Bəhruz Quliyev: “Kremlin Ermənistan daxilində siyasi konfiqurasiyaya təsir imkanlarını qoruyub saxlamaq istədiyini göstərir”
Ermənistanın Baş naziri Nikol Paşinyanla Rusiya prezidenti Vladimir Putin arasında Kremldə keçirilən görüşdə diqqət çəkən məqamlar baş verib, mesajlar səsləndirilib. Xüsusən də bu ilin iyun ayında Ermənistanda keçiriləcək parlament seçkiləri müzakirə olunub, Rusiya prezidenti ruspərəst qüvvələrin seçkilərə buraxılması arzularını gizlətməyib. Putin Paşinyandan Rusiya vətəndaşı olan və ruspərəst mövqeyi ilə seçilən müxalif siyasi qüvvələrin iyunda keçiriləcək seçkilərdə iştirakına şərait yaradılmasını istədi. Paşinyan isə cavabında açıq bildirdi ki, Ermənistan konstitusiyası xarici ölkə pasportu daşıyan vətəndaşlara seçki hüququ, eləcə də Baş nazir olmaq hüququ tanımır. Yəni Paşinyan Putinə birbaşa dedi ki, Ermənistan pasportu daşımayan şəxslər seçkiyə buraxılmayacaq, Ermənistanda demokratiya var, azad seçkilər keçirilir və sair.
Yəni Putinin “müəyyən adamların seçkidə iştirakına şərait yaradın” fikrinə Paşinyan “yox” dedi.
Putinin Paşinyandan belə bir tələbdə bulunması nə qədər doğru mövqedir? Bu Ermənistanın daxili işə qarışmaq deyilmi?
“Ermənistanın Baş naziri Nikol Paşinyanın seçki ərəfəsində Rusiyaya səfəri və Kremlin rəhbəri Vladimir Putinlə apardığı danışıqlar regionun geosiyasi arxitekturası baxımından diqqətlə təhlil olunmalıdır. Bu səfərin əsas məqsədi, şübhəsiz ki, Rusiyanın siyasi mövqeyini yumşaltmaq və mümkün təzyiq elementlərini minimuma endirmək cəhdidir.
Məhz bu kontekstdə Vladimir Putinin “müəyyən şəxslərin seçkilərdə iştirakına şərait yaradılması” ilə bağlı mesajı təsadüfi sayıla bilməz. Bu, bir tərəfdən demokratik çağırış kimi təqdim edilsə də, digər tərəfdən Kremlin Ermənistan daxilində siyasi konfiqurasiyaya təsir imkanlarını qoruyub saxlamaq istədiyini göstərir. Başqa sözlə, bu bəyanat Moskvanın seçki prosesinə dolayı təsir rıçaqlarını açıq saxlamaq niyyətinin ifadəsidir.
Paşinyanın bu çağırışa verdiyi cavabı isə yəni, Ermənistan vətəndaşlığı olmayan şəxslərin seçkilərdə iştirakına imkan verilməyəcəyi və ölkədə demokratiya prinsiplərinin təmin olunduğu barədə bəyanatı ilk baxışda prinsipial mövqe kimi görünsə də, əslində daha çox siyasi manevr təsiri bağışlayır. Çünki Paşinyan bir tərəfdən daxili auditoriyaya suverenlik mesajı verir, digər tərəfdən isə Moskva ilə münasibətləri kəskinləşdirməməyə çalışır". Bu fikirləri Səs qəzetinin baş redaktoru, siyasi ekspert Bəhruz Quliyev baki-xeber.com-a deyib.
“Burada əsas məqam ondan ibarətdir ki, Paşinyanın Moskvaya səfəri mahiyyət etibarilə müdafiə xarakterli diplomatik addımdır. O, seçki öncəsi Kremlin mümkün siyasi və ya informasiya təsirinin qarşısını almaq, ən azı onu neytrallaşdırmaq məqsədi güdür. Bu isə Ermənistanın hələ də Rusiyanın təsir dairəsindən tam çıxa bilmədiyini və daxili siyasi proseslərin belə xarici faktorlarla sıx bağlı olduğunu bir daha təsdiqləyir.
Düşünürəm ki, Putinin səsləndirdiyi fikirlər formal olaraq demokratik çərçivədə təqdim olunsa da, real siyasətdə bu, təsir imkanlarının nümayişidir. Paşinyanın Moskvaya səfəri isə bu təsiri zəiflətmək, Kremlin mövqeyini yumşaltmaq və seçki prosesini mümkün qədər nəzarətdə saxlamaq cəhdidir. Bu qarşılıqlı mesajlaşma göstərir ki, Ermənistanın daxili siyasi gündəliyi belə artıq regional və qlobal güclərin maraqlarından kənarda formalaşır, "-deyə ekspert əlavə edib.
İradə SARIYEVA
