Ermənistanda parlament seçkilərinin yaxınlaşması fonunda ölkədə siyasi aktivliyin əhəmiyyətli dərəcədə yüksəlməsi müşahidə olunur. Bu fonda hakimiyyətə qarşı əsas müxalif qismində "Güclü Ermənistan"ın çıxış edəcəyi gözlənilir. Buradan baş nazirliyə namizədi milyarder iş adamı Samvel Karapetyan olsa da, partiyanın seçkiqabağı siyahısına onun qardaşı oğlu Narek Karapetyan başçılıq edəcək.
“Güclü Ermənistan” siyasi şurasının üzvü Aram Vardevanyan bildirib: “Narek Karapetyan keçid dövrünün koordinatoru, qarant olacaq ki, konstitusiya dəyişikliyi parlament tərəfindən həyata keçirilsin”. Hakim “Vətəndan sazişi” partiyasından Artur Ovannisyan isə qeyd edib: "Onların dəli, antikonstitusiya, antidemokratik, antidövlət, antierməni ideyalarını həyata keçirmək mümkün deyil". Qeyd edək ki, oliqarx Samvel Karapetyan nə baş nazir, nə də millət vəkili vəzifəsinə namizəd ola bilməz, çünki iş adamı Ermənistanla yanaşı, Rusiya və Kipr vətəndaşıdır. Konstitusiyanın 148-ci maddəsində açıq şəkildə göstərilir ki, baş nazir vəzifəsinə namizəd son 4 il ərzində Ermənistan vətəndaşı olmalı və son 4 il ərzində Ermənistanda daimi yaşamalıdır. Bu o deməkdir ki, Samvel Karapetyan “Güclü Ermənistan” seçkiqabağı siyahısına daxil edilə bilməz. Buna görə də, yeni yaradılmış qüvvə seçkilərdə qalib gəlmək niyyətindədir, bundan sonra baş nazirlə bağlı konstitusiya müddəasını dəyişdirəcək və Samvel Karapetyana baş nazir olmaq imkanı verəcək. O vaxta qədər Narek Karapetyanın müvəqqəti lider və ya baş nazir vəzifəsini icra etməsi planlaşdırılır.Vardevanyan bu xüsusda bildirib: "Yol xəritəsi belədir ki, Narek Karapetyan siyahıya rəhbərlik edəcək, daha sonra isə konstitusiya dəyişikliyi prosesinə də rəhbərlik edəcək". Artur Ovannisyan bun cavabda qeyd edib: "İndi keçid koordinatoru statusundan danışan "Güclü Ermənistan" adlı partiya bilir ki, Ermənistan Konstitusiyasında belə bir şey nəzərdə tutulmur, ona görə də burada bütün məsələlər bağlanıb. Ermənistanda artıq "JEK" qəzeti ilə gəlib prezidentliyə namizəd ola biləcəyiniz dövrlər bitib". Parlament vasitəsilə Konstitusiya müddəasını dəyişdirmək niyyətlərinə gəldikdə isə, "Güclü Ermənistan"ın nümayəndələri xatırladır ki, bu yaxınlarda, 2018-ci ildə Konstitusiyanın 148-ci maddəsinin dəyişdirilməsində israr edən baş nazir Nikol Paşinyan olub. Aram Vardevanyan vurğulayıb ki, Nikol Paşinyanın o vaxt haqlı olaraq qeyd etdiyi kimi, 148-ci maddə, həqiqətən də, lazımsız məhdudiyyətləri ilə Konstitusiyada həqiqətən problemli bir maddədir. Yeri gəlmişkən, "Güclü Ermənistan" kampaniyası zamanı Konstitusiyaya düzəliş layihəsinin öz versiyası olacaq və bu, ictimaiyyətə təqdim olunacaq. Əgər 60 yaşlı milyarder iş adamı Samvel Karapetyanın seçkiqabağı siyahısına onun qardaşı oğlu başçılıq edirsə, təxminən 3 gün davam edən partiyadaxili seçkilərin nəticələrinə görə, hakim partiyanın 274 nəfərlik seçkiqabağı siyahısına Nikol Paşinyan başçılıq edir. Etibarlı 932 bülletendən 894-ü Nikol Paşinyanın lehinə olub. İkinci prezident Robert Köçəryanın rəhbərlik etdiyi qüvvənin baş nazir vəzifəsinə ehtimal olunan namizədi Robert Köçəryandır, lakin son qərar sorğular vasitəsilə veriləcək. "Çiçəklənən Ermənistan" Partiyasının lideri Qaqik Tsarukyan hələ də baş nazirliyə üç namizədinin adını gizli saxlayır.
Ramil QULİYEV
