Əli Orucov: “Fransa müharibəyə qədər ona görə müəyyən məqamlara diqqət edirdi ki, Azərbaycan işğalla barışsın”
Prezident İlham Əliyev “France 24” telekanalına müsahibəsində bəyan edib ki, Fransa ilə problemlərin kökü bizdən gəlmir:
“İkinci Qarabağ müharibəsindən əvvəl Fransa ilə çox yaxşı münasibətlərimiz var idi. Prezident Sarkozinin, Prezident Ollandın səfərləri olmuş, mənim Fransaya rəsmi səfərlərim həyata keçirilmişdir. Eyni zamanda, mən Prezident Makronun hakimiyyəti dövründə Fransaya səfər etmişəm. Bizim çox mehriban münasibətlərimiz olub, çox biznes fəaliyyəti aparılıb, 10-dan artıq qardaşlaşmış şəhərlərimiz olub. İkinci Qarabağ müharibəsi başlayan zaman biz ərazi bütövlüyümüzün bərpasına start verdik. Onlar separatçıların tərəfini tutdular. Milli Assambleya və Senat separatçılara dəstək məqsədilə 10-dan artıq qətnamə qəbul edib və Ermənistanın özü tanımasa belə, sizin parlament hətta qondarma “Dağlıq Qarabağ”ı tanıyıb”.
Sözügedən məsələ ilə bağlı fikirlərini bakı-xeber.com-la bölüşən AMİP funksioneri Əli Orucov hesab edir ki, son 4-5 ildə Fransa Azərbaycana qarşı ən qərəzli, ədalətsiz dövlət olub: “Bəli, 2020-ci ildə Vətən müharibəsi başlanana qədər Azərbaycanla Fransa arasında müəyyən normal münasibətlər var idi. Fransa şirkətləri Azərbaycanda iqtisadi fəaliyyətlə məşğul olurdular, bir sıra layihələrdə fəal iştirak edirdilər və s. Ancaq bütün bunların fonunda Fransa ərazilərimizin işğaldan azad edilməsi ilə bağlı Ermənistana heç bir təsir etmədi. Fransa müharibəyə qədər ona görə müəyyən məqamlara diqqət edirdi ki, Azərbaycan işğalla barışsın. Rəsmi Paris güman edirdi ki, Azərbaycan əvvəl-axır işğalla barışacaq və Birinci Qarabağ müharibəsinin nəticələrini qəbul edəcək. Əslində Fransanın əsl siyasəti bunun üzərində qurulmuşdu və eyni zamanda əsl niyyətlərini maskalamışdılar. İkinci Qarabağ müharibəsinin başlanması və onun nəticələri Fransanın məkrli planlarını pozdu. Fransanın əsl siması ortaya çıxdı. O vaxta qədər Fransa ilə qurulan münasibətlər, əlaqələr heçə endirildi. Bütün bunlara baxmayaraq, Fransa Azərbaycanın ərazilərini işğaldan azad edilməsinə mane ola bilmədi. Artıq Fransa yenidən Azərbaycanla normal əlaqələr qurmağa can atır. Artıq anlayırlar ki, yaranan reallıqları dəyişmək olmaz”.
Vidadi ORDAHALLI
