Hər bir xalqın milli kimliyi həm onun məişətində, həm yaşam tərzində, həm mədəniyyətində, həm memarlığında, həm kənd və şəhərlər yaratma ənənələrində və sair də özünü ehtiva edir. Azərbaycançılıq məfkurəsini bir milli kimlik və milli həmrəylik ideologiyasına çevirən Azərbaycan xalqı öz mədəniyyəti, mənəvi keyfiyyətləri, sahib olduqları ilə tarixdə öz sözünü deyib.
Multikulturalizm və tolerantlıq ənənələrinin uzun əsrlərdən bəri formalaşdığı Azərbaycan cəmiyyətində daim mənəvi-əxlaqi dəyərlər qorunub, təbliğ edilib.
Azərbaycan tarixən dünyanın diqqət mərkəzində olub və bu gün də dünya Azərbaycanın milli-mənəvi, mədəni, tarixi dəyərlərini bir örnək kimi görür, qiymətləndirir. Bizim dəyərlərimizin unikallığı xüsusilə ölkəmizin ev sahibliyi ilə keçirilən beynəlxalq, qlobal tədbirlərdə özünü daha çox göstərir. İndiyə qədər saysız beynəlxalq tədbirə ev sahibliyi etmişik və xaricdən gələn hər bir qonağı öz milli ənənələrimizə uyğun olaraq qarşılayıb yola salmışıq. Mədəniyyətimizi, mətbəx aləmimizi, sənət nümunələrimizi, sənətkarlarımızı, bir sözlə, bizim özümüzü tanıyırlar, qəbul edirlər.
Azərbaycanda keçirilən Ümumdünya Şəhərsalma Forumunun 13-cü sessiyası (WUF13) xalqımızın həm də mədəniyyətinin, memarlıq ənənələrinin təbliğinə xüsusi töhfə verir.
WUF13 Azərbaycanın tarix, mədəniyyət, məişət, din, əxlaq dəyərlərinin və yaradıcı istedadının nümayişində necə rol oynayacaq?
VUF13 Azərbaycanın tarixini, mədəniyyətini, məişətini, dini-mənəvi dəyərlərini və yaradıcı potensialını dünyaya nümayiş etdirmək üçün mühüm beynəlxalq platforma rolunu oynayır. Forum çərçivəsində Bakıya minlərlə xarici qonaq, mütəxəssis və beynəlxalq təşkilat nümayəndəsi gəlib. WUF13 tədbirinin rolu bir neçə istiqamətdə özünü göstərir.
Azərbaycanın zəngin tarixi irsi dünyanın müxtəlif yerlərindən gəlmiş qonaqların diqqətini cəlb edib. Qobustan, Şirvanşahlar Saray Kompleksi və müasir memarlıq nümunələri kimi Heydər Əliyev Mərkəzi beynəlxalq iştirakçılara təqdim olunur. Heç şübhəsiz ki, burada Azərbaycanın multikultural və tolerant cəmiyyət modeli diqqət mərkəzindədir və qonaqlar müxtəlif millətlərin, dinlərin təmsilçilərinin bir arada mehriban və sülh şəraitində yaşamasından məmnun qalırlar. Təbii ki, müxtəlif dinlərin və mədəniyyətlərin birgə yaşaması ölkənin mənəvi dəyərlərinin nümunəsi kimi göstərilir. Azərbaycanın sülh və sabitlik məkanı olması, bütün xalqların, mədəniyyətlərin və dinlərin sülh şəraitində mövcudluğu, fəaliyyəti xarici mütəxəssislərin marağını cəlb edir.
Milli məişət və adət-ənənələr baxımından da bizim dəyərlərimiz nümayiş olunur. Vurğuladığımız kimi, qonaqpərvərlik, milli mətbəx, musiqi, xalçaçılıq və xalq sənəti xarici qonaqlarda ölkə haqqında müsbət təəssürat yaradır. Azərbaycanın elm, mədəniyyət xadimlərinin, memarlarının çıxışları, təqimatları, sərgilədikləri əsərlər mədəniyyətimizin təbliğində ayrıca rola malikdir. Sessiya gənclərin və yaradıcı insanların potensialını nümayiş etdirmək üçün də imkan açır. WUF13 çərçivəsində tələbə forumları, könüllülük proqramları və innovativ layihələr həyata keçirilir.
Azərbaycanın müasir şəhərsalma və inkişaf modeli beynəlxalq auditoriyaya təqdim edilir. Dayanıqlı şəhərlər, sosial inklüzivlik və urban inkişaf sahəsində ölkənin təcrübəsi dünya ilə paylaşılır.
Nəticə etibarilə, VUF13 Azərbaycanın həm qədim tarixi-mədəni irsini, həm də müasir inkişafını dünyaya tanıtmağa, ölkənin beynəlxalq nüfuzunu artırmağa və yaradıcı insan potensialını nümayiş etdirməyə xidmət edir.
WUF13-ün Azərbaycanda keçirilməsi bütövlükdə dövlətimizin uğurudur. 13-cü Ümumdünya Şəhərsalma Forumu (WUF13) çərçivəsində Azərbaycanın qədim tarixi və milli-mədəni irsi xüsusi WUF13 Rəsmi Platforması vasitəsilə qlobal auditoriyaya təbliğ edilib. Təbliğat əsasən bir neçə istiqamətlərdə həyata keçirilib.
Xarici qonaqlar üçün xüsusi Mədəniyyət Bələdçisi hazırlanaraq onlara Şamaxı, Naxçıvan, Şəki və Şuşa kimi tarixi şəhərlərimizin memarlıq inciləri tanıdılıb. Bakının çoxqatlı mədəni kimliyini, zəngin tarixini və musiqi mədəniyyətini nümayiş etdirən “Şəhərin Səsi” adlı xüsusi mədəni layihə təşkil olunub. Yerli universitetlər, xüsusilə Qarabağ və Şuşa şəhərlərinin tarixi landşaftına uyğun hazırlanmış bərpa və memarlıq layihələrini qonaqlara təqdim ediblər.
Qeyd edək ki, WUF13 tədbirlərində Azərbaycanın zəngin tarixi-mədəni irsinə də xüsusi diqqət ayrılıb. Onu da bildirək ki, Forumun açılış mərasimində Prezident İlham Əliyev çıxışında Şamaxı, Naxçıvan, Gəncə, Qəbələ, Şəki və Şuşa kimi qədim şəhərlərin memarlıq irsini xüsusi vurğuladı. Bu yanaşma Azərbaycanın şəhərsalma siyasətinin milli-mədəni irsin qorunmasını əsas prioritet hesab etdiyini göstərir. Ekspertlərin fikrincə, Prezident İlham Əliyevin çıxışında səsləndirdiyi əsas mesajlardan biri məhz inkişafla tarixi irsin qorunması arasında balansın saxlanılması ilə bağlı oldu. Bütövlükdə WUF13 Azərbaycanın dünyaya təqdim etdiyi inkişaf modelinin nümayişidir. Bu forum vasitəsilə Bakı qlobal urbanizasiyaya töhfə verməkdədir.
Ekspertlər hesab edir ki, WUF13 bütövlükdə Azərbaycan mədəniyyətinin, tarixinin, mənəvi dəyərlərinin və sairin dünyada təbliğində xüsusi rol oynayır.
İradə SARIYEVA Yazı Azərbaycan Respublikasının Medianın İnkişafı Agentliyinin maliyyə dəstəyi ilə çap olunur.
