Təbriz Musayev: “Yalnız Qərbi azərbaycanlıların qayıdışı fonunda, ermənilər Qarabağa qayıda bilər”
Prezident İlham Əliyev “France 24” telekanalına müsahibəsində Qarabağı tərk edən ermənilərin hansı halda qayıda biləcəyini belə əsaslandırdı:
“Bizim bu məsələ ilə bağlı mövqeyimiz çox aydın olub. Bizim Qarabağda yaşayan bütün ermənilərə vətəndaşlıq və ya iş icazəsi üçün müraciət etməyi təklif etdiyimiz dəfələrlə səsləndirilib, o cümlədən veb-saytda dərc olunub. Bugünkü Ermənistan ərazisindən deportasiya edilmiş və etnik təmizləməyə məruz qalmış yüz minlərlə azərbaycanlımız var, lakin Ermənistan hökuməti onların geri qayıtması üçün heç vaxt heç bir təklif irəli sürməyib. Düşünürəm ki, bu məsələyə qarşılıqlı nöqteyi-nəzərindən yanaşmalıyıq. Qayıdış hüququ universal bir hüquqdur və əlbəttə ki, bizə belə bir müraciət olarsa, Azərbaycan bu hüquqa mütləq əməl edəcək. Lakin, eyni zamanda, 30 il Ermənistanla müharibə şəraitində olduğumuzu və 30 il ərzində onların ərazimizi işğal altında saxladığını nəzərə alsaq, Qərbi azərbaycanlılar adlandırdığımız yüz minlərlə azərbaycanlıya qarşı da eyni münasibəti gözləyirik ki, bugünkü Ermənistana qayıda bilsinlər”.
Sözügedən məsələni baki-xeber.com-a şərh edən İrəvan Azadlıq Təşkilatının sədri Təbriz Musayev hesab edir ki, bu, sözügedən məsələdə ən doğru və ədalətli yanaşmadır: “Son illər müxtəlif beynəlxalq tədbirlərdə, müəyyən görüşlərdə erməni tərəfi Qarabağı könüllü tərk edən ermənilərin qayıdışı məsələsini gündəmə gətirir. Bütün vasitələrlə çalışırlar ki, bu məsələ gündəmdən düşməsin. “France 24” telekanalının bununla bağlı məsələni gündəmə gətirməsi də sözügedən siyasətin tərkib hissəsidir. Fransa hər zaman ermənilərin maraqlarından çıxış edən ölkə olub. Onların imkanı çatsaydı, Azərbaycanın öz ərazi bütövlüyünü və suverenliyini təmin etməsinə mane olardılar. Sadəcə, gücləri çatmadı buna. İyirminci əsrdə yüz minlərlə azərbaycanlı müxtəlif vaxtlarda Qərbi Azərbaycandan deportasiya edilib. İnsan hüquqlarından, ali dəyərlərdən dəm vuran Avropa təsisatları bir dəfə olsun bu məsələyə toxunmayıblar. Bir dəfə olmayıb ki, Avropa ölkələrinin telekanallarında Qərbi azərbaycanlılar məsələsinə toxunulsun. Ancaq hər fürsətdə Qarabağ ermənilərinin qayıdışını gündəmə gətirirlər. Ona görə də hesab edirəm ki, bu məsələdə heç vaxt birtərəfli güzəştdən söhbət gedə bilməz. Prezident Əliyevin ortaya qoyduğu formul ədalətə söykənir. Yalnız Qərbi azərbaycanlıların qayıdışı fonunda, ermənilər Qarabağa qayıda bilər”.
Vidadi ORDAHALLI
