Ramil Məmmədli: “Rubio iki üzv ölkə hesabına Avroittifaqın müharibəyə yanaşmasını dəyişə bilməz”
ABŞ Dövlət katibi Marko Rubio bəyan edib ki, Avropanın Ukraynaya hərbi yardımı müharibəni uzadır. Avropa İttifaqı ölkələri isə məsələyə fərqli yanaşır. Avroittifaqın xarici işlər və təhlükəsizlik siyasəti üzrə ali nümayəndəsi Kaya Kallas deyib ki, biz Rusiyanı darmadağın etmişik .
Onun fikrincə, Rusiyaya qarşı hərbi təzyiq davam etməlidir. Belə vəziyyətdə Rubio Slovakiyaya, Macarıstana səfər edib və görüşlər keçirib.
Görünən odur ki, Ukrayna müharibəsi məsələsində ABŞ-la Avropa İttifaqının siyasətləri tam şəkildə bir-birindən ayrılıb, bunlar yanaşı gedə bilməz. Tam fərqli mövqe ortaya qoyurlar. ABŞ nəyin bahasına olursa olsun müharibəni yekunlaşdırmaq istəyir. Sanki əsas hədəf bu imiş. Aİ də Rusiyanı diz çökdürməyə hədəfləyib ki, gələcəkdə onun təhlükəsizliyinə təhdid yaratmasın. Belə bir fərqli yanaşmalar fonunda Rubio Aİ üzvü olan Macarıstana, Slovakiyaya səfərlər edir, görüşlər keçirir. Halbuki, bu iki ölkə Ukrayna məsələsində ABŞ-ın mövqeyini dəstəkləyir. Üstəlik, bu ölkələr Rusiyaya yaxın ölkələrdir. Rubio isə bu iki ölkə ilə Aİ-nin siyasətinə təsir göstərmək istəyir. Baş tutacaqmı? Yəni Vaşinqton iki ölkə ilə işləməklə Avropanın Rusiyaya, Ukrayna müharibəsinə münasibətini sonda dəyişə biləcəkmi?
Sözügedən məsələni baki-xeber.com-a şərh edən hərbi ekspert Ramil Məmmədli bunu istisna etdi: “Macarıstan və Slovakiyanın Ukrayna məsələsində fərqli mövqeyi Avroittifaqın vahid mövqe sərgiləməsinə mane olsa da, prinsipial olaraq bu nəyisə dəyişə bilməyəcək. Ona görə ki, Avropa İttifaqı Rusiyanı potensial təhdid hesab edir. Bununla bağlı çoxsaylı tarixi analogiyalar var. SSRİ dönəmində Finlandiyanın 10 faiz ərazisi işğal olundu. Baltikyanı dövlətlər Rusiyanın təsir dairəsinə keçdi. İkinci Dünya müharibəsindən sonra Şərqi Avropa ölkələri Rusiyanın təsir dairəsinə düşdü və s. Bütün bunları görmədən, siyasi mahiyyətinə varmadan Aİ-nin Rusiyaya münasibətini dəyişmək mümkün deyil. Xüsusən də Rusiyanın Ukraynada apardığı dağıdıcı müharibə fonunda mülki hədəfləri necə vəhşicəsinə vurması Aİ-ni daha çox qorxudur. Onlar görürlər ki, müharibə aparan Rusiya heç bir beynəlxalq hüququ gözləmir. Ukrayna əhalisini dondurur. Brüssel yaxşı başa düşür ki, Ukrayna təslim olsa, növbəti hədəf Avropa olacaq və üstəlik, bunun üçün əlverişli şərait yaranacaq. Bütün bunlardan sonra Aİ-nin Ukrayna məsələsində güzəştli mövqe tutacağını düşünmək sadəlövhlük olacaq. Aİ öz pulu ilə ABŞ-dan silah alıb Ukraynaya ötürür. Nəyə görə? Çünki Rusiyanı ciddi və fundamental təhdid hesab edir. Bu baxımdan hesab edirəm ki, Rubio iki üzv ölkə hesabına Avroittifaqın müharibəyə yanaşmasını dəyişə bilməz”.
Vidadi ORDAHALLI
