Rizvan Qarabağlı: “Bəzi gənclərin belə məsuliyyətsizlik davranışı qəbuledilməzdir”
Aprelin 1-dən 2-nə keçən gecə Bakıdakı tarixi Nizami Kino Mərkəzinin binasının fasadına boya ilə cızma-qara (qraffiti) edilib. Dövlət tərəfindən qorunan abidəyə vurulan bu ziyanla bağlı araşdırma başlanıb. Azərbaycan Respublikasının Kino Agentliyi məlumat yayıb ki, görülən tədbirlər nəticəsində vandalizm aktının nəticələri qısa müddətdə aradan qaldırılıb və binanın ilkin görünüşü bərpa olunub.
Nizami Kino Mərkəzinin divarına qraffiti çəkilməsi ilə bağlı cinayət işi açılıb.
Mətbuatın yazdığına görə, Nizami Kino Mərkəzinin divarına qraffiti çəkən şəxslər saxlanılıb. Qraffiti tipli təsvirlər çəkən 20 yaşlı A.S, 16 yaşlı L.M, 16 yaşlı Ş.Q və 17 yaşlı M.B ilə valideynlərinin iştirakı ilə aidiyyəti üzrə Polis İdarəsində profilaktik iş aparılır.
Abidəyə dəyən ziyanın məbləğinin müəyyən olunması və hüquqi məsuliyyət tədbirləri istiqamətində araşdırmalar davam etdirilir.
Nizami Kino Mərkəzi-nin divarına qraffiti çəkilməsi məsələsi həm hüquqi, həm də ictimai baxımdan ciddi bir məsələdir. Dövlət əhəmiyyətli mədəni obyektlərdən birində icazəsiz qraffiti çəkilməsi vandalizm sayılır və cərimə və ya digər hüquqi məsuliyyət yaradır.
O da məlumdur ki, Azərbaycanda ictimai və tarixi binaların zədələnməsi qanunla qadağandır. Bəzi insanlar qraffitini “incəsənət” kimi görsə də, belə mədəni obyektlərin üzərində icazəsiz çəkilməsi çox mənfi hadisədir. Xüsusilə Bakı kimi şəhərlərdə tarixi və simvolik binaların qorunmasına böyük önəm verilir.
Baş vermiş hadisəni təəsüflə qarşılayan mütəxəssislər qeyd edirlər ki, bu sadəcə “divara rəsm çəkmək” deyil, paytaxtın mərkəzində yerləşən mədəni-tarixi əhəmiyyətli binaya qarşı vandallıqdır.
Ekspertlərin sözlərinə görə, qraffiti bəzi Qərb ölkələrində geniş yayılıb, binaların divarlarını, ictimai məkanları pis hala salır, şəhərin ümumi görünüşünə və arxitekturasına ciddi zərər vurur, binaları eybəcər hala salır. Təbii ki, qrafiti mədəniyyəti Bakıya və Azərbaycana xas deyil. Azərbaycanda, xüsusilə Bakıda belə “mədəniyyət” yad və qəbuledilməzdir. Bizim şəhərimiz başqa dəyərlərlə tanınır.
Memarlıq üzrə fəlsəfə doktoru, Azərbaycan Memarlar İttifaqının üzvü Rizvan Qarabağlı baki-xeber.com-a bildirdi ki, hadisəni təəssüflə və ürəkağrısı ilə qarşılayıb. Bəzi gənclərin və yeniyetmələrin dövlət tərəfindən qorunan tarixi abidəyə qarşı bu cür müdaxilə etməsini qəbuledilməz sayan R.Qarabağlı qeyd etdi ki, gənclərin bu məsuliyyətsizliyi ciddi narahatlıq doğurur. R.Qarabağlı hesab edir ki, bu onu göstərir ki, bəzi gənclərimiz tarixi abidələrimizin dəyərini anlamır və bu ona görə də bu cür hərəkətlərə yol veriblər.
“Çox təəssüflər olsun ki, belə bir hadisə baş verib. Bəzi gənclərin belə məsuliyyətsizlik davranışı qəbuledilməzdir. Bu tarixi binanı korlamaq qəbul edilə bilməz. Adam da belə bir binyaya qarşı vandallıq edər? Nizami Kino Mərkəzinin müəllifi Mikayıl Hüseynovdur, o bina ilə üzbə-üz binanının da müəllifi odur. Şəhərin ən gözəl binalarından biridir Nizami Kino Mərkəzinin bunası. Belə bir gözəlliyi pozmaq olmaz.
Tarixi irsimizə bəzi gənclərin münasibəti narahatlıq doğurur. Gənclər abidələrimizin qədrini bilmirlərsə valideynləri onlara bu dəyərləri aşılamalıdır. Ata-analar uşaqlarının mənəvi tərbiyəsinə xüsusi fikir verməlidir, onlarla məşğul olmalıdır. Tərbiyənin ilk qaynağı ailədir. Ona görə də valideynlər uşaqlarının tərbiyəsindən məsuldur. Valideyn uşağını evdən çölə buraxanda ona fikir versin. Hər gələn tarixi abidəyə müdaxilə etsə, üstünə bir şey çəksə o abidədən əsər-əlamət qalmaz ki...Hesab edirəm ki, tarixi binalara toxunmaq olmaz”.
R.Qarabağlı qeyd etdi ki, Azərbaycan Respublikası Konstitusiyasının 77-ci maddəsində “tarix və mədəniyyət abidələrini qorumaq hər kəsin borcudur” yazılıb. Tarix və mədəniyyət abidələrini qorumaq gənclərin başlıca vəzifəsidir.
İradə SARIYEVA
