmalı deyilik. Əgər sizin sözdən istifadə etsəm, Kaledoniya və sairə məsələləri biz birinci ortaya atmadıq. Məhz Fransa Qarabağ kimi daxili məsələmizə müdaxilə etməyə başladı. Bu, nəinki həmin mövzuya, hətta siyasi gündəliyimizə də şamil edildi. Bir sözlə, buna son qoyulmalıdır. Düşünürəm ki, hər iki tərəf bunu necə etməyi bilir”.
Sözügedən məsələni baki-xeber.com-a şərh edən tarix elmləri doktoru, professor Məhərrəm Zülfüqarlının fikrincə, Fransanın anti-müsəlman, anti-türk mövqeyi 19-cu əsrdən məlumdur: “Osmanlı imperiyanın dağılmasında Fransanın rolu olub. Yəni bunlar daim türkün düşməni olublar və bu məsələdə də daim erməni kartından istifadə ediblər. Lakin 20-ci əsrin sonlarına doğru dövlət müstəqilliyinin bərpasından sonra münasibətlər gah yaxşılaşıb, gah pisləşib. Burda da təbii ki, dövlət başçılarından çox şey asılıdır. Ancaq 44 günlük Vətən müharibəsi və ondan sonra Fransanın tutduğu düşmən mövqe Azərbaycanı məcbur etdi ki, Fransanın müstəmləkə siyasətinə bir daha nəzər salsın. Əgər Fransa bu cür düşmən mövqe tutmasaydı, onsuzda Azərbaycan öz dövlət maraqlarından çıxış edərək digər problemlərlə daha çox məşğul ola bilərdi. Ancaq Fransanın təşəbbüsü ilə Avropa İttifaqının Ermənistana missiya göndərməsi, sərhəddə təxribatlar törətmələri, Qarabağa qanunsuz səfərlər və s. münasibətləri daha da kəskinləşdirdi. Azərbaycan da adekvat olaraq sözügedən məsələdə bilavasitə öz mövqeyini nümayiş etdirdi və Prezidentin də son müsahibəsində bu, dəqiq ifadə olundu. Azərbaycan Fransanın mövqeyi ilə bağlı araşdırma apararkən çoxlu sayda qeyri-qanuni, beynəlxalq münasibətlərə, insan haqlarının pozulması ilə bağlı faktlar ortaya çıxdı. Xüsusən də Fransanın müstəmləkələrində. Ona görə də Prezident Əliyev bildirdi ki, münasibətlərin normallaşmasında Azərbaycan maraqlıdır. Ancaq bütün dövlətlər kimi, biz də öz dövlət maraqlarımızdan çıxış edəcəyik. Azərbaycana qarşı hər hansı kəskin düşmən münasibət layiqli cavabını alacaq. Necə ki də alır. O üzdən Fransa Azərbaycanla bağlı siyasətinə yenidən baxmalıdır. Azərbaycan kimi regionda güclü dövlətlə münasibətlərini düzəltmək istəyirsə, ermənipərəst mövqedən əl çəkməlidir”.
Vidadi ORDAHALLI
