Zaur İbrahimli: “Paşinyan indiyə qədər apardığı ideoloji konsepsiyaya sadiq qalaraq bu məsələnin birdəfəlik bağlandığını və həll olunduğunu qeyd edib”
Ermənistanın Baş naziri Nikol Paşinyan Rusiya Prezidenti Vladimir Putinlə görüşündə bildirib ki, Qarabağın Ermənistana qaytarılması hərəkatı davam edə bilməz. “Qarabağla bağlı məsələlərə gəldikdə, mən artıq Ermənistan Respublikasında çox şəffaf və açıq şəkildə bildirmişəm ki, biz Qarabağ hərəkatını davam etdirməməliyik, çünki Ermənistan və Azərbaycan arasında artıq sülh bərqərar olub", - deyə o qeyd edib.
Paşinyan həmçinin xatırladıb ki, Ermənistan və Azərbaycan 1991-ci il Almatı Bəyannaməsinə əsasən bir-birinin ərazi bütövlüyünü, siyasi müstəqilliyini və suverenliyini tanıyıblar. O bildirib ki, müstəqil Ermənistanın Sovet Ermənistanı ilə 100%, müstəqil Azərbaycanın isə Sovet Ermənistanı ilə eyni olduğu qarşılıqlı şəkildə tanınır. Ermənistanın Baş naziri əlavə edib ki, bu mövqe gələcək qlobal inkişaf üçün möhkəm təməl yaradır.
Çox maraqlıdır ki, Paşinyan Putinlə birbaşa danışıqlarda nə üçün “biz Qarabağ hərəkatını davam etdirməyəcəyik” deyib? Bununla Paşinyan Putinə nə demək istəyir?
Politoloq Zaur İbrahimli baki-xeber.com-a bildirdi ki, Paşinyanın Moskva səfəri çox diqqət çəkən mesajlarla yadda qaldı. “Bunlardan ən mühümü Paşinyanın Qarabağ hərəkatı ilə bağlı açıqlamasıdır. Ermənistanın Baş naziri bununla göstərdi ki, Moskva ilə sövdələşməyə getmək niyyətində deyil. Rusiya prezidenti Putinin mövzu ilə bağlı açıqlamalarını təhlil etdikdə belə qənaətə gəlmək olur ki, çox güman, Paşinyana pərdəarxasında sövdələşmə təklif edilib. Bu sövdələşmənin də predmetində Rusiya maraqlarının tanınması, Paşinyanın öz siyasətini dəyişməsi müqabilində Ermənistanın Qarabağ “ideyasının” dəstəklənməsi, bu məsələnin yenidən aktuallaşdırılması və Kreml tərəfindən həm siyasi, həm informasiya-ideolji, həm də digər baxımdan dəstəklənməsi ilə bağlı təklif durur.
Lakin Paşinyan indiyə qədər apardığı ideoloji konsepsiyaya sadiq qalaraq bu məsələnin birdəfəlik bağlandığını və həll olunduğunu qeyd edib. Bu həm də Paşinyanla sövdələşmənin nəticəsiz qaldığını göstərir. Lap geniş kontektdə baxsaq Paşinyanın özünün Kremlə dəvət olunması da Moskvanın siyasi üsullarla Ermənistanda mövqelərini möhkəmlədə və əvvəlki üstünlüyünü bərpa edə bilməyəcəyi anlamına gəlir. Paşinyanın opponentlərinin perspektivi olsaydı o indiki məqamda heç bir halda dəvət ala bilməzdi.
Bu dəvətin də edilməsində məqsəd ona imtina edə bilməyəcəyi təklif irəli sürülməsi olub”.
Z.İbrahimlinin fikrincə, bu təklifdə Qarabağ məsələləsi, Paşinyan iqtidarının yenidən hakimiyyətdə qalmasına, növbəti seçkilərdə qalib gəlmələrinə mane olmamaq kimi məsələlər durur ki, o, isə bu təklifi qəbul etməyib.
Z.İbrahimli hesab edir ki, Paşinyanın mövqeyinin Rusiya tərəfindən yayılması bir neçə məqsədə xidmət edir. O, hesab edir ki, Paşinyan sövdələşməyə getsəydi Rusiya tərəf bu xəbəri örtülü şəkildə yayardı.
“Bu məsələni geniş yaymaqla həm də öz ideoloji təbliğatları baxımından Ermənistan cəmiyyətinə mesaj vermək istəyirlər ki, “baxın, Paşinyanın komandası Qarabağdan tamamilə imtina edib, baxmayaraq ki, biz məsələni bağlanmış hesab etmirik, dəstək verməkdə davam edirik, ancaq bu məsələdən imtina edən Paşinyandır”.Yəni Rusiya tərəf bu mesajı Ermənistan cəmiyyətinə ötürür”-deyə Z.İbrahimli qeyd etdi.
İradə SARIYEVA
