Azər Həsrət: “...O protokollar açıqlanmalı, ictimaiyyətə məlumat verilməlidir”
Hazırda ev həbsində olan Ramiz Mehdiyev vaxtilə Prezident Administrasiyasının rəhbəri olmaqla yanaşı həm də Korrupsiyaya qarşı Mübarizə üzrə Komissiyanın sədri idi. Onun bu quruma rəhbərlik etdiyi dövrlə bağlı şübhəli məqamlar çoxdur. Əsas məsələlərdən biri isə R.Mehdiyevin rəhbərliyi dövründə bu qurumun hesabatlılıqdan yayınması, şəffaflıq prinsiplərinə əməl etməməsi barədə deyilənlərdir. Bu gün aktual olan məsələlərdən biri sözügedən qurumun iclaslarının protokollarının yayımlanması məsələsidir və əksəriyyət hesab edir ki, o protokollar ictimaiyyətə açıqlanmalıdır.
Ramiz Mehdiyevin bu komissiyanın sədri olduğu dövrə aid korrupsiya ilə mübarizəsinin hesabatı açıqlana bilərmi?Ramiz Mehdiyevin Korrupsiyaya qarşı Mübarizə üzrə Komissiyaya sədrliyi dövründə onun fəaliyyəti barədə İctimaiyyət nə bilir? Necə etmək olar ki, ictimaiyyətin bununla bağlı ətraflı məlumatı olsun? Korrupsiyaya qarşı Mübarizə üzrə Komissiyanın iclas protokollarını açıqlamaq olarmı?
Siyasi şərhçi Azər Həsrət baki-xeber.com-a bildirdi ki, söhbət korrupsiyaya qarşı mübarizədən gedirsə burada şəffaflıq və hesabatlılıq ön planda olmalıdır. “Hansısa bir şəxsin, yaxud Ramiz Mehdiyevin başçılığı ilə bu yöndə işlər həyata keçirilibsə o barədə ictimaiyyətə mütləq məlumat verilməlidir. Elə şeylər var ki, onlar gizli tutula bilər. Amma söhbət külli miqdarda dövlət vəsaitini mənimsəməkdən gedirsə bunun dövlət sii sayılacaq bir yönü yoxdur. Ümumiyyətlə, bunun gizli saxlanılması doğru deyil. Hesab edirəm ki, korrupsiya ilə mübarizə sahəsində aparılmış işlər ictimayyətə açıqlamalıdır. Eyni zamanda b burada Ramiz Mehdiyevin oynadığı rol ayrıca araşdırılmalıdır. İndi istintaq aparılır. Araşdırma Ramiz Mehdiyevin orada özünü necə apardığını müəyyənləşdirməlidir. Korrupsiya elə bir bəladır ki, onunla mübarizə aparan şəxslər kristal, təmiz adam olmalıdır. Amma biz görürük ki, Ramiz Mehdiyev kimi bir nadürüst uzun illər bu işin başında durub. Əlbəttə, burada şübhə üçün yer var ki, elə taladığı milyonlar onun bir tərəfdən də korrupsiyaya qarşı “mübarizə”sinin nəticəsidir.
Ona görə də düşünürəm ki, hesabatlılıq, şəffaflıq baxımından mütləq o protokollar açıqlanmalı, ictimaiyyətə məlumat verilməlidir”.
Bunun üçün tələblər irəli sürülməli olduğunu deyən A.Həsrətin sözlərinə görə, korrupsiya ilə mübarizə aparan qurum hesabatlılıq məsələsində “sinifdə qalmamalıdır”, yəni bu cür şeylər şəffaf olmalıdır.
İradə SARIYEVA
