Mehman İsmayılov: “Paşinyanın bunu açıq bəyan etməkdə məqsədi Samvel Karapetyanın…”
“Daxili siyasi proseslərimizə gəldikdə isə, bilirsiniz ki, Ermənistan demokratik ölkədir və demək olar ki, həmişə siyasi proseslər olur və bu, bizim üçün adi hala çevrilib”. Ermənistanın Baş naziri Nikol Paşinyan bunu Rusiya Prezidenti Vladimir Putinlə görüşdə bildirib. "Biz əsasən ildə iki dəfə seçkilər keçiririk, bələdiyyə seçkiləri və onlar da çox siyasiləşdirilib, çünki siyasi islahatların nəticələrinə əsasən, oradakı insanlar siyasi partiyalara və ya lehinə səs verirlər", - Paşinyan bildirib.
O qeyd etdi ki, ölkədəki yüksək siyasi fəaliyyət mübahisəli şəkildə qəbul edilir.
"Yəni, vətəndaşlarımızın çoxu - çox olmasa da, vətəndaşlar var - Ermənistanda həddindən artıq demokratiyanın olduğunu düşünür, amma bu, bizim üçün prinsip məsələsidir", - deyə Paşinyan vurğuladı.
Paşinyan informasiya məkanında azadlıq səviyyəsinə də diqqət çəkdi. "Məsələn, sosial mediamız 100% azaddır, heç bir məhdudiyyət yoxdur və bir çox vətəndaş bunun həddindən artıq olduğunu düşünür", - o dedi.
Paşinyan xüsusilə qeyd etdi ki, ölkədə siyasi fiqurların təqibi praktikası yoxdur.
"Ümumi kontekstdə, açığı, siyasi prosesdə uzaqdan iştirak edənlər yoxdur", - deyə o bildirib.
Ermənistanın Baş naziri həmçinin qarşıdan gələn parlament seçkilərinə toxunaraq, onların ölkənin siyasi sistemi üçün əsas əhəmiyyətini vurğulayıb. "Qeyd etmək istərdim ki, məsələn, qarşıdan parlament seçkiləri gəlir - deputat seçkiləri - və bu seçkilərin nəticələrinə əsasən, bu, mahiyyət etibarilə de-fakto baş nazirin seçilməsidir", - deyə Paşinyan qeyd edib.
O, namizədlər üçün konstitusiya tələblərini xatırladıb: “Diqqətinizə çatdırmaq istəyirəm ki, bu seçkilərdə yalnız Ermənistan pasportuna malik vətəndaşlar iştirak edə bilər. Yəni, bütün hörmətlə qeyd edək ki, Ermənistan Respublikası Konstitusiyasına əsasən, Rusiya pasportuna malik olanlar parlament və ya baş nazir vəzifələrinə namizəd ola bilməzlər, ona görə də heç bir məhdudiyyət yoxdur."
Ən maraqlısı odur ki, Paşinyan Rusiya pasportları daşıyanların Ermənistanda səs verə bilməyəcəklərini deyib. Paşinyan "rus pasportu daşıyanlar nə səsvermədə iştirak edə, nə də namizədliklərini verə bilərlər” sözünü Putinə niyə dedi?
Politoloq Mehman İsmayılov baki-xeber.com-a bildirdi ki, Paşinyanın Moskvaya dəvət edilməsi seçki qabağı ona təzyiq göstərmək məqsədi daşıyırdı. “Hər kəs bilir ki, Ermənistanda Paşinyan hakimiyyətinin müxalifliyində dayanan əsas qüvvə Kremldir, əsas qüvvə Putindir, onun yerlərdəki nökərləri və casusları isə Samvel Karapetyan və Robert Köçəryandır. Kremlin əsas oyunçusu Samvel Karapetyandır ki, indi ev dustaqlığındadır, ancaq o, Rusiya vətəndaşıdır. Ehtiyat variant kimi də insanlıq əleyhinə vəhşiliklər, cinayətlər törətmiş Robert Köçəryanı da irəli sürüblər ki, erməni kilsəsinin və daşnakların Rusiyanın agentura şəbəkəsinin dəstəyi ilə onun baş nazir kürsüsünə sürüyüb gətirsinlər. Amma Putinin dostu olan Robert Köçəryan, bu insanlıq düşməni, bu cani erməni cəmiyyətinin içində çox aşağı reytinqə malikdir və onun qələbə çalıb baş nazir olması bir ilğımdır. Bunu Kreml hakimiyyəti anladığına görə Samvel Karapetyanın namizədliyinin qeydə alınması məsələsini irəli sürüb. Çünki Rusiya maraqlıdır ki, revanşistləri, Rusiyaya xidmət edən casus və cani şəbəkəsini hakimiyyətə gətirib Ermənistanla Azərbaycan arasında gedən nizamlama və sülh prosesini sıfırlasınlar, yenidən Azərbaycanın Qarabağ bölgəsini mübahisələndirib, burada idarəedilən münaqişə vəziyyəti yaradıb Rusiyanın işğalçı qüvvələrini yenə də bölgəyə gətirsinlər. Rusiya heç zaman sülhdə maraqlı olmayıb, bu gün də maraqlı deyil. Ona görə də Rusiya öz casus şəbəkəsini hakimiyyətə gətirməlidir. Bu səbəbdən də Paşinyan rejiminə təzyiq edirlər. Hər zaman söyləmişəm, Ermənistanın siyasi səhnəsində Paşinyanın rəqibi nə Köçəryan, nə Karapetyan, nə də erməni kotalikosu II Qaregindir, Putindir. Xüsusilə də Kiriyenkonu Ermənistan üzrə xüsusi nümayəndə kimi təyin ediblər ki, Ermənistanın daxilində gedən prosesləri nəzarət altına alıb idarə edə bilsinlər. Amma bunun üçün də Paşinyana təzyiqlər etməyə başladılar, açıq mətbuata verilən informasiyadan görünür ki, Ermənistan qazın qiyməti ilə təhdid edilir. Putin bir neçə dəfə səsləndirdi ki, qazın 1000 kubmetrinin Avropada 600 dollardır, biz sizə 177 dollara veririk, bu fərqi anlamaq lazımdır. Sonra Putin Qarabağ məsələsini yenidən gündəmə gətirməyə cəhd göstərir, deyir ki, Qarabağda bu günkü situasiya çox həssasdır. Bu gün Qarabağda hansı proses gedir ki, onun həssasiyyəti də Putini narahat etsin? Bunlar erməni yaddaşına yenidən bu məsələni qaytarmaq istəyirlər. Paşinyan da Putinin üzünə dedi ki, Qarabağ hərəkatı geriyə qaytarıla bilməz və sair”.
M.İsmayılov qeyd etdi ki, Rusiyada Ermənistanın baş nazirinə siyasi və iqtisadi cəhətdən təzyiqlər edildi və o təzyiqə də Paşinyan net cavab verdi. “Paşinyan Putinin düz üzünə dedi ki, xarici vətəndaşlar Ermənistanda seçkili orqanlara öz namizədliyini verə və seçilə bilməz. Paşinyanın bunu açıq bəyan etməkdə məqsədi Samvel Karapetyanın namizədliyin qeydə alınmasın və onun seçkidə iştirak etməsinin mümkün olmadığını çatdırmaq idi. Çünki ondan əvvəl Putin “biz ümid edirik ki, siz Rusiyapərəst qüvvələrin seçkidə iştirakına şərait yaradacaqsınız” dedi. Paşinyan da söhbətin bir başa Karapetyandan getdiyini anladı və Putinə də o cür net cavab verdi ki, sizin dəstəklədiyiniz namizəd Ermənistanda keçiriləcək parlament seçkilərində iştirak edə bilməyəcək”-deyə M.İsmayılov vurğuladı.
İradə SARIYEVA
