Arzuxan Əlizadə: “Praqada Paşinyan Rusiyanın Qarabağla bağlı 200 illik mənfur siyasətinin üstündən xətt çəkdi”
Ermənistanın baş naziri Nikol Paşinyan Rusiya prezidenti Vladimir Putinlə bağlı diqqətçəkən ittiham səsləndirib. O bildirib ki, Qarabağı Azərbaycanın tərkib hissəsi kimi tanımaq qərarını məhz Putinin mövqeyindən sonra vermək məcburiyyətində qalıb. Paşinyanın sözlərinə görə, o bu addımı Vladimir Putinin regionun Bakıya məxsus olduğunu iki dəfə - həm şəxsən, həm də açıq şəkildə təsdiqləməsindən sonra atıb. Ermənistan baş naziri qeyd edib ki, bu bəyanatlar onun qərarına birbaşa təsir göstərib.
Açıq hiss edilir ki, Putinlə Paşinyanın son görüşü çox gərgin keçib. Çünki tərəflərin danışıq tonu və ifadə tərzi bunu əyani şəkildə ortaya qoydu. Paşinyan 6 oktyabr 2022-ci ildə Praqada Qarabağı Azərbaycanın ərazisi kimi tanıdı. Oktyabrın sonunda Putin Valdayda keçirilən tədbirdə Paşinyanın bu addımını çox heyrətlə qarşıladı və buna görə Nikolu tənqid etdi. O zaman Putin dedi ki, əslində Rusiyanın məqsədi ətraf 5 rayonu qaytarmaq, Qarabağın statusu məsələsini isə sonrakı illərə saxlamaq idi. Ancaq Putin Praqa görüşünün səhərisi mətbuatdan xəbət tutub ki, Paşinyan Qarabağı Azərbaycanın tərkib hissəsi kimi tanıyıb və buna görə bərk təəccüblənib. Halbuki, Paşinyanın bu addımı doğru idi. Moskvada Putinin bu məsələyə təkrarən qayıtması Paşinyanı qəzəbləndirib. Paşinyan bildirib ki, Putinin regionun Bakıya məxsus olduğunu iki dəfə - həm şəxsən, həm də açıq şəkildə təsdiqləməsindən sonra atıb. Putin Paşinyanın bu ittihamına cavab verməyib və yaxud da cavab verməyə arqument tapa bilməyib.
Məsələ ondadır ki, bəli, 2020-ci ilin noyabrın 10-da 44 günlük müharibə bitəndən sonra Putin bəzi müsahibələrində Qarabağın Azərbaycana məxsus olduğunu deyib. Təxminən Putinin açıqlaması o zaman belə olub: “Beynəlxalq hüquqa görə Qarabağ Azərbaycan ərazisidir”.
Paşinyan yaxşı bilir ki, Putin erməniləri ona qarşı qaldırmaq üçün yerli-yersiz Praqada Qarabağla bağlı ortaya qoyduğu mövqeyi xatırladır. Ona görə belə sərt tonda əks arqument ortaya qoyur.
Sözügedən məsələni baki-xeber.com-a şərh edən AMİP sədri, millət vəkili Arzuxan Əlizadənin fikrincə, Praqada Paşinyanın ortaya qoyduğu mövqe Rusiyanın Qarabağla bağlı 200 illik mənfur siyasətinin üstündən xətt çəkdi: “Putinin bu qədər qəzəbli olmasının kökündə bu dayanır. Məhz buna görə Paşinyanı bağışlaya bilmir. Məsələ ondadır ki, erməniləri Qarabağa köçürən, tarixi ərazilərimizi ermənilərə verən, yoxdan Ermənistan yaradan Rusiya olub. Onların imperiya siyasətinin mahiyyəti olaraq Göyçə, Zəngəzur Ermənistana peşkəş edilib. Azərbaycanla Türkiyənin birbaşa quru əlaqəsi süni olaraq kəsilib. 1923-cü ildə Qarabağa Muxtar Vilayət statusunun verilməsi, ermənilərin başımıza bəla olması Rusiyanın imperiya siyasəti olub. Həmin imperiya siyasətinin davamı olaraq “demokrat” Boris Yeltsinin prezidentliyi dövründə Xocalı soyqırımı törədildi. Şuşa və Qarabağın ətrafında yerləşən 7 rayon işğal edildi. Hamı bilirdi ki, Rusiyanın hesabına Ermənistan ərazilərimizi işğal edib, xalqımıza divan tutub. Paşinyan Azərbaycanın hərbi qələbəsi hesabına Qarabağı Azərbaycanın ərazisi kimi tanıdı. Bu həmin Paşinyan idi ki, 2019-cu ilin avqustunda Xankəndində “Qarabağ Ermənistandır” deyib çığırırdı. Qarabağ məsələsinin qalması isə Putnə hər iki ölkəyə təzyiq etmək üçün lazım idi, amma alınmadı. Ona görə də Putin hələ də “tüstülənir”.
Vidadi ORDAHALLI
