Məhərrəm Zülfüqarlı: “Zaxarova yaxşı bilir ki, Ermənistana ən böyük hibrid təhdid Rusiyadan qaynaqlanır”
“Rusiya hibrid təhdidlərə qarşı mübarizədə Ermənistanla əməkdaşlığa hazırdır”. Bu barədə Rusiya Xarici İşlər Nazirliyinin sözçüsü Mariya Zaxarova bildirib.
“Rusiyanın geniş imkanları var, amma bu, ikitərəfli yoldur. Maraq və ehtiyac olarsa, Rusiya informasiya təhlükəsizliyi, kibercinayətkarlıqla mübarizə və beynəlxalq platformalarda əməkdaşlıq sahələrində əməkdaşlığa hazırdır”, - o, brifinqdə deyib.
Zaxarova Ermənistanla sanki məzələnir. Məgər Ermənistanın haradan hibrid hücumları gözlədiyi məlum deyil ki? Axı İrəvan bundan əvvəl iyunun 7-də keçiriləcək parlament seçkiləri ilə əlaqədar Rusiyadan hibrid hücumlarla mübarizədə Avropa İttifaqından kömək istəyib və Brüssel müraciəti qəbul edərək, müvafiq yardımın ediləcəyini bəyan edib. Üstəlik, bununla bağlı 20 milyon avro da ayrılıb.
Sözügedən məsələ ilə bağlı fikirlərini baki-xeber.com-la bölüşən tarix elmləri doktoru, professor Məhərrəm Zülfüqarlı hesab edir ki, son vaxtlar Rusiya-Ermənistan münasibətlərində çoxsaylı ziddiyyətlər özünü göstərməkdədir: “Bunun da əsas səbəbi ABŞ-ın İsraillə İrana qarşı başladığı müharibədən sonra Rusiya siyasəti əsas tənqid hədəfi olmaqdan çıxıb. İranla başlayan müharibə, Rusiyanın Ukraynada apardığı işğalçı müharibədən diqqəti bir qədər yayındırdı. Əvvəl elə idi ki, Ukraynada gedən müharibədə insanlar demokratiyanın beşiyi ABŞ-a ümid bəsləyirdilər. İndi isə insanlar bu məsələdə məyusluq içindədirlər. Çünki Trampın apardığı siyasət dünyanı xaosa aparır. Təbii ki, bu da Rusiyanın xeyrinədir. Digər tərəfdən, ötən ilin avqustunda Vaşinqtonda Azərbaycan və Ermənistan dövlət başçılarının sülh sazişinin bəndlərini paraflaması mühüm hadisə idi. Həm də ona görə ki, Ermənistan Zəngəzur dəhlizinin (Tramp marşrutu) çəkilməsi öhdəliyini götürdü. İranda gedən müharibə istər-istəməz dəhlizin çəkilməsi prosesinin yubanmasına təsir göstərir. Bu da Rusiyanın əl-qol açmasına imkan verir. Rusiya bundan istifadə edərək parlament seçkiləri ərəfəsində Ermənistan hakimiyyətinə təzyiqləri artırır. Bunların başında da hibrid təzyiqlər gəlir. Məqsəd Ermənistanda Moskvaya bağlı qüvvələri hakimiyyətə gətirməkdir. Zaxarova çox yaxşı bilir ki, Ermənistana ən böyük hibrid təhdid Rusiyadan qaynaqlanır. Belə olmasa Ermənistan Avropa İttifaqından bununla bağlı niyə yardım istəsin ki? Sadəcə Zaxarova ictimai rəyi çaşdırmaqdan ötrü belə fikirlərlə çıxış edir. Riyakarlıq edərək Ermənistanı hibrid hücumlardan müdafiəyə hazır olduğunu bildirməsi gülünc səslənir. Çünki Ermənistana qarşı bu hücumlar ancaq Rusiyadandır. Bunu da hamı bilir. Məqsəd də Paşinyan hakimiyyətini dəyişmək və revanşistləri hakimiyyətə gətirməkdir. O üzdən, 7 iyun seçkiləri elə də asan başa gəlməyəcək. Baxmayaraq ki, Rusiya zəifləyib, amma bütün təxribatçı qüvvələri Moskva işə salacaq. Vəziyyət dəyişsə, bu, Azərbaycanın ziyanına olacaq”.
Vidadi ORDAHALLI
