Vüqar Bayramov: “Zəngəzur dəhlizi region üçün iqtisadi baxımdan yeni imkanlar vəd edir”
Prezident İlham Əliyev Münhendə “Açıq dəhliz siyasəti? Trans-Xəzər əməkdaşlığının dərinləşdirilməsi” mövzusunda panel müzakirələrdə bildirib ki, TRIPP tamamilə yeni vəziyyət yaradacaq:
“Çünki Çindən başlayan daşımalar Mərkəzi Asiya, Trans-Xəzər regionu, Azərbaycan, Ermənistan, eksklav Naxçıvan, Türkiyə və sonra Avropanı əhatə edəcək. Bu, bütün ölkələr üçün faydalı olacaq. Marşrut boyunca bütün ölkələr həm siyasi, həm iqtisadi baxımdan daha sıx inteqrasiya olunacaq və həmin addım Azərbaycan ilə Ermənistan arasında uzunmüddətli və əbədi sülhə növbəti töhfə olacaq”.
Bir sözlə, məlum olur ki, Çindən Avropaya qədər Azərbaycan üzərindən daşımalar həyata keçiriləcək və bunun çoxsaylı faydaları olacaq.
Sözügedən məsələni baki-xeber.com-a şərh edən millət vəkili Vüqar Bayramovun fikrincə, TRIPP layihəsi yalnız region ölkələri üçün deyil, bütövlükdə qitə üçün vacib bir layihədir: “Çünki sözügedən layihə bir tərəfdən beynəlxalq dəhlizlərə inteqrasiya olunacaq. Nəticə etibarı ilə daha çox yüklərin region üzərindən daşınmasına imkan yaradacaq. Bu, həm regionun geosiyasi mövqeyinin güclənməsinə, həm də region dövlətlərinin gəlirlərinin artmasına imkan yaradacaq. Çünki nəticə etibarı ilə region dövlətlərinin gəlirlərində də bu konteksdə artımları müşahidə edəcəyik. Eyni zamanda bu, bölgədə dayanıqlı sülhün dəstəklənməsi baxımından da vacibdir. Çünki bu, Azərbaycanla Ermənistan arasında dayanıqlı sülhün əldə edilməsinə və bütövlükdə sülh gündəliyinin daha yaxından dəstəklənməsinə imkan verəcək. Bu konteksdən TRIPP məhz regionun inkişafına hesablanmış bir layihədir. İlkin qiymətləndirmələr göstərir ki, TRIPP dəhlizinin ötürmə qabiliyyəti birinci mərhələdə 15 milyon ton olacaq. Daha sonra bu rəqəmin 20-25 milyon tonadək artırılması da mümkün olacaq. Nəticədə, bütövlükdə region üzərindən daşınan yüklərin həcminin artması fonunda, Azərbaycanın beynəlxalq yükdaşımalardan əldə etdiyi gəlirlərin artmasına səbəb olacaq. Ona görə də Zəngəzur dəhlizi region üçün iqtisadi baxımdan yeni imkanlar vəd edir”.
Vidadi ORDAHALLI
