Züriyə Ruslanqızı: “Azərbaycan Prezidenti konkret faktlar və diplomatik prosedurlar üzərindən danışır, Rusiya isə nəticəyə dair siyasi mövqe sərgiləyir”
Prezident İlham Əliyev Münxen Təhlükəsizlik Konfransı çərçivəsində baş tutan “Açıq dəhliz siyasəti? Trans-Xəzər əməkdaşlığının dərinləşdirilməsi” mövzusunda panel müzakirəsində deyib ki, Azərbaycanın Ukraynadakı səfirliyinə Rusiya tərəfindən 3 dəfə zərbə olub: “Birinci hücuma gəldikdə elə bilirdik, bu, təsadüfi olub. Daha sonra Rusiya tərəfinə Azərbaycanın diplomatik nümayəndəlikləri, konsulluq şöbəsinin, mədəni mərkəzin, səfirliyin koordinatlarını vermişdik. Ondan əlavə, iki hücum olub. Beləliklə, bu, Azərbaycanın diplomatik nümayəndəliyinə qəsdən edilmiş bir hücum idi”.
Prezident xatırladıb ki, bununla bağlı Azərbaycanın bəyanatı olub, səfir dəvət olunub, diplomatik nota verilib:
“Yalnız diplomatik formatda addımlar atdıq. Əlavə hər hansı iş görə bilmərik”.
Bu hücumlarım qəsdən edildiyi şübhə doğurmur.
Rusiya XİN Prezident İlham Əliyevin Azərbaycanın Kiyevdəki səfirliyinə Rusiyanın qəsdən zərbə endirməsi barədə bəyanatından “təəccüblənib”.
Rusiya XİN-dən TASS agentliyinin sualına cavab olaraq bildirilib. Qeyd edilib ki, Azərbaycan tərəfinə bununla bağlı izahat verilib və “təəssüf” ifadə edilib.
Rusiya XİN növbəti dəfə guya səfirliyə dəyən ziyanın Ukraynanın HHM sistemlərinin raketlərinin, xüsusilə “Patriot” raketinin qalıqları ola biləcəyi haqda iddianı da təkrarlayıb.
Bir sözlə, Rusiya XİN iddia edib ki, İlham Əliyev guya düz demir.
Düz deməyən kimdir, İlham Əliyev, yoxsa Rusiya?
“Təqdim olunan faktların məntiqi ardıcıllığı İlham Əliyevin mövqeyini daha inandırıcı göstərir”
Politoloq Züriyə Ruslanqızı (Qarayeva) baki-xeber.com-a bildirdi ki, bu məsələdə “kim düz deyir” sualına emosional yox, faktoloji və diplomatik prizmadan baxmaq lazımdır. “İlham Əliyev Münxen Təhlükəsizlik Konfransı kimi beynəlxalq platformada danışarkən konkret ardıcıllıq təqdim edir: əvvəl hücum, sonra koordinatların rəsmi şəkildə Rusiya tərəfinə ötürülməsi və bundan sonra yenə iki zərbə. Diplomatik nümayəndəliklərin ünvanları əvvəlcədən bildirilmişkən təkrar hücumların baş verməsi “təsadüf” arqumentini ciddi şəkildə zəiflədir. Üstəlik, Azərbaycan tərəfi emosional eskalasiyaya getməyib, səfir çağırılıb, nota verilib, yəni beynəlxalq hüququn çərçivəsində hərəkət edilib. Bu da Bakının mövqeyinin spontan yox, ölçülüb-biçilmiş olduğunu göstərir.
Rusiya tərəfinin “İlham Əliyev düz demir” reaksiyası isə daha çox siyasi müdafiə refleksi kimi oxunur. Müharibə şəraitində diplomatik obyektlərin hədəfə alınması beynəlxalq hüquq baxımından ağır məsuliyyət doğurduğu üçün Moskva bu ittihamı qəbul edə bilməz. Lakin inkar faktın avtomatik olaraq yanlış olduğu anlamına gəlmir. Burada əsas məqam ondan ibarətdir ki, Azərbaycan Prezidenti konkret faktlar və diplomatik prosedurlar üzərindən danışır, Rusiya isə nəticəyə dair siyasi mövqe sərgiləyir. Bu baxımdan məsələ “söz savaşı” deyil, etibar və məsuliyyət məsələsidir və təqdim olunan faktların məntiqi ardıcıllığı İlham Əliyevin mövqeyini daha inandırıcı göstərir”-deyə Z.Ruslanqızı qeyd etdi.
İradə SARIYEVA
